Zebur 30 - Mukaddes Kitap

30-njy mezmur

1 Aýdymçylar toparynyň ýolbaşçysyna. Dawudyň mezmury .

¹ Aýdymçylar toparynyň ýolbaşçysyna. Dawudyň mezmury.

² Ýa Reb, men Seni pena edinýärin, meni hiç haçan utanja goýma; dogrulygyň bilen halas et meni.

³ Maňa gulak goý, tiz ýetiş meniň dadyma; bol Sen meni penalaýan bir gaýa, halas bolmagym üçin bir mäkäm gala.

⁴ Çünki meniň gaýam hem galam Sensiň; Öz adyň hatyrasyna ýol görkez maňa, meni ugrukdyr.

⁵ Maňa gurlan tordan Sen meni çykar, çünki Sen meniň penamsyň.

⁶ Seniň eliňe tabşyrýaryn men öz ruhumy; meni halas etdiň, ýa Reb, hakykatyň Hudaýy.

⁷ Ýigrenýärin dereksiz butlara sygynýanlary; men diňe Rebbe baglaýan bili.

⁸ Begenip şatlanaryn sadyk söýgiňe, çünki Sen muşakgat halymy gördüň, janymyň çekýän derdini bildiň;

⁹ tabşyrmadyň meni duşman eline; duruzdyň aýaklarymy giň ýerde.

¹⁰ Ýa Reb, maňa merhemet eýle, sebäbi men hasrat içinde; gaýgy-gamdan ýaňa gözüm küteldi; meniň janym hem-de bagrym gurady.

¹¹ Ömrüm soňlanyp barýar gam-gussa bilen; ýyllarym-da dat-perýat bilen; günäm zerarly kuwwatym gaçdy hem-de meniň süýeklerim gurady.

¹² Ýüzügara boldum ähli ýagylaryma, ylaýta-da öz goňşularyma; betnyşan boldum men tanyşlaryma; köçede görýänler menden gaçýarlar.

¹³ Merhum dek unudyldym men; bir döwlen küýzä öwrülendirin.

¹⁴ Çünki köpleriň ýamanlamasyny eşidýärin men, maňa garşy dildüwşük guranlarynda, janyma kast etmekçi bolanlarynda, töwerek-daşymy gorky gaplaýar.

¹⁵ Emma, ýa Reb, Saňa bil baglaýaryn men; Men diýýärin: «Sensiň meniň Hudaýym».

¹⁶ Ömrümiň günleri Seniň eliňde; halas et meni ýagylarymyň hem-de meni yzarlaýanlaryň elinden.

¹⁷ Saç ýüzüňiň nuruny bendäň üstüne; sadyk söýgiň bilen meni halas et.

¹⁸ Ýa Reb, meni utanja goýma, çünki Seni çagyrýaryn men; goý, erbetler utanja galsyn; ölüler dünýäsine inip, goý, olar dymsyn.

¹⁹ Tekepbirlik hem-de kemsitme bilen dogry ynsana sögýän ýalan diller lal bolsun.

²⁰ Seniň ýagşylygyň neneňsi uly! Özüňden gorkýanlar üçin saklaýaň ony; adamzat öňünde Saňa bil baglaýanlara edýärsiň Sen bu ýagşylygy.

²¹ Sen ynsan dildüwşüklerinden olary Öz huzuryň saýasynda gizleýäň; dilleriň dawalaşmagyndan çadyryň howpsuzlygynda saklaýaň.

²² Rebbe alkyş bolsun! Çünki Ol daşy gabalan şäherde maňa ajaýyp söýgüsini görkezdi.

²³ Öz howsalamda şeýle oýladym: «Men Seniň nazaryňdan taşlandym». Ýöne Saňa perýat eden wagtymda Sen dady-perýatlarymy eşitdiň.

²⁴ Eý, Rebbiň ähli sadyklary, söýüň siz Ony! Reb goraýar Özüne wepadarlary, doly jeza berýär tekepbirlik edýäne.

²⁵ Eý, Rebbe umyt baglaýanlaryň bary, batyr boluň, kuwwatlansyn ýürekleriňiz!