Zebur 109 - Mukaddes Kitap

109-njy mezmur

Dawudyň mezmury

¹ Hudaý rebbime şeýle sözledi: «Duşmanlaryňy aýak astyna salýançam, Meniň sagymda otur».

² Reb Siondan uzadar şalyk hasaňy, duşmanlaryňa ýöret sen öz hökümiňi.

³ Söweş günüňde gerçekleriň mukaddes şöhrata beslenip, meýletin bolar, ýaşlygyň säher çygy deý dolanyp geler.

⁴ Reb ant içdi, Ol ondan dänmez: «Mäliksadyk derejesindäki müdimilik ruhanysyň sen».

⁵ Taňry seniň tarapdaryňdyr: Ol gazaba münen gününde şalary kül-peýekun eder.

⁶ Reb milletlere höküm çykarar, olaryň ýurduny läşlerinden doldurar. Ol tutuş ýeriň ýüzünde baştutanlary kül-peýekun eder.

⁷ Sen bolsa ýoldaky çeşmeden içip, öz başyňy belent tutarsyň.