Zebur 25 - Mukaddes Kitap

25‑nji mezmur

Dawudyň mezmury

¹ Meni akla, ýa Reb, çünki aýypsyz gezdim, bil bagladym Rebbe, yranmaryn men.

² Meni barla, ýa Reb, hem meni derňe, meniň pikirlerimi, ýüregimi syna.

³ Çünki söýgiň gözlerimiň alnynda, gezdim men Seniň sadyklygyňda.

⁴ Bolgusyzlar bilen men oturmaýaryn, ikiýüzlülere ýaran bolmaýaryn.

⁵ Betkärleriň üýşmeleňini ýigrenýärin; erbetleriň ýanynda oturmaryn men.

⁶ Ellerimi ýuwup ýazyksyzlykda, aýlanyp gurbanlyk sypaň daşyndan, ýa Reb,

⁷ Saňa şükür nagmasyny aýdýaryn; ähli gudratly işleriňi mälim edýärin.

⁸ Ýa Reb, söýýärin mesgen tutan öýüňi – Seniň şöhratyňyň mesgen tutan ýaşalgasyny.

⁹ Günäkärleriňki bilen bile alma meniň janymy, ganhorlaryňky bilen bile – ýaşaýyşymy.

¹⁰ Olaryň elinde haýynlyk bardyr; gollary para-peşgeşden doludyr.

¹¹ Men bolsa gezýärin aýypsyzlykda, meni halas et, maňa merhemet eýle.

¹² Tekiz ýerde dur meniň aýagym, Rebbe alkyş aýtjak men jemagatda.