Zebur 134 - Mukaddes Kitap

134‑nji mezmur

^1-2 Rebbe şan-şöhrat bolsun! Eý, Rebbe hyzmat edýänler, Rebbiň adyny şöhratlandyryň! Eý, Rebbiň öýünde, Hudaýymyzyň öýüniň howlusynda hyzmat edýänler, Rebbi şöhratlandyryň!

³ Rebbe şan-şöhrat bolsun! Çünki Reb ýagşy. Onuň adyna nagmalar aýdyň, çünki bu örän lezzetli.

⁴ Çünki Reb Özi üçin Ýakup neslini, Öz genji hökmünde Ysraýyly seçip-saýlady.

⁵ Men bilýärin Rebbiň beýikdigini, Taňrymyzyň ähli taňrylardan üstündigini.

⁶ Göklerde, ýeriň ýüzünde, deňizlerde, bar çuňluklarda Reb Öz göwnüniň islän zadyny edýär.

⁷ Ol ýeriň uçlaryndan bulutlary turuzýar, ýagyş üçin ýyldyrymlar çakdyrýar, Öz ammarlaryndan ýeli çykarýar.

⁸ Ol Müsürde ynsanlaryň we haýwanlaryň ilkinji doglanlaryny öldürdi.

⁹ Eý, Müsür, Ol seniň içiňe – faraonyň, ähli hyzmatkärleriniň üstüne alamatlary, mugjyzalary ýollady.

¹⁰ Ol köp milletleri gyrdy, güýçli patyşalary öldürdi:

¹¹ amorlaryň patyşasy Sihony, başanlaryň patyşasy Ogy we ähli Kengan şalyklaryny.

¹² Olaryň topragyny miras hökmünde, saýlama mülk hökmünde Öz ysraýyl halkyna berdi.

¹³ Ýa Reb, Seniň adyň ebedi, ýa Reb, Sen ýatlanarsyň asyrlarboýy.

¹⁴ Reb Öz halkyny hakly çykarar, Öz bendelerine rehim-şepagat eder.

¹⁵ Milletleriň butlary kümüş-tylladyr, olar ynsan elleriniň işidir.

¹⁶ Olaryň agzy bar, ýöne gürlänok, gözleri bar, ýöne görenok.

¹⁷ Gulaklary bar, ýöne eşidenok, agyzlarynda hiç bir dem hem ýok.

¹⁸ Şolar dek bolar butlary ýasanlar, olara bil baglan ähli ynsanlar.

¹⁹ Eý, Ysraýyl nesli, Rebbi alkyşlaň, eý, Harun nesli, Rebbi alkyşlaň.

²⁰ Eý, Lewi nesli, Rebbi alkyşlaň, eý, Rebden gorkýanlar, Rebbi alkyşlaň.

²¹ Iýerusalimde mesgen tutan Rebbe Siondan alkyşlar bolsun! Rebbe şan-şöhrat bolsun!