رومیلار 3 - مُقادِّس کیتابخودایینگ وِفادارلیغی 1 شِیلِلیکده، یَهودی بُلماغینگ نَمه پِیداسی بار؟ و سونِّتینگ نَمه پِیداسی بار؟ 2 یَهودی بُلماغینگ پِیداسی کَندیر! سِبَبی خودایینگ سُزلِری اَوَّل یَهودیلِره آمانات بِریلدی. 3 اُلارینگ کَبیرلِرینینگ خودایا وِفادار بُلماندیغی هِمّه‌لِره معلیمدیر. یُنه اُلارینگ بیوِفالیغی اُندا خودایینگ وِفادارلیغینی باطیل اِدِرمی نَمه؟ 4 آصلا اِتمِز! هِمّه آداملار یالان آیتسادا خودای هیچ هاچان یالان آیتماز. سِبَبی مُقادِّس یازغیلاردا خودای بارادا: «شُنونگ اوچین سِن کِپلَنینگده حاقلیسینگ، و قاضیلیق اِدِنینگده، اوستون چیقانسینگ» دییّپ یازیلاندیر. 5 یُنه بیزینگ هِمّه دُغری دَلدیگیمیز خودایینگ دُغرولیغینی خاص اَشکَر اِدیَن بُلسا، مونگا نَمه دییِریس؟ اینسانلارینگ شِیله آیدماقلاری مومکین: خودای اُز غاضابینی باشیمیزدان ایندِرِنده، بیز باباتدا عادالاتسیزلیق اِدیَرمیکَه؟ 6 اِلبِتّه، یُق! خودای عادیلدیر. اِگِر شِیله بُلماسا، خودای دونیَه‌نی نَدیپ قاضیلیق اِدیپ بیلِر؟ 7 یُنه مِنینگ یالانلیغیمینگ اوستو بیلِن خودایینگ دُغورلیغی خاص اَشکَر بُلوپ، اُنونگ بِییکلیگی آرتیان بُلسا، مِن بیر گونَه‌کَر حُکمونده مَحکوم اِدیلمِلیمی نَمه؟ 8 یاخشیلیغی آرتدیرماق اوچین، بِلکی، بیز یامانلیق اِتمِلیدیریس؟ اِلبِتّه، یُق! یُنه کَبیر آداملار مِن اِدیل شِیله زاتلاری اُورِدیَرمیشیم دییّپ، مانگا تُهمِت بارینی اوردولار. شِیله تُهمِتچیلِرینگ مَحکوم بُلماغی قاتی عادالاتلیدیر. هِمّه‌لِر گونَه‌کَردیر 9 اُندا نَمه، بیز یَهودیلِر بِیلِکی میلِّتلِردِن قاویمی؟ آصلا قاوی دَلدیریس! یَهودیلِرینگ-ده، باشغا میلِّتلِرینگ-ده گونَه‌نینگ آشاغیندادیغی بارادا اُنگ آیدیپدیق آخیرین. 10 مُقادِّس یازغیلاردا هِم شِیله یازیلاندیر: «دُغری آدام یُق، یُق یِکه بیری-ده. 11 دوشونیَن آصلا یُق، خودایی آغتاریان-دا یُق. 12 اُلارینگ هِمّه‌سی دُغری یُلدان چیقدی، و هِمّه‌سی بیلِلیکده باطیل بُلدی. یاخشیلیق اِدیَن یُق، یُق یِکه بیری-ده. 13 اُلارینگ بُغازی آچیق قابردیر، اُلار آلدایاندیرلار. دیل‍لِرینده ییلان زَهِری باردیر. 14 آغیزلاری قارغیشدان و آجی سُزدِن دُلودیر. 15 آیاقلاری قان دُکمَگه هاولوغیاندیر. 16 یُل‍لاریندا وِیرانچیلیق و بِلالار باردیر. 17 پاراحاتلیق یُلی نَمِدیر، اُلار بیلیَن دَلدیر. 18 اُلار خودایدان آصلا قُرقمایارلار.» 19 یُنه هِر آغیز باغلانیپ، بوتین دونیَه خودایینگ مَحکومییِتینه سِزاوار بُلار یالی، شِریغاتینگ آیدانلارینینگ بارینی شِریغات آشاغینداقیلارا آیدیاندیغینی ایندی بیلیَریس. 20 شِیلِلیکده، شِریغاتینگ تابشیریقلارینی بِرجای اِتمِگینگ اوستو بیلِن خودایینگ حوضوریندا هیچ کیم آقلانیپ بیلمِز. تِرسینه، بو شِریغاتینگ اوستو بیلِن آدام اُزونینگ گونَه‌لیدیگینه قاوی بیلیَر. ایمانینگ اوستو بیلِن آقلانماق 21 یُنه ایندی خودای آقلانمانینگ شِریغاتا دِگیشلی دَل یُلونی گُرکِزدی. بو یُل بارادا تُورات و پیغامبارلارینگ یازغیلاری هِم شاهاتلیق اِدیَر. 22 عیسی مسیحه ایمان گِتیرمِگینگ اوستو بیلِن هِمّه ایماندارلار خودایینگ حوضوریندا آقلانیاندیرلار. شو باباتدا آداملارینگ آراسیندا هیچ تَفاوُتی یُقدور. 23 سِبَبی هِمّه‌لِر گونَه اِدیپ، خودایینگ بِییکلیگینه یِتمِکدِن ماحروم بُلدولار. 24 یُنه اُلار خودایینگ مِرحِمِتینینگ اوستو بیلِن مُفت آقلاندیلار و عیسی مسیحینگ اوستو بیلِن گونَه‌لِرینینگ جِزاسیندان آزاد اِدیلدیلِر. 25-26 خودای اُز عادالاتینی گُرکِزمِک اوچین عیسی مسیحی قربانی حُکمونده ایبِریپ، اُنونگ دُکولِن قانینینگ اوستو بیلِن ایمان گِتیریَنلِری اُزی بیلِن یاراشدیردی. خودای اُزالقی زاماندا اِدیلِن گونَه‌لِردِن گِچدی. ایندی بُلسا عیسی مسیحه ایمان گِتیریَن هِر کِسی آقلایار. و شِیدیپ، اُل اُزونینگ عادالاتلیدیغینی تاصدیق اِدیَر. 27 ایندی قووانماغا باهانامیز قالدیمی نَمه؟ آصلا قالان دَلدیر! بو هایسی شِریغاتا گُرَه شِیله بُلدی؟ تابشیریقلاری بِرجای اِدیلمِلی شِریغاتا گُرَمی؟ یُق، ایمان شِریغاتینا گُرَه شِیله بُلدی. 28 بیز آداملار شِریغاتی بِرجای اِتمِگینگ اوستو بیلِن دَل-ده، ایمانینگ اوستو بیلِن آقلانیاندیغینی بیلیَریس. 29 اُندا خودای دینگه یَهودیلِرینگ خوداییمی؟ اُل باشغا میلِّتلِرینگ هِم خودایی دَلمی نَمه؟ اِلبِتّه، اُل باشغا میلِّتلِرینگ هِم خودایی. 30 سِبَبی یِکه خودای باردیر. اُل سونِّتلیلِری-ده و سونِّتسیزلِری-ده ایمانینگ اوستو بیلِن آقلایاندیر. 31 اُندا نَمه؟ ایمانینگ اوستو بیلِن شِریغاتی باطیل اِدیَریسمی؟ آصلا یُق! دُغورسی، بیز اُنی قاییملایاریس. |
© Turkmen Truth