رومیلار 11 - مُقادِّس کیتاباسرائیلینگ قالانلاری 1 ایندی شونی سُرایین: اُندا خودای اُز خالقینی رِد اِتدیمی نَمه؟ اِلبِتّه، یُق! مِن-ده ابراهیمینگ نِسلیندِن، بِنیامین طایفاسیندان بُلان اسرائیل‌لارینگ بیریدیرین. 2 خودای اُزونینگ اُنگدِن سایلاپ-سِچِن خالقینی رِد اِدِنُق. یا-دا مُقادِّس یازغیلاردا اِلیاس پیغامبار بارادا یازیلانلار یادینگیزدا دَلمی؟ اُل خودایا اسرائیل خالقی بارادا عارض اِدیپ، شِیله دییَّر: 3 «اِی خودای، اسرائیل‌لار سِنینگ پیغامبارلارینگی اُلدوریپ، قربانلیق جایلارینگی ییقدیلار، یِکه مِن قالدیم. اُلار جانیما قاصد اِتمِک اوچین، ایندی مِنی آزارلاپ یُرلِر.» 4 شُندا خودای اُنگا نَمه جُغاپ بِردی؟ خودای: «مِن اسرائیل‌دا بَعَل بُتونا عیبادات اِتمِدیک یِدی مونگ آدامی اُزومه آیریپ قُیدوم» دییدی. 5 شُنونگ یالی حَضیرکی واقتدا هِم خودایا صادیق قالانلار بار. اُلار خودایینگ مِرحِمِتینه گُرَه سایلانانلاردیر. 6 مِرحِمِته گُرَه سایلانان بُلسالار، اُندا اینسان ایشلِرینه گُرَه سایلانان دَلدیر. یُغسا مِرحِمِت، مِرحِمِت بُلمازدی. 7 ایندی ماقصات نَمه؟ اسرائیل خالقی آقلانیان یُلونا چالیشسا-دا، اُنگا یِتیپ بیلمِدی. اُنگا دینگه سایلانیپ-سِچیلِنلِر یِتدی، باشغالاری بُلسا اُز قاتی یورِکلِرینینگ ایختییارینا تابشیریلدی. 8 مُقادِّس یازغیلاردا اُلار بارادا شِیله یازیلاندیر: «خودای اُلاری شو گونه چِنلی آغیر اوقا باتیردی، اُلارا گُریَن گُز و اِشیدیَن قولاق بِرمِدی.» 9 داوود هِم اُلار بارادا شِیله دییَّر: «اُلارا اُز ساچاغی قاپان و دوزاق بُلسون، بودریمه داشی و آلجاق جِزاسی بُلسون. 10 قُی، گُزلِری قارانگقیراسین و گُروپ بیلمِسین، بیل‍لِری اِلمیداما بوکولیپ قالسین.» سِپلِنِن شاخالار 11 اُندا شِیله سُراق یوزه چیقیار: شِیله بُلسا یَهودیلِر قایدیپ قالماز یالی بودریدیلِرمی نَمه؟ اِلبِتّه، یُق! یُنه اُلارینگ موطیع‌سیزلیغی بِیلِکی میلِّتلِرینگ هِم نِجات بِرمِگینه سِبَپ بُلدی. بِیلِکی میلِّتلِرینگ نِجات بِریلمِگی یَهودیلِرینگ قایراتلارینی توروزمالیدی. 12 هاووا، یَهودیلِرینگ بو موطیع‌سیزلیغی هِمّه دونیَه‌نینگ نِجات بِریلمِگینه سِبَپ بُلدی. اُلارینگ بو موطیع‌سیزلیغی باشغا میلِّتلِر اوچین پِیدالی بُلدی. اِگِر اُلارینگ موطیع‌سیزلیغی شِیله آزادلیق گِتیرِن بُلسا، اُندا اسرائیل خودایا دُلاناندا، بو آزادلیقا گُر باق نَهیلی بُلار! 13 ایندی بُلسا سیزه، یَعنی یَهودی دَل‍لِره یوزلِنیَرین. خودای مِنی رِسولّیغا بِلَّپ، سیزه خوش خاباری واغیظ اِتمَگه ایبِردی و مِن مونگا قووانیارین. 14 شونونگ بیلِن بیرلیکده سیزینگ اوستونگیز بیلِن اُز ایلدِشلِریمینگ قایراتلارینی توروزیپ، یَهودیلِردِن کَبیرینینگ نِجات تاپماغینا یاردیم اِدِرین دییِن اومیدیم بار. 15 چونکی اُلارینگ رِد اِدیلیشی بِیلِکی خالقلارینگ یاراشیغی بُلسا، اُندا یَهودیلِری قایتادان قابول اِتمِگینگ نِتیجه‌سی نَمه بُلار؟ اُلومدِن یاشاییش بُلار! 16 سِبَبی خودایا هُدورلِنِن چُرِک مُقادِّس بُلسا، شُل خامیردان بیشیرِلِن بِیلِکی چُرِکلِر هِم مُقادِّسدیر. اِگِر باغینگ کُکی مُقادِّس بُلسا، اُنونگ شاخالاری هِم مُقادِّسدیر. 17 هاووا، باغینگ کَبیر شاخالاری کِسیلیپ، وَحشی زِیتونینگ شاخاسی بُلان سیز اُنگا سِپلِندینگیز. سیز ساقلانیپ یِتیشدیرِلِن زِیتونینگ کُکونینگ شیرِسینه شِریک بُلدونگیز. 18 شُنگا گُرَه-ده، اُنونگ کِسیلِن شاخالارینینگ اُوونده قابارمانگ، سِبَبی سیز کُکی دَل-ده، کُک سیزی ساقلایاندیر. 19 اُندا-دا سیزینگ: «شاخالار بیزینگ سِپلِنمِگیمیز اوچین کِسیلدی» دییمِگینگیز مومکین. 20 سیز حاقلی، یُنه اُلار ایمانسیزلیغی سِبَپلی کِسیلدی. سیز بُلسا ایمانینگ اوستو بیلِن دورسونگیز. شُنگا گُرَه، مَغرور بُلمانگ، قایتام قُرقونگ. 21 سِبَبی خودای باغینگ طِبیغی شاخالارینی رِحم اِتمِدیک بُلسا، اُندا سیزی، یَعنی سِپلِنِن وَحشی شاخالاری آصلا-دا رِحم اِتمِز. 22 خودایینگ رِحمدارلیغی و قاتیلیغی بارادا گُز اُوونه گِتیرینگ. اُل موطیع‌سیزلار اوچین قاتیدیر، سیزینگ اوچین بُلسا رِحمداردیر. اِگِر سیز اُنونگ رِحمدارلیغینا قاییم دورسونگیز، اُل هِم سیزه رِحمدار بُلار. اِگِر دورماسینگیز، سیز هِم کِسیلیپ زینگیلارسینگیز. 23 یُنه یُلدان چیقانلار هِم ایمانسیزلیقلاریندان اِل چِکسِلِر، تَزه‌دِن سِپلِنِرلِر. سِبَبی خودای اُلاری باغا سِپلِمِگی باشاریاندیر. 24 اِگِر سیز وَحشی زِیتون باغیندان کِسیلیپ، اُز طِبیغی بُلشونگیزا باقمازدان، ساقلانیپ یِتیشدیرِلِن زِیتونا سِپلِنِن بُلسانگیز، اُندا آصلی بو باغدان بُلان شاخالار اُز زِیتونینا خاص آنگسات سِپلِنِر! تامام اسرائیل خالقی نِجات بِریلِر 25 اِی عزیزلِر، سیز مَغرور بُلماز یالی، شو سیردان خابارلی بُلماغینگیزی ایسلِیَرین. خودای باشغا میلِّتلِردِن سایلانلارینینگ بارینی نِجات بِریَنچَه، کَبیر اسرائیل‌لارینگ یورِگی یومشاماز. 26-27 چونکی تامام اسرائیل خالقی اِدیل شِیله نِجات بِریلِر. مُقادِّس یازغیلاردا هِم شِیله یازیلاندیر: «مِن یعقوب نِسلینینگ گونَه‌لِرینی باغیشلانیمدا، اُلار بیلِن شِیله عَهد باغلاشارین: صَهیوندان نِجات بِریَنچی گِلِر، اُل یعقوب نِسلینینگ ایمانسیزلیغینی آیرار.» 28 اسرائیل خالقی خوش خاباری قابول اِتمَن، خودایا دوشمان بُلدی. بو بُلسا باشغا میلِّتلِر، یَعنی سیزینگ اوچین پِیدالی بُلدی. یُنه اسرائیل خالقی شُندا-دا خودایینگ سایلاپ-سِچِن خالقیدیر. خودای اُلاری آتا-بابالارینینگ حاقی اوچین سُییَندیر. 29 چونکی خودای بِرِن ناغماتلارینی و اُز چاغیریشینی ایزینا قایتاریپ آلمایار. 30-31 سیز هِم بیرواقتلار خودایا موطیع دَلدینگیز. اِمّا اسرائیل‌لارینگ موطیع‌سیزلیغینینگ اوستو بیلِن خودایینگ سیزه مِرحِمِت اِدیشی یالی، اُلار-دا سیزه اِدیلِن مِرحِمِته یِتجِک بُلوپ، خودایا موطیع بُلمایارلار. 32 چونکی خودای هِمّه‌لِره مِرحِمِت اِتمِک اوچین، هِمّه‌لِری موطیع‌سیزلیغدا باغلادی. 33 خودایینگ بایلیغی، حِکمِتی و بیلیمی ناقادار چونگّوردیر! اُنونگ ماقصاتلارینی کیم دوشونیپ بیلِر؟ اُنونگ یُل‍لارینا کیم عاقیل یِتیریپ بیلِر؟ 34 خودایینگ فیکرینی کیم بیلدی؟ کیم اُنگا ماصلاحات بِریپ بیلدی؟ 35 خودای بِرگیلی بُلار یالی، کیم اُنگا زات بِردی؟ 36 چونکی هِمّه بارلیق خودایدان بُلوپ، اُنونگ اوستو بیلِن و اُنونگ اوچیندیر! اُنگا اِبِدی بِییکلیک بُلسون! اَمین! |
© Turkmen Truth