رومیلار 15 - مُقادِّس کیتابراضیلاشیقلی بُلونگ 1 بیز، ایماندا گویچلیلِر، دینگه اُز ایسلِیَنیمیزینگ ایزیندا بُلمالی دَل-ده، قایتام، ایمانی قاوشاق آداملارینگ اِجیزلیکلِرینی گُتِرمِلی بُلمالیدیریس. 2 بیزینگ هِر بیریمیز اُز هِمسایاسینینگ ایمانینی گویچلِندیرجِک زاتلارینگ فیکرینی اِدیپ، اُنونگ ایسلِگینینگ ایزیندا بُلمالیدیریس. 3 سِبَبی «سانگا تُهمِت اوریانلارینگ کِپی باشیما ایندی» دییّپ یازیلیشی یالی، حتّیٰ عیسی مسیح هِم اُز ایسلِگینینگ ایزیندا بُلان دَلدیر. 4 مُقادِّس یازغیلاردا یازیلانلارینگ باری بیزه تَعلیم بِرمِک اوچین یازیلاندیر. بیز مُقادِّس یازغیلارینگ اوستو بیلِن صابیر-طاقاتلی بُلماغی اُورِنیَریس، اُلارینگ بِریَن تِسِلّیسینینگ اوستو بیلِن اومیدلیدیریس. 5-6 تانگریمیز عیسی مسیحینگ آتاسی و خودایی بیر یورِکدِن و بیر دیلدِن بِییکلِندیریپ بیلِرینگیز یالی، قُی، صابیرلیلیغینگ و تِسِلّینینگ چِشمه‌سی بُلان خودای سیزه آغزیبیرلیک بِرسین. 7 شُنگا گُرَه-ده، خودایی بِییکلِندیرمِک اوچین، عیسی مسیح سیزی نَهیلی قابول اِدِن بُلسا، سیز-ده بیری-بیرینگیزی شُنونگ یالی قابول اِدینگ. 8 چونکی عیسی مسیح خودایینگ صادیقلیغینی آیان اِدیپ، آتا-بابالارا بِرلِن واعدالاری تاصدیقلاماق اوچین یَهودیلِرینگ خیدماتکَری بُلدی. 9 هاووا، عیسی مسیح مونی یَهودی دَل میلِّتلِرینگ هِم خودایی اُنونگ مِرحِمِتی اوچین بِییکلِندیرسینلِر دییّپ اِتدی. چونکی مُقادِّس یازغیلاردا شِیله یازیلاندیر: «مونونگ اوچین میلِّتلِر آراسیندا سانگا اُوگی آیدارین و سِنینگ آدینگا آیدیم آیدارین.» 10 «اِی میلِّتلِر، اُنونگ خالقی بیلِن شاتلانینگ» دییّپ یازیلاندیر. 11 «اِی هِمّه میلِّتلِر، خودایی شوکور اِدینگ! اِی هِمّه خالقلار، اُنگا اُوگی آیدینگ!» دییّپ هِم یازیلاندیر. 12 اِشعیا پیغامبار هِم شِیله دییَّر: «یَسانینگ کُکی گُرونِر، اُل خالقلارا حُکومدار بُلار، میلِّتلِر اُنگا اومید باغلار.» 13 مُقادِّس روحونگ گویجی بیلِن اومیدینگیزینگ آرتماغی اوچین، اومیدینگ چِشمه‌سی بُلان خودای ایمانینگیزینگ اوستو بیلِن، قُی، سیزی شاتلیقدان و پاراحاتلیقدان دُس-دُلی اِتسین. پولسینگ خیدماتی یَهودی دَل‍لِرینگ آراسیندا 14 اِی عزیزلِریم، مِن سیزینگ یاخشیلیقدان دُلودیغینگیزا، هِمّه زادی بیلیَندیگینگیزه و بیری-بیرینگیزه ناصیحات بِرمِگی باشاریاندیغینگیزا قاتی اینانیارین. 15 یُنه شُندا-دا، سیزه کَبیر زاتلاری یادلاتماق اوچین، شو نامه‌مینگ کَه یِرینی باتیرلیق بیلِن یازدیم. چونکی خودای مانگا مِرحِمِت اِدیپ، 16 مِنی عیسی مسیحینگ خیدماتکَری حُکمونده یَهودی دَل‍لِرینگ آراسینا ایبِردی. مِن اُلارا خوش خاباری واغیظ اِدیپ، اُز کاهینلیق بِرگیمی بِرجای اِدیَرین. شِیدیپ، بو میلِّتلِر مُقادِّس روحونگ اوستو بیلِن خودایینگ مُقادِّس اِدیلِن و اُنونگ حالایان صاداقاسی بُلار. 17 شُنگا گُرَه، قووانایسام-دا، دینگه عیسی مسیحینگ اوستو بیلِن خودایا خیدمات اِدیَندیگیمه قووانارین. 18 هاووا، مونی باتیرلیق بیلِن دییَّرین، سِبَبی یَهودی دَل‍لِرینگ خودایا موطیع بُلماغی اوچین، عیسی مسیحینگ اُزومینگ اوستو بیلِن اِدِن ایشلِری بارادا آیدیاندیرین. اُل مونی سُزده و ایشده، 19 عالاماتلار، مُعجِزه‌لِر و مُقادِّس روحونگ گویجینینگ اوستو بیلِن عِمِل اِتدی. شِیلِلیکده، مِن اورشلیمدِن ایلیریکوم وِلایاتینا چِنلی آیلانیپ، عیسی مسیح باراداقی خوش خاباری کَمیل یایراتدیم. 20 مِنینگ گُوون آرزویم باشغا بیرینینگ قوران بُنیادینینگ اوستونده سالمان، مسیحینگ آدی هِنیز اِشیدیلمِدیک یِرلِرده خوش خاباری واغیظ اِتمِکدیر. 21 چونکی مُقادِّس یازغیلاردا شِیله یازیلاندیر: «اُندان خابارسیز بُلانلار اُنی گُرِرلِر، اُل حاقدا اِشیتمِدیکلِر ایندی دوشونِرلِر». 22 اِنچِمه گِزِک نییِتلِندیگیمه باقمازدان، اِدیل شو خیدماتیم سِبَپلی سیزینگ یانینگیزا نَچه گِزِک بَری باریپ-دا بیلمِدیم. پولسینگ روما گیتمِک نییِتی 23 ایندی بُلسا بو تُوِرِکدَکی ایشیمی تاماملادیم. مِن کَن ییل‍لاردان بَری سیزینگ یانینگیزا بارماغی آرزو اِدِندیگیم اوچین، 24 اِسپانیا باریارقام یانینگیزا ساوولیپ گِچِرین. آز سالیملیق بُلسا-دا، سیزینگ بیلِن دیدارلاشانیمدان سُنگ، یُل شاییمی تاییارلاپ، مِنی یُلا سالارسینگیز دییِن اومیدیم بار. 25 حَضیر بُلسا ایماندارلارا خیدمات اِتمِک اوچین اورشلیمه باریارین، 26 سِبَبی مَقدونیه‌دَکی و آخائیه‌دَکی کِلیسالار اورشلیمدَکی کِلیسانینگ مَحتَجلِرینه مادّی کُمِگینی ایبِرمِگی دُغری بیلدیلِر. 27 هاووا، مونی اُلار اِتمِک ایسلِدیلِر، آصلیندا اُلار شِیله-ده اِتمِلیدیلِر. چونکی یَهودی ایماندارلار یَهودی دَل‍لِر بیلِن اُز روحانی بِرِکِتلِرینی پایلاشدیلار. شُنگا گُرَه-ده، یَهودی دَل‍لِر هِم اُز نوبَتیندا اُلارا مادّی مَحتَجلیکلِرینده کُمِک بِرمَگه بِرگیلیدیرلِر. 28 مِن اُلارینگ مادّی کُمِگینی اورشلیمه یِتیریپ، بو ایشی بیتیرِنیمدِن سُنگ، سیزینگ اوستونگیز بیلِن اِسپانیا گیتمِکچی. 29 سیزینگ یانینگیزا بارانیمدا بُلسا، بیلِلیکده گِچیرجِک واقتیمیزی عیسی مسیحینگ بُلدان-بُل بِرِکِت بِرجِگینه اینانیارین. 30 اِی عزیزلِر، تانگریمیز عیسی مسیحینگ و مُقادِّس روحونگ سُیگوسینینگ خاطیراسینا یالباریارین: مِنینگ اوچین دُغا اِتمِک بیلِن، مِنینگ گُرِشیمه قُشولینگ. 31 هاووا، یهودیه‌دَکی ایمانسیزلارینگ مانگا زییان یِتیرمِزلیگی اوچین، شُل یِردَکی ایماندارلار طارافیندان اورشلیمدَکی خیدماتیمینگ قابول اِدیلمِگی اوچین دُغا اِدینگ. 32 اُنسُنگ، خودای یُل بِرسه، یانینگیزا شاتلیق بیلِن باریپ، سیزینگ بیلِن بیرآز دینچ آلارین. 33 پاراحاتلیغینگ خودایی، قُی، سیزینگ بارینگیزا یار بُلسون! اَمین! |
© Turkmen Truth