رومیلار 9 - مُقادِّس کیتاب

خودایینگ سایلاپ-سِچِن خالقی

^1-2 مِنینگ اولی قایغیم، یورِگیمده هِمیشه‌لیک آغیریم بار.‏ مونونگ حاقیقاتدیغینا، یالان آیدمایاندیغیما عیسی مسیحینگ آدیندان شاهات گِچیَرین.‏ سُزلِریمه مُقادِّس روحونگ اوستو بیلِن وِجدانیم-دا شاهاتدیر.‏

^3-4 هاووا، مِن قانیبیر دُغانلاریم بُلان یَعنی اسرائیل خالقینینگ عیسی مسیحدِن داش دوشِنیندِن، اُزومینگ لَعنِته قالیپ، اُلارینگ خاطیراسینا مسیحدِن داش دوشمَگه-ده راضی بُلاردیم.‏ خودای اُلاری اُغولّیغا آلدی، اُلارا اُز بِییکلیگینی بِلّی اِدیپ، اُلار بیلِن عَهد باغلاشدی.‏ اُل شِریغاتی و عیباداتخاناداقی خیدماتی اُلارا ایناندی، واعدالارینی هِم اُلارا بِردی.‏

⁵ اُلار بِییک آتا-بابالاریمیزینگ نِسلیدیر.‏ عیسی مسیح هِم اینسان طِبیغاتی بُیونچا اُلاردان گِلیپ چیقاندیر.‏ هِمّه زاتدان یُقاری بُلان خودایا اِبِدی بِییکلیک بُلسون!‏ اَمین!‏

⁶ مِن خودای اُز واعداسیندا دورمادی دییِمُق.‏ سِبَبی آصلی اسرائیل بُلانلارینگ باری حاقیقی اسرائیل دَلدیر.‏

⁷ ابراهیمینگ نِسلیندِن بُلانلارینگ-دا باری اُنونگ حاقیقی فِرزِنتلِری دَلدیر.‏ سِبَبی مُقادِّس یازغیلاردا:‏ ‏«‏سِنینگ آدینگ اسحاقینگ نِسلینینگ اوستو بیلِن دُوام اِدِر»‏ دییّپ یازیلاندیر.‏

⁸ دییمِک، ابراهیمینگ نِسلیندِن بُلانلارینگ بارینا خودایینگ فِرزِنتلِری دییّپ بُلماز.‏ دینگه واعدا گُرَه دُغولانلار ابراهیمینگ حاقیقی نِسلی حاساپلانیاندیر.‏

⁹ چونکی:‏ ‏«‏بِلِّنِن واقتدا دُلانیپ گِلِنیمده، سارانینگ بیر اُغلی بُلار»‏ دییلیپ ابراهیما واعدا بِرلیپدی.‏

¹⁰ موندان باشغا-دا، رِبِکانینگ اِکیز فِرزِنتلِری بیر آتادان، یَعنی جِدّیمیز اسحاقدان دُغولوپدی.‏

^11-12 یُنه اِکیز فِرزِنتلِر هِنیز دُغولمانقا، هِنیز یامانلیق یا یاخشیلیق ایش اِتمَکَه، خودای رِبِکا ‏«‏اولوسی کیچیسینه خیدمات اِدِر»‏ دییّپ آیدیپدی.‏ بو سُزلِر سایلانیپ-سِچیلمَنینگ اینسان ایشلِرینه دَل-ده، دینگه چاغیرانا باغلیدیغینی معلیم اِتمِک اوچین آیدیلیپدی.‏

¹³ هاووا، مُقادِّس یازغیلاردا:‏ ‏«‏مِن یعقوبی سُیدوم، اِمّا عیسووی ییگرِندیم»‏ دییّپ یازیلاندیر.‏

¹⁴ مونگا نَمه دییِیلی؟ اُندا خودای عادالاتسیزمی نَمه؟ اِلبِتّه، یُق!‏

¹⁵ سِبَبی اُل موسی:‏ ‏«‏مِن مِرحِمِت اِدِنیمه مِرحِمِت و رِحم-شِپاقات اِدِنیمه رِحم-شِپاقات اِدِرین»‏ دییّپ آیدیپدی.‏

¹⁶ شُنونگ اوچین-ده، سایلانیپ-سِچیلمه آدامینگ ایسلِگینه یا-دا تاقالّاسینا دَل-ده، خودایینگ مِرحِمِتینه باغلیدیر.‏

¹⁷ خودای مُقادِّس یازغیلاردا مصرینگ فِرعونینا:‏ ‏«‏مِن اُز گویجومی سِنده گُرکِزیپ، آدیمی هِمّه دونیَه اِعلان اِتمِک ماقصادی بیلِن سِنی پادیشاه اِتدیم»‏ دییّپ آیدیپدی.‏

¹⁸ شِیلِلیکده، خودای ایسلَنینه مِرحِمِت اِدیَر و ایسلَنینینگ یورِگینی قاتیدیار.‏

¹⁹ اُندا مِندِن:‏ ‏«‏اِگِر شِیله بُلسا، اُندا نَمه اوچین خودای آداملاری کَییَر؟ اُنونگ ایسلِگینه قارشی چیقیپ بیلجِک بارمی؟»‏ دییّپ سُراماغینگ مومکین.‏

²⁰ هِی آدام، خودایا کِپ قایتارار یالی، سِن کیم بُلوپسینگ؟ هی-دَه بِجِرلِن زات اُزونی بِجِرِندِن:‏ ‏«‏نَمه اوچین مِنی بِیله بِجِردینگ؟»‏ دییّپ سُراپ بیلِرمی؟

²¹ اُندا کویزه‌چینینگ شُل بیر پالچیقدان ایسلَن قابینی:‏ بیرینی مُهِم ایشلِر اوچین، بِیلِکیسینی هِر گونکی ایشلِر اوچین بِجِرمِگه حاقی یُقمی نَمه؟

²² خودای اُز قودراتینی گُرکِزمِک اوچین، هِلَکچیلیگه لاییق بُلان آداملارینگ اوستونه غاضابینی دُکوپ بیلیَر.‏ یُنه اُل اُزونی غاضابلاندیریان آداملارا اولی صابیر طاقاتلیق اِدیَندیر!‏

²³ خودای اُزونینگ اُنگدِن بِییکلیک اوچین تاییارلاپ، مِرحِمِت اِدِنلِرینه اُز اولی بِییکلیگینی بیلدیرمِک اوچین شِیله صابیر-طاقاتلی بُلیاندیر.‏

²⁴ خودایینگ شِیله مِرحِمِت اِدِنلِرینینگ و چاغیرانلارینینگ آراسیندا دینگه یَهودیلِر دَل، اُندان باشغا میلِّتلِر هِم باردیر.‏ هاووا، بولارینگ آراسیندا بیز هِم باردیریس.‏

²⁵ خودای هوشَع پیغامبارینگ اوستو بیلِن شِیله دییَّر:‏ ‏«‏مِنینگ خالقیم بُلمادیغا ‏”‏خالقیم“‏ دییِرین، سُیگولی بُلمادیغا ‏”‏سُیگولیم“‏ دییِرین.‏

²⁶ اُلارا:‏ ‏”‏سیز مِنینگ خالقیم دَلسینگیز“‏ دییلِن یِرده، ‏”‏سیز دیری خودایینگ اُغول‍لاریسینگیز“‏ دییلِر.‏»‏

²⁷ اِشعیا پیغامبار هِم اسرائیل خالقی بارادا شونی اِعلان اِتدی:‏ ‏«‏اسرائیل خالقی دِریا کِنارینداقی چَگه یالی کَن بُلسا-دا، دینگه بیرنَچه‌سی نِجات تاپارلار.‏

²⁸ چونکی خودای اُز چیقاران حُکومینی هِمّه یِر یوزونده باسیم و کَمیل یِرینه یِتیرِر.‏»‏

²⁹ اِشعیا پیغامبار هِم اُنگدِن شولاری آیدیپدی:‏ ‏«‏اِگِر حُکومران خودای نِسیل‍لِریمیزی آمان قالدیرمادیق بُلسادی، سُدوم شَهر یالی بُلاردیق و غَموره شَهره مِنگزَردیک.‏»‏

اسرائیل خالقینینگ ایمانسیزلیغی

³⁰ اُندا نَمه دییّپ بیلِریس؟ خودایینگ حوضوریندا آقلانماغینگ ایزینا دوشمِدیک یَهودی دَل‍لِر ایمانینگ اوستو بیلِن آقلانماغا یِتدیلِر.‏

³¹ اسرائیل خالقی بُلسا شِریغاتی بِرجای اِتمِگینگ اوستو بیلِن آقلانماقچی بُلدی، یُنه مونی باشارمادی.‏

³² نَمه اوچین؟ سِبَبی اُلارینگ چالیشمالاری ایمانا دَل-ده، شِریغاتا دایاندی.‏ اُلار ‏«‏بودریمه داشینا»‏ بودریدیلِر.‏

³³ خودای مُقادِّس یازغیلاردا اُلارا بو داش بارادا آیدیپدی:‏ ‏«‏اینه، مِن صَهیوندا بودریمه داشینی، و ییقیان قایا قُییارین؛ و کیم اُنگا بیل باغلاسا هیچ اوتاندیریلماز.‏»‏