Eýýup 17 - Mukaddes Kitap

17‑nji bap Eýýup sözüni dowam edýär

¹ «Ruhum syndy, günlerim tamam, maňa gabyr garaşýar.

² Daş-töweregim ýaňsylaýjylardan doly, gözüm olaryň duşmançylygyny görýär.

³ Özüň maňa kepillik bergin, Senden başga maňa kim kepil boljak?

⁴ Olaryň aňyny düşünjeden gizlediň, şonuň üçin olary beýgeltmersiň.

⁵ Para üçin dostlaryny satýanlaryň çagalarynyň gözleri kör bolar.

⁶ Hudaý meni ile gep etdi, olar ýüzüme tüýkürýärler.

⁷ Gaýgydan ýaňa gözüm küteldi, on iki synam çöpe döndi.

⁸ Dogruçyl adam derdime aňk bolýar, bigünä-de hudaýsyza garşy gazap atyna atlanýar.

⁹ Dogruçyllar öz ýollaryny tutarlar, eli tämizleriň güýji artar.

¹⁰ Emma hemmäňiz gaýdyp gelseňiz-de, araňyzdan akylly adam tapmaryn.

¹¹ Günlerim tamam, niýetlerim, ýürek arzuwlarym-da puja çykdy.

¹² Olar gijäni gündiz edýärler, „Ýagtylyk garaňkylyga ýakyn“ diýýärler.

¹³ Ölüler dünýäsini öýüm dek küýsesem, düşegimi garaňkylykda ýazsam,

¹⁴ gabra: „Sen atamsyň“, gurda: „Sen enemsiň, uýamsyň“ diýen bolsam,

¹⁵ onda umydym hany? Umydymy görjek kim?

¹⁶ Umyt meniň bilen ölüler dünýäsine iner öýdýäňmi? Meniň bilen bile göre girermi?»