Zebur 74 - Mukaddes Kitap

74‑nji mezmur

1 Aýdymçylar toparynyň ýolbaşçysyna. «Heläk etme» äheňinde aýdylýan. Asafyň mezmury . Nagma.

¹ Aýdymçylar toparynyň ýolbaşçysyna. «Heläk etme» äheňinde aýdylýan. Asafyň mezmury. Nagma.

² Eý, Hudaý, Saňa şükür edýäris, Sen Öz barlygyňy aýan edýäň, şükür edýäris, Biz Seniň gudratlaryň hakda aýdýarys.

³ Diýýärsiň: «Öz bellän wagtym gelende, ýüz görmezlik bilen höküm çykararyn Men.

⁴ Ýer we onuň ilaty titrän wagtynda, Mendirin onuň direglerini berkiden» Sela

⁵ Öwünjeňlere: «Öwünmäň» diýýän, erbetlere: «Güýjüňize daýanmaň» diýýän.

⁶ Siz öz kuwwatyňyza magtanmaň, ýeňsäňizi dim-dik tutup gürlemäň.

⁷ Çünki ýeňiş ne gündogardan, ne günbatardan, ne-de çöldendir.

⁸ Kazylyk edýän diňe Hudaýdyr, birini peseldip, birini beýgeldýän Oldur.

⁹ Çünki käse Rebbiň elinde, ol güýçli garylyp, köpükleýän şerapdan doly. Reb gazaby we şeraby käseden guýar: ýer ýüzüniň ähli erbetleri, ony löderesine çenli içerler.

¹⁰ Men bolsa elmydama beýan ederin, Ýakubyň Hudaýyna nagma aýdaryn.

¹¹ Ol erbetleriň ähli kuwwatyny syndyrar, dogrularyň kuwwatyny bolsa Ol belende galdyrar.