Zebur 35 - Mukaddes Kitap

35‑nji mezmur

1 Aýdymçylar toparynyň ýolbaşçysyna. Rebbiň guly Dawudyň mezmury .

¹ Aýdymçylar toparynyň ýolbaşçysyna. Rebbiň guly Dawudyň mezmury.

² Erbet adamyň etmişi ýüreginde seslenýär, Ol Hudaýdan asla gorkmaýar.

³ Çünki günäsini tapyp, ony ýigrenerinden, juda hoşdur onuň göwni özünden.

⁴ Agzynyň sözleri – betlik hem hile, paýhaslanyp, ýagşylyk etmegi hiç islemeýär.

⁵ Düşeginde ýamanlyk etmegiň ýollaryny oýlaýar, bet ýola düşýär, ony asla ýigrenç saýmaýar.

⁶ Ýa Reb, göklere ýetýär Seniň söýgiň, bulutlara ýetýär wepadarlygyň.

⁷ Seniň dogrulygyň belent daglar deý, Seniň adalatly hökümleriň düýpsüz çuňluk deý. Ýa Reb, Sen ynsany, haýwany halas edýärsiň.

⁸ Eý, Hudaý, sadyk söýgiň neneň gymmatly! Seniň ganatlaryňyň saýasy ynsan ogullaryna pena bolýandyr.

⁹ Öýüňiň näz-nygmatyndan doýýarlar; Sen olary Öz lezzet derýaňdan gandyrýaň.

¹⁰ Çünki ýaşaýşyň gözbaşy Sende, biz nur görýäris Seniň nuruňda.

¹¹ Seni tanaýanlara dowam etdir sadyk söýgiňi, ýüregi dogrulara – dogrulygyňy.

¹² Tekepbiriň aýagy meni basgylamasyn, erbet adamlaryň eli meni kowmasyn.

¹³ Betkärler ol ýerde ýykyldylar, ýere ýazyldylar, galyp bilmeýärler.