رومیلار 10 - مُقادِّس کیتاب1 اِی عزیزلِر، اسرائیل خالقینینگ نِجات تاپماغی مِنینگ یورِگیمینگ ایسلِگیدیر. مِن بو بارادا خودایا دُغا اِدیَرین. 2 چونکی خودایینگ تابشیریقلارینی بِرجای اِتمِکده اُلارینگ دییسِنگ ایخلاصلیدیغینا اُزوم دیری شاهات. اِمّا شِیله ایخلاصلی بُلسالار-دا، اُلارینگ خودای حاقدا حاقیقی بیلیمی یُق. 3 اُلار خودایینگ آقلایان یُلونا دوشونمِدیلِر. شُنونگ اوچین-ده، شِریغاتی بِرجای اِتمِگینگ اوستو بیلِن آقلانجاق بُلوپ، خودایینگ آقلایان یُلونا موطیع بُلمادیلار. 4 عیسی مسیح بُلسا بو شِریغاتینگ ماقصادینی یِرینه یِتیردی. شُنونگ اوچین-ده، اُنگا ایمان گِتیریَن هِر کِس خودای طارافیندان آقلاناندیر. 5 شِریغاتا دایانیپ آقلانیان یُلی بارادا موسی شِیله یازیار: «اُنی بِرجای اِدیَن آدام شُنونگ اوستو بیلِن یاشار.» 6-7 اِمّا ایمانا دایانیپ آقلانیان یُلی بارادا بُلسا، اُل شِیله دییَّر: «”کیم آسمانا چیقار؟“ (یَعنی مسیحی آسماندان ایندیرمِک اوچین)، یا-دا ”کیم دویپسوز قوییا اینِر؟“ (یَعنی مسیحی دیرِلتمِک اوچین)، دییّپ، اُز-اُزونگدِن سُراما.» 8 شِیله-ده، ایمانا دایانیپ آقلانیان یُلی: «بو سُز سانگا یاقیندیر، اُل سِنینگ آغزینگدا و یورِگینگدِدیر» دییَّر. بو سُز بُلسا بیزینگ واغیظ اِدیَن ایمانیمیز حاقدَکی خاباردیر. 9 شُنگا گُرَه-ده، اِگِر سِن آغزینگ بیلِن عیسی مسیحینگ تانگریدیغینی ایقرار اِتسِنگ و خودای اُنی اُلومدِن دیرِلدِنینه یورِکدِن ایمان گِتیرسِنگ، نِجات تاپارسینگ. 10 چونکی تویس یورِکدِن ایمان گِتیریَن آدام آقلانار و آغزی بیلِن ایقرار اِدیَن هِم نِجات تاپار. 11 مُقادِّس یازغیلار هِم: «کیم اُنگا بیل باغلاسا هیچ اوتاندیریلماز» دییَّندیر. 12 بو یَهودیلِره-ده، یَهودی دَل‍لِره-ده دِگیشلیدیر. سِبَبی تانگری هِمّه‌لِرینگ تانگریسیدیر، اُل اُزونی چاغیریانلارینگ بارینا بِرِکِت بِریَندیر. 13 چونکی: «تانگرینینگ آدینی چاغیران هِر بیر اینسان نِجات تاپار». 14 یُنه تانگری عیسی ایمان گِتیرمِدیک آداملار، اُنی نَدیپ چاغیرسین؟ اُل بارادا اِشیتمِدیک آداملار، اُنگا نَدیپ ایمان گِتیرسین؟ مسیحینگ خوش خاباری بارادا واغیظ اِدیلمِسه، آداملار نَدیپ اِشیتسین؟ 15 اِگِر واغیظچیلار ایبِریلمِسه، نَدیپ واغیظ اِدیلسین؟ واغیظچیلار بارادا مُقادِّس یازغیلاردا شِیله یازیلاندیر: «خوش خاباری اِعلان اِدیَنینگ آیاقلاری نه گِلشیکلیدیر!» 16 یُنه بو خوش خاباری هِمّه‌لِر قابول اِتمِدی. اِشعیا پیغامبار هِم بو بارادا: «اِی خودای، بیزینگ خاباریمیزا کیم ایناندی؟» دییّپ سُرایار. 17 شونلوقدا، ایمان اِشیتمِکدِن، هاووا، عیسی مسیح حاقدَکی خوش خاباری اِشیتمِکدِن دُرِیَندیر. 18 یُنه مِن شونی سُراماقچی: اُندا اُلار خوش خاباری اِشیتمِدیمی نَمه؟ اِلبِتّه اِشیتدی، سِبَبی مُقادِّس یازغیلاردا شِیله یازیلان: «هِمّه یِر یوزونه یایراندیر اُلارینگ سِسی، دونیَه‌نینگ دُرت بورجونا یِتیندیر، اُلارینگ سُزلِری.» 19 ایندی شونی هِم سُرایین: اسرائیل خالقی دوشونمِدیمیکَه؟ اِلبِتّه دوشوندی، اَوَّل موسی اُلارا: «مِن هِم میلِّت حاساپلانمادیقلارینگ اوستو بیلِن سِنی قایراتلاندیرارین، و دوشونمِیَن بیر خالقینگ اوستو بیلِن اُلارینگ قاهارینی گِتیرِرین» دییّپدی. 20 سُنگرا اِشعیا پیغامبار هِم: «مِنی آغتارمایانلار مِنی تاپدیلار و مِنی سُرامایانلارا اُزومی آیان اِتدیم» دییّپ، خودایینگ سُزلِرینی باتیرلیق بیلِن معلیم اِدیَر. 21 اسرائیل خالقی حاقدا بُلسا خودای: «مِن فیتنه‌چی و موطیع‌سیز خالقا هِر زامان اِل‍لِریمی اوزادیپ اُتیرین» دییّپ آیدیار. |
© Turkmen Truth