Zebur 36 - Mukaddes Kitap

36-njy mezmur Alef

Dawudyň mezmury
Alef

¹ Erbet iş edýänlere janyňy ýakma, naýynsaplara höwesli bakma.

² Çünki olar tiz wagtda ot kimin gurar, gök ösümlik kimin saralyp solar.

Bet

Bet

³ Rebbe bil bagla, et sen ýagşylyk, ýurtda ýaşap, ýaýna asudalykda.

⁴ Rebden teselli tap, ýürek arzuwlaryňy Ol hasyl eder.

Gimel

Gimel

⁵ Ýoluňy Rebbe tabşyr, Oňa bil bagla, şonda Ol saňa hemaýat berer.

⁶ Nur deý ýalpyldadar dogrulygyňy, günorta çagy deý – haklylygyňy.

Dalet

Dalet

⁷ Ümsüm bol Rebbiň öňünde, Oňa sabyrly garaş, ýoly rowaç betniýete höwesli bakma.

He

He

⁸ Gahardan saklan, gazaby taşla, aladaçyl bolma: ol şere elter.

⁹ Çünki kesilip taşlanar pislik edýänler, Rebbe intizarlar ýeri miras alarlar.

Waw

Waw

¹⁰ Az-kem sabyr et, erbetler ýok bolarlar, ýerlerine göz aýlarsyň, ýöne tapmarsyň.

¹¹ Pälipes adamlar bolsa ýeri miras alarlar, abadançylykda ýaşap, hezil ederler.

Zaýin

Zaýin

¹² Erbet dogry adama hyýanat edýär hem-de oňa dişlerini gyjaýar.

¹³ Taňry bolsa onuň üstünden gülýär, çünki onuň wagtynyň dolýandygyny görýär.

Ḥet

Ḥet

¹⁴ Garyp bilen mätäji ýere çalmaklyk üçin, dogry ýoldan barýanlary öldürmek üçin, erbet adamlar gylyç syryp, ýaýyny gurýar.

¹⁵ Emma gylyçlary öz ýüreklerine sanjylar, olaryň ýaýlary hem kül-owram bolar.

Ṭet

Ṭet

¹⁶ Dogry ynsanyň az zady ähli erbetleriň baýlygyndan ýagşydyr.

¹⁷ Çünki erbetleriň gollary döwler, ýöne Reb dogrulary söýgetlär.

Ýod

Ýod

¹⁸ Reb kämilleriň günlerini bilýändir, olaryň mirasy ebedi galar.

¹⁹ Olar ýaman wagty utandyrylmaz, dok bolarlar açlyk döwründe.

Kaf

Kaf

²⁰ Emma erbetler heläk bolarlar, Rebbiň duşmanlary örüleriň gözelligi deý ýitip giderler, gaýyp bolarlar, tüsse içinde sumat bolarlar.

Lamed

Lamed

²¹ Erbet adam karz alyp, yzyna bermez, dogry ynsan bolsa jomart we eli açyk.

²² Çünki Onuň ýalkanlary ýeri miras alarlar, Onuň garganlary bolsa gyrlyp ýok bolar.

Mem

Mem

²³ Reb dogrynyň gadamyny berkarar edýär, Ol onuň ýolundan göwnühoş bolýar.

²⁴ Ýykylmaz bu ynsan büdräýende hem, çünki Reb onuň elinden tutýar.

Nun

Nun

²⁵ Ýaş ýigitdim, indi garradym, ýöne dogry ynsanyň terk edilenini ýa zürýadynyň çörek dilenenini heniz görmedim.

²⁶ Elmydama eli açyk hem-de karz berýär; olaryň neslinden ýalkanyş geler.

Sameh

Sameh

²⁷ Şer işden gaça dur hem et ýagşylyk – baky ýaşarsyň.

Ğaýin

Ğaýin

²⁸ Çünki Reb adalaty söýýändir, Ol sadyk ynsany terk edýän däldir; dogry ynsan baky goralar, ýöne erbetleriň zürýatlary gyrlyp ýok bolar.

²⁹ Dogry ynsanlar ýeri miras alarlar hem-de onda baky mesgen tutarlar.

Pe

Pe

³⁰ Dogry adamyň agzy danalygy sözleýär, onuň dili adalaty beýan eýleýär.

³¹ Onuň ýüregindedir Hudaýyň kanuny, taýýan däldir onuň aýagy.

Tsadi

Tsadi

³² Erbet dogry ynsany aňtaýar, ony öldürmäge pursat peýleýär.

³³ Ýöne Reb ony erbediň eline bermez; kaza getirilende, ony aýyply çykarmaz.

Ķof

Ķof

³⁴ Rebbe umyt bagla, Onuň ýoluny sakla, Ol hem ýeri miras almagyň üçin seni beýgelder; sen erbetleriň ýok edilenini görersiň.

Reş

Reş

³⁵ Men yzgytsyz erbet adamyň çynar dek gögeren ýerinde ýaýrap oturanyny gördüm.

³⁶ Birdenkä ol gaýyp boldy-da gitdi; men ony gözledim, emma tapmadym.

Şin

Şin

³⁷ Kämil ynsany synla, dogry adama seret. Parahat ynsanyň gelejegi bar.

³⁸ Emma günäliler bütinleý weýran ediler; erbetleriň gelejegi ýok bolar.

Taw

Taw

³⁹ Reb dogry ynsanlary halas edýändir, muşakgatlykda olara pena bolýandyr.

⁴⁰ Reb olara kömek berer we halas eder; olary erbetlerden gutarar we halas eder, çünki olar Ony pena tutunýar.