رومیلار 6 - مُقادِّس کیتاب1 اُندا نَمه، خودای اُز مِرحِمِتینی بیزه کَندِن-کَن گُرکِزسین دییّپ، گونَه اِدیبِرمِلیمی نَمه؟ 2 اِلبِتّه، یُق! بیز گونَه باباتدا اُلدوک آخیرین. اُنسُنگ نَهیلی گونَه ایچینده یاشاپ بیلِریس؟ 3 یا-دا سیز تَعمید بِریلمِگینگ اوستو بیلِن عیسی مسیح بیلِن بیرلِشیپ، ایندی اُنونگ اُلومینه شِریک بُلیاندیغیمیزی بیلمِیَنگیزمی نَمه؟ 4 هاووا، بیز تَعمید بِریلمِگینگ اوستو بیلِن مسیح بیلِن اُلوپ، جایلاندیق. شُنگا گُرَه-ده، آتانینگ بِییک قودراتینینگ اوستو بیلِن مسیحینگ اُلومدِن دیرِلیشی یالی، بیز هِم تَزه یاشایشا اِیه بُلوپ بیلِریس. 5 اِگِر بیز مسیحینگ اُلومینده اُنونگ بیلِن بیرلِشِن بُلساق، اُندا دیرِلیشینده-ده اُنونگ بیلِن بیرلِشِریس. 6 موندان بِیلَک گونَه‌نینگ قولی بُلماز یالی، بیز کُهنه طِبیغاتیمیزینگ عیسی مسیح بیلِن صلیبه چویلِنِندیگینی بیلیَریس و ایندی گونَه‌نینگ قولّوغیندان بُشاندیق. 7 چونکی اُلِن آدام گونَه‌نینگ ایختییاریندان آزاددیر. 8 اِگِر بیز مسیح بیلِن اُلِن بُلساق، اُندا اُنونگ بیلِن یاشاجاقدیغیمیزا هِم اینانیاریس. 9 بیز مسیحینگ اُلومدِن دیرِلیپ، آصلا اُلمِجِکدیگینی و اُلومینگ ایندی اُنگا اُز حُکومینی یُرِدیپ بیلمِیَندیگینی بیلیَریس. 10 عیسی مسیح اُز اُلومینینگ اوستو بیلِن گونَه‌نینگ ایختییارینی اِبِدیلیک یُق اِتدی و اُنونگ حَضیرکی یاشاییشی بُلسا دینگه خودای اوچیندیر. 11 شُنگا گُرَه-ده، سیز هِم اُزونگیزی گونَه گُرَه اُلی، اِمّا عیسی مسیح بیلِن بیرلِشِندیگینگیز سِبَپلی خودایا گُرَه دیری حاساپلانگ. 12 سیز فانی بِدِنینگیزینگ گونَه‌لی هُوِسلِرینه دوشمِز یالی، گونَه‌نینگ اُز بِدِنینگیزه حُکوم سورمِگینه یُل بِرمَنگ. 13 بِدِن اعضالارینگیزی یامانلیق وِسیله‌سی حُکمونده گونَه‌نینگ ایختییارینا تابشیرمانگ. تِرسینه، اُلومدِن دیرِلِن حُکمونده اُزونگیزی خودایا تابشیرینگ. قُی، بِدِنینگیزینگ هِر بیر اعضاسی خودایینگ دُغرولیق وِسیله‌سی بُلسون. 14 شُندا گونَه سیزه اُز حُکومینی یُریتمِز، سِبَبی سیز شِریغاتینگ ایختییاریندا دَل-ده، مِرحِمِتینگ ایختییارینداسینگیز. تاقوالیغینگ قول‍لاری 15 ایندی نَمه؟ بیز ایندی شِریغاتینگ ایختییاریندا دَل-ده، مِرحِمِتینگ ایختییاریندا دییّپ، گونَه اِدیبِرمِلیمی نَمه؟ اِلبِتّه، یُق! 16 اُندا سیز اُزونگیزی کیمینگ موطیع‌لیغینا تابشیرسانگیز، شُنونگ-دا قولونا اُورولیَندیگینگیزی بیلمِیَنگیزمی نَمه؟ اُلومه اِلتیَن گونَه‌نینگ قولی، یا-دا تاقوالیغا اِلتیَن موطیع‌لیغینگ قولی بُلوپ بیلِرسینگیز. 17 هاووا، سیز گونَه‌نینگ قولودینگیز، یُنه خودایا شوکور، قابول اِدِن تَعلیماتینگیزا یورِکدِن موطیع بُلدونگیز، 18 گونَه‌نینگ ایختییاریندان آزاد اِدیلیپ، تاقوالیغینگ قول‍لاری بُلدونگیز. 19 سیزینگ اینسان ناتووانلیغینگیزی ناظارا آلیپ، سیزه سادا سُزلِر بیلِن آیدیارین: سیز اُزال اُزونگیزی تِلِکه‌لیگه و گیتدیگیچه آرتیان یامانلیغینگ قولّوغینا تابشیریپدینگیز. ایندی بُلسا اُزونگیزی مُقادِّس یاشاییشا اِلتیَن تاقوالیغینگ قولّوغینا تابشیرینگ. 20 سیز گونَه‌نینگ قول‍لاریقانگیز، تاقوالیغی بِرجای اِتمِکدِن آزادّینگیز. 21 اُزال اِدِن ایشلِرینگیزدِن، یَعنی ایندی اوتانیان ایشلِرینگیزدِن نَمه پِیدا گُردونگیز؟ شِیله ایشلِرینگ سُنگی اُلومدیر. 22 یُنه ایندی گونَه‌نینگ ایختییاریندان آزاد اِدیلیپ، خودایینگ قولی بُلدونگیز. مونونگ نِتیجه‌سی مُقادِّس یاشاماقلیق، سُنگی بُلسا اِبِدی یاشاییشدیر. 23 چونکی گونَه‌نینگ جِزاسی اُلوم، اِمّا خودایینگ ناغماتی بُلسا تانگریمیز عیسی مسیحینگ اوستو بیلِن بِریلیَن اِبِدی یاشاییشدیر. |
© Turkmen Truth