Nagmalar 7 - Mukaddes Kitap

7‑nji bap Gyzyň boýdaşlary:

¹ Dolan, eý, şulamly gyz, dolan! Dolan, saňa bakaly, dolan. Iki toparyň tansyna tomaşa edýän deý, şulamly gyza bakjaksyňyz näme üçin?

Ýigit:

² Ne gözel çarykly aýaklaryň, eý, asylzada gyzy! Butlaryň ökde zergäriň elinden çykan göwher mysaly.

³ Garyşyk şeraply hiç egsilmez şa käse mysalydyr göbegiň. Garnyň çigildemlere guşanan bugdaý topbagyna meňzeýär.

⁴ Ekiz jeren owlagyna ogşaýar iki göwsüň.

⁵ Boýnuň pil süňkünden edilen diň deý, gözleriň Batrabbim derwezesiniň ýanyndaky Heşbon howuzlary deý. Burnuň Damaska bakyp duran Liwan diňi deý.

⁶ Başyň Karmel dagy deý dik bolup, zülpleriň benewşedir, şa olara bendi boldy.

⁷ Sen neneňsi gözel, neneňsi hoşroý, eý, mylakatly dildarym!

⁸ Boýuň serwi agajyna, göwüsleriň üzüm salkymlaryna meňzeýär.

⁹ Serwi agajyna çykyp, şahalaryndan ýapyşaýyn diýdim. Göwüsleriň üzüm salkymlary deý, demiň almalar deý hoşboý,

¹⁰ Dodaklaryň saýlama şerap deý lezzet eçilsin. Şerap ýarym üçin aksyn, uklap ýatanlaryň dodaklaryndan süzülsin.

Gyz:

¹¹ Men ýarymyňky, ol maňa maýyl.

¹² Eý, ýarym, giň sähra çykaly, gel; gel, oba gijelerine seýil edeli.

¹³ Ir säher üzüm baglaryna gideli, göreli, gunçalapmy, gülläpmi üzüm, hem-de nar. Şol ýerde yşkymy bagyş ederin saňa.

¹⁴ Mandragoralaryň ysy bark urýar, gapymyzda täze hem guradylan dürli saýlama miweler bar, olary seň üçin sakladym, eý, ýarym.