Zebur 5 - Mukaddes Kitap

5‑nji mezmur

1 Aýdymçylar toparynyň ýolbaşçysyna. Üflenip çalynýan saz guralynda. Dawudyň mezmury .

¹ Aýdymçylar toparynyň ýolbaşçysyna. Üflenip çalynýan saz guralynda. Dawudyň mezmury.

² Ýa Reb, diňle meniň sözümi hem-de eşit meniň ahy-zarymy.

³ Diňle perýadymyň sesini, eý, Patyşam hem-de Hudaýym, men Saňa edýändirin dilegi.

⁴ Ýa Reb, meniň sesimi ertirine eşidýärsiň Sen, häzirlenip, säher bilen huzuryňda garaşýaryn men.

⁵ Sen erbetligi halamaýan Hudaýsyň, Seniň huzuryňda ýaman ýaşamaz,

⁶ tekepbirler Seniň gaşyňda durmaz; Sen ýigrenýärsiň betkärleriň baryny,

⁷ ýok edýärsiň ýalan sözleýänleri. Ýa Reb, Sen ýigrenýärsiň ganhor bilen kezzaby.

⁸ Men bolsa egsilmez sadyk söýgiň arkaly, girerin Seniň öýüňe; men Senden heder ederin, mukaddes ybadathanaňa tarap tagzym ederin.

⁹ Ýa Reb, duşmanlarym zerarly, Öz adalatyňda meni ugrukdyr; dogrula Sen öňümdäki ýoluňy.

¹⁰ Olaryň agzynda dogry söz ýokdur, olaryň ýüregi weýrançylykdyr, olaryň bogazy açyk gabyrdyr, dilleri bilen-de ýallaklaýandyr.

¹¹ Eý, Hudaý, olara çykar hökümi, pällerinden tapyp, ýykylsyn olar; ýazyklary üçin kowup çykar olary, çünki olar Saňa garşy baş galdyrdylar.

¹² Seni pena edinýänleriň bary şatlansyn, elmydama joşup, nagmalar aýtsyn; çünki olary goraýarsyň Sen, adyňa aşyklar Sende şat bolsun.

¹³ Sen ýalkaýarsyň dogry ynsany, hoşamaýlygyň-da bolýar onuň galkany.