Zebur 149 - Mukaddes Kitap

149-njy mezmur

¹ Rebbe şan-şöhrat bolsun! Rebbe täze nagma aýdyň, sadyklar jemagatynda Oňa öwgüler aýdyň!

² Ysraýyl Ýaradanyna şatlansyn! Sion perzentleri Şasyna, goý, begensin!

³ Olar tans edip, Ony şöhratlandyrsyn, deprekde, lirada Oňa mukamlar çalsyn!

⁴ Çünki Reb Öz halkyndan göwnühoş bolýar, Ol pespälleri gutulyşa besleýär.

⁵ Sadyklar aklanyp, goý, beýgelsinler, düşeklerinde şatlanyp, nagma aýtsynlar.

⁶ Dillerinde Hudaýa öwgüler bolsun, ellerinde ikiýüzli gylyçlar bolsun.

⁷ Olar milletlerden, goý, öç alsynlar, halklara jeza bersinler.

⁸ Patyşalaryny zynjyrlasynlar, asylzadalaryna gandal ursunlar.

⁹ Olar babatda ýazylan hökümi berjaý etsinler! Munuň özi sadyklaryň bary üçin hormatdyr. Rebbe şan-şöhrat bolsun!