Zebur 136 - Mukaddes Kitap

136-njy mezmur

¹ Babyl suwlarynyň boýunda oturyp, Siony ýatlan wagtymyz gözýaş döküpdik.

² Şol ýerdäki derek agaçlaryndan öz liralarymyzy asyp goýupdyk.

³ Bizi ýesir alanlar şol ýerde nagma talap etdiler, bize ezýet berenler şadyýanlygy talap etdiler. «Bize Sion nagmalaryndan birini aýdyň» diýdiler.

⁴ «Ýat toprakda neneň edip Rebbiň nagmasyny aýdaly?!»

⁵ Eý, Iýerusalim, eger seni unutsam, goý, elim hünärini unutsyn.

⁶ Eger seni ýada salmasam, Iýerusalim şatlygymyň seresidir diýmesem, goý, dilim damagyma ýapyşsyn!

⁷ Ýa Reb, Iýerusalimiň ýykylan güni: «Ony ýumruň, ony ýumruň düýbüne çenli!» diýen edomlary Sen ýadyňa sal!

⁸ Eý, Babyl gyzy, eý, weýran bolmuş, seniň bize edenleriňi gaýtarjak nähili bagtly!

⁹ Seniň balalaryňy daşa urjak nähili bagtly!