Zebur 31 - Mukaddes Kitap

31‑nji mezmur

Dawudyň maskili

¹ Ýazygy bagyşlanan, günäsi örtülen adam nähili bagtly!

² Reb tarapyndan etmişi hasaba alynmaýan, ruhunda hile ýok adam nähili bagtly!

³ Men dymyp, uzakly gün zar-zar aglanymda, gurap galdy meniň süňklerim.

⁴ Çünki gije-gündiz eliň üstüme agramyn saldy, tomus yssysynda ýaly ysgynym gaçdy. Sela

⁵ Saňa äşgär etdim men öz günämi hem-de gizlemedim etmişlerimi. Diýdim: «Reb ýanynda boýun aljak ýazyklarymy». Sen hem bagyşladyň günämiň ýazygyny. Sela

⁶ Munuň üçin sadyklaryň her biri günäsini aňlan wagty Saňa etsin dogany. Şonda, muňa ýokdur hiç şübhe: oňa ýetmez köp suwlaryň joşmagy.

⁷ Sensiň meniň gizlenýän ýerim; goraýarsyň meni howp-hatarlardan; Sen meni halas eýlediň, ýüregime şatlyk nagmasyn goýduň. Sela

⁸ «Men saňa öwüt bererin, ýöremeli ýoluňy salgy bererin; maslahat bererin, sende bolar Meniň nazarym.

⁹ Düşünjesiz at ýa gatyr dek bolma: agyzzyryk bilen uýan bolmasa bilmeýärler olar gitjek ýoluny».

¹⁰ Köp bolýandyr erbetleriň gaýgysy, emma Rebbe bil baglaýanlary gurşap alýar Onuň sadyk söýgüsi.

¹¹ Eý, dogry adamlar, Rebde begeniň hem-de şatlanyň! Eý, ýüregi dogrular, hemmäňiz heşelle kakyň!