Zebur 20 - Mukaddes Kitap

20‑nji mezmur

1 Aýdymçylar toparynyň ýolbaşçysyna. Dawudyň mezmury .

¹ Aýdymçylar toparynyň ýolbaşçysyna. Dawudyň mezmury.

² Ýa Reb! Patyşa Seniň kuwwatyňa şatlanýar, halas edendigiňe biçak begenýär.

³ Ýürek arzuwlaryny Sen oňa berdiň; diliniň dilegini Sen ret etmediň.

⁴ Bol bereketleriň bilen Sen garşy aldyň, başyna sap altyndan jyga geýdirdiň.

⁵ Ol Senden ömür diledi, Sen oňa berdiň ebedilik, müdimilik bir ýaşy.

⁶ Seniň ýeňşiň bilen beýik onuň şöhraty, Sen hormat bilen dabara beslediň ony.

⁷ Sen oňa ebedi bereket berýäň, huzuryňdaky şatlyk bilen ony şat edýäň.

⁸ Çünki Rebbe bil baglaýar patyşa, Beýik Hudaýyň sadyk söýgüsi arkaly ol sarsdyrylmaz.

⁹ Seniň eliň tapar ähli duşmanlaryňy, Seniň goluň – Seni ýigrenýänleri.

¹⁰ Seniň huzuryň peýda bolanda, olary edersiň otly tamdyr deý; Reb ýuwudar olary Öz gaharynda; ot hem ýalmap iýer olary.

¹¹ Ýer ýüzünden ýok edersiň nesillerini, ynsanlar arasyndan – zürýatlaryny.

¹² Saňa garşy erbet niýet edäýseler hem, dildüwşük guraýsalar hem – üstün çykmazlar.

¹³ Çünki ýüzlerine peýkamlary çenemek bilen Sen olary yzlaryna öwrersiň.

¹⁴ Ýa Reb, beýgel Sen Öz kuwwatyňda, biz Seniň güýjüň barada nagma aýdyp, alkyş aýdarys.