Nagmalar 1 - Mukaddes Kitap

1‑nji bap Gyz:

Süleýmanyň nagmalar nagmasy

¹ Dodaklary bilen, goý, meni öpsün! Çünki şerapdan datlydyr söýgiň!

² Müşki-anbarlaryň neneňsi hoşboý, adyň-da dökülen atyr deý, şonuň üçin gyzlar söýýärler seni.

³ Meni özüň bilen alaý, howlugaly. Şazadam meni içki otagyna getirdi. Seniň üçin şatlanaly we guwanaly; şerapdanam zyýada taryplaly seniň yşkyňy. Sen olaryň söýgüsine mynasyp!

Gyzyň boýdaşlary: Gyz:

⁴ Eý, Iýerusalim gyzlary, garaýagyz-da bolsam, görmegeýdirin, gara men Kedaryň çadyrlary deý, owadan men Süleýmanyň perdeleri deý.

⁵ Garaýagyzlygyma bakmaň, Gün garaltdy meni. Enemiň ogullary maňa gaharlandylar; üzüm bagyna meni sakçy goýdular, ýöne öz üzüm bagyma bakyp bilmedim.

⁶ Eý, köňlümiň aşygy, aýtsana maňa, nirede bakýaň süriňi? Günorta çagy olara nirede dynç berýäň? Ýoldaşlaryňyň sürüleriniň ýanynda näme üçin sergezdan zenan dek bolaýyn?

Ýigit:

⁷ Eý, gözelleriň soltany! Eger bilmeseň, süriniň yzy bilen git, çopanlaryň çadyrynyň ýanynda owlaklaryňy bak.

⁸ Faraonyň söweş arabasyna goşulan baýtala meňzedýän seni, eý, meniň magşugym!

⁹ Şelpeli ýaňaklaryň, hünjüli boýnuň ne gözel!

¹⁰ Kümüş düwmeli tylla şelpeler ýasarys saňa.

Gyz:

¹¹ Şazadam suprasynda otyrka, nard atyrym hoşboý ysyny saçdy.

¹² Aşygym meniň üçin göwüslerimiň arasynda ýatýan mür bogdajygydyr.

¹³ Aşygym meniň üçin Eýngedi üzüm baglaryndaky hyna gülleriniň çogdamydyr.

Ýigit:

¹⁴ Sen neneňsi gözel, Söýgüli dildarym, meniň! Sen neneňsi gözel, gögerçin gözlim!

Gyz:

¹⁵ Gör, nähili syratly sen, eý, meniň söýgüli ýarym, neneňsi hoşroý sen! Gök maýsalykdyr ýatýan ýerimiz.

¹⁶ Kedrdendir diregleri öýmüziň, arçadandyr üçegi.