رومیلار 13 - مُقادِّس کیتاب

دُولِته موطیع‌لیق

^1-2 هِر بیر اینسان اُز اوستوندِن حُکوم سوریَن دُولِته موطیع بُلسون، سِبَبی خودای طارافیندان بُلمادیق دُولِت یُقدور.‏ حُکوم سوریَن دُولِتلِر خودای طارافیندان بِلِّنِندیر.‏ شُنگا گُرَه، دُولِته قارشی چیقیان هِر کِس آصلیندا خودایا قارشی چیقیپ، جِزا دوچار بُلار.‏

³ یاخشی ایش اِدیَنلِر دُولِت یُلباشچیلاریندان قُرقمایارلار.‏ اُلاردان یامان ایش اِدیَنلِر قُرقیاندیرلار.‏ دُولِتدِن قُرقمان یاشاسینگ گِلیَرمی؟ یاخشی ایشلِری اِت، شُندا دُولِت سِنی تعریفلار.‏

⁴ سِبَبی دُولِت یُلباشچیسی سِنینگ یاخشیلیغینگ اوچین خودایینگ خیدماتکَریدیر.‏ یامان ایش اِدیَن بُلسانگ، دُولِت یُلباشچیسیندان قُرق، سِبَبی اُل قیلیجینی یُنه یِره گُتِریَن دَلدیر.‏ اُل خودایینگ خیدماتکَریدیر، یامان ایش اِدیَنی جِزالاندیریپ، خودایینگ غاضابینی اُنونگ اوستوندِن ایندِریَندیر.‏

⁵ شُنگا گُرَه، دینگه جِزا دوچار بُلماق قُرقوسیندان دَل، شِیله بُلسا وِجدانینگیزی پَک ساقلاماق اوچین دُولِته موطیع بُلمالیدیر.‏

⁶ سیز مالییاتلاری هِم شو سِبَبه گُرَه بِریَنسینگیز.‏ سِبَبی دُولِت یُلباشچیلاری اُز وِظیفه‌لِرینی بِرجای اِتمِک بیلِن، خودایا خیدمات اِدیَندیرلِر.‏

⁷ شُنگا گُرَه-ده، هِر کِسه بِریلمِلیسینی:‏ مالییات بُلسا – مالییاتی، گُمرُک بُلسا – گُمرُگی، قُرقی بُلسا – قُرقینی، حُرمات بُلسا – حُرماتی بِرینگ.‏

بیری-بیرینگیزی سُیونگ

⁸ بیری-بیرینگیزه سُیگودِن باشغا بِرگینگیز بُلماسین، سِبَبی باشغا بیرینی سُییَن آدام شِریغاتی بِرجای اِدیَندیر.‏

⁹ چونکی ‏«‏زینا اِتمه، آدام اُلدورمه، اُغورلیق اِتمه، باشغا بیرینینگ زادینا گُز تیکمه»‏ دییِن و باشغا حُکوملِرینگ باری ‏«‏هِمسایانگی اُزونگی سُیشونگ یالی سُی»‏ دییِن حُکومده جِملِنِندیر.‏

¹⁰ هِمسایانی سُییَن آدام اُنگا یامانلیق اِدیَن دَلدیر.‏ شِیدیپ، باشغالاری سُییَن آدام شِریغاتی بِرجای اِدیَندیر.‏

¹¹ موندان باشغا حَضیرکی زامانانینگ نَهیلیدیگینی بیلیَنسینگیز.‏ اوقودان اُیانمالی ساغادیمیز گِلیپ یِتدی، سِبَبی ایندی نِجات تاپماغیمیز ایمان گِتیرِن واقتیمیزدان خاص قُلایدیر.‏

¹² گیجه گِچیپ، گوندیز قُلایلادی.‏ شُنگا گُرَه قارانگقیلیقینگ ایشلِرینی چیقاریپ، نورینگ یاراغلارینی داقینایلینگ.‏

¹³ عایش-عِشرِت، سِرخُشلوق، زیناکَرلیک، آخلاقسیزلیق، باخیلچیلیق و داعوا-جِنجِل اِتمَن، گِلینگ گوندیزدَکیلِر یالی میناسیپ یُلدا اِدِبلی یاشایلینگ.‏

¹⁴ اینسان هُوِسلِرینگیزی نَدیپ راضیلاندیرارقام دییّپ فیکرلِنمِنگ-ده، قایتام، تانگریمیز عیسی مسیحه گِیینینگ.‏