رومیلار 14 - مُقادِّس کیتاببیری-بیرینگیزی عاییپلامانگ 1 ایماندا قاوشاق بُلان آدامی قابول اِدینگ. یُنه فیکرلِری حاقدا اُنونگ بیلِن جِدِلِّشمَنگ. 2 میثال اوچین، کَبیرلِرینگ ایمانی هِمّه زادی اییمَگه اِجازا بِریَر، اِمّا کَبیرلِرینگ ایمانی قاوشاق دینگه سَبزیجات اییَندیر. 3 ایسلِندیک زادی اییّپ بیلیَن ایماندار اییمِیَن ایمانداری کیچِلتمِسین، و اییمِیَن-ده هِمّه زادی اییَّنی، عاییپلاماسین، سِبَبی خودای اُلاری قابول اِدِندیر. 4 باشغا بیرینینگ خیدماتکَرینی عاییپلار یالی سِن کیم؟ خیدماتکَرینگ اُزونه تابشیرلانلاری بِرجای اِدیپ-اِتمَندیگینی دینگه اُنونگ آقاسی بِلّی اِدیَندیر. یُنه خیدماتکَر اُزونه تابشیرلانلاری بِرجای اِدیپ بیلِر، سِبَبی اُنونگ آقاسی عیسی مسیحدیر، اُل خیدماتکَرینی قوواتلاندیرماغی باشاریاندیر. 5 کَبیر آداملار بیر گونی بِیلِکی گونلِردِن خاص واجیپ حاساپلایاندیر، کَبیرلِری بُلسا هِمّه گونلِری دِنگ گُریَندیر. قُی، موندان بِیلَک هِم هِر کیم اُز اینانجینا گُرَه فیکر اِدیبِرسین. 6 کیم هایسیدیر بیر گونی واجیپ حاساپلایان بُلسا، مونی مسیح اوچین حاساپلایاندیر. کیم هِمّه زادی اییَّن بُلسا، مسیح اوچین اییَّندیر، سِبَبی اُل اییَّن زاتلاری اوچین خودایا شوکور اِدیَندیر. کیم کَبیر زاتلاری اییمِیَن بُلسا، مسیحینگ خاطیراسی اوچین اییمَن، خودایا شوکور اِدیَندیر. 7 هیچ بیریمیز اُزومیز اوچین یاشایان دَلدیریس و هیچ بیریمیز اُزومیز اوچین اُلیَن دَلدیریس. 8 یاشایان بُلساق، مسیح اوچین یاشایاندیریس، اُلیَن بُلساق، مسیح اوچین اُلیَندیریس. شُنگا گُرَه، یاشاساق-دا، اُلسِک-ده، مسیحه دِگیشلیدیریس. 9 سِبَبی مسیح اُلولِرینگ-ده، دیریلِرینگ-ده تانگریسی بُلماق اوچین اُلوپ، دیرِلدی. 10 اُندا نَمه اوچین کَبیرینگیز اُز اِرکِک یا-دا آیال دُغانینگیزی عاییپلایارسینگیز؟ نَمه اوچین کَبیرینگیز اُز اِرکِک یا-دا آیال دُغانینگیزی کیچِلتیَرسینگیز؟ بیزینگ باریمیز خودایینگ قاضیلیق اِتجِک جایینینگ اُوونده دورمالی دَلمی نَمه؟ 11 چونکی مُقادِّس یازغیلاردا شِیله یازیلاندیر: «تانگری: ”اُز یاشاییشیمدان قاسام ایچیَرین، هِر بیر دیز اُوومده اِپلِنِر و هِر بیر دیل مِنی تاصدیقلار“ دییَّر.» 12 هاووا، هِر بیریمیز خودایینگ اُوونده اُزومیز اوچین جُغاپ بِرِریس. 13 شُنگا گُرَه-ده، بیری-بیریمیزی عاییپلامایلینگ. قایتام، اِرکِک یا-دا آیال دُغانیمیزینگ بودوریپ، ییقیلماغینا سِبَپ بُلایجاق حِرِکِتلِردِن ساقلانماغینگ فیکرینی اِدِیلینگ. 14 مِن هیچ بیر زادینگ اُز-اُزوندِن حارام دَلدیگینی بیلیَرین، تانگریم عیسی مسیح هِم مِنی بو باباتدا ایناندیریار. یُنه کیم هایسیدیر بیر زادی حارام حاساپلایان بُلسا، اُنونگ اوچین حارامدیر. 15 اِگِر سِن اِرکِک یا-دا آیال دُغانینگی اِذیِت بِرایجاق زادی اییَّن بُلسانگ، اُندا اُنی سُیمِدیگینگدیر. اییَّن اییمیتینگ سِبَپلی اُز اِرکِک یا-دا آیال دُغانینگ ایمانینی وِیران اِتمه، عیسی مسیح اُنونگ اوغروندا اُلدی آخیرین. 16 شِیلِلیکده، یاخشی حاساپلایان زاتلارینگیز تِلِکه گورّونگلِرینگ دُرِمِگینه سِبَپ بُلماسین. 17 چونکی خودایینگ پادیشاهلیغی اییمِک-ایچمِک دَل-ده، مُقادِّس روحونگ ناغمات بِریَن تاقوالیغی، پاراحاتلیغی و شاتلیغیدیر. 18 کیم عیسی مسیحه شِیله خیدمات اِدیَن بُلسا، خودایی خُشنود اِدیپ، آداملارینگ طارافیندان هِم قابول اِدیلِر. 19 شُنونگ اوچین-ده، پاراحاتلیغا و بیری-بیریمیزی ایماندا گویچلِندیرمَگه یاردیم اِتجِک ایشلِری اِتمَگه چالیشایلینگ. 20 هایسیدیر بیر اییمیت سِبَپلی خودایینگ ایشینی ضایالامایلینگ. هِمّه اییمیتلِر حالالدیر، یُنه باشغا بیرینینگ ایماندا بودریمِگینه سِبَپ بُلیان اییمیتی اییَّن آدام دُغری دَل ایشی اِدیَندیر. 21 اِت اییمِک، شِراب ایچمِک یا-دا هایسیدیر باشغا بیر زات بیرینینگ بودریمِگینه سِبَپ بُلیان بُلسا، اُلاری اِتمِزلیک یاخشیدیر. 22 اییّپ-ایچمِکلیک باراداقی اینانچلارینگی دینگه اُزونگ و خودای بیلسین. اُز اینانجینا گُرَه حِرِکِت اِدیپ، اُز-اُزونی عاییپلامایان آدام خوشواقتدیر. 23 اییّپ-ده، اُز اییَّنی بارادا شِکلِنیَن آدام اِییَم مَحکوم اِدیلِندیر، سِبَبی اُل اُز ایمانینا گُرَه حِرِکِت اِدیَن دَلدیر. ایمانا گُرَه اِدیلمِدیک زات گونَه‌دیر. |
© Turkmen Truth