رومیلار 1 - مُقادِّس کیتاب

سالاملار

¹ عیسی مسیحینگ خیدماتکَری و رِسولّیغا چاغیریلیپ، خودایینگ خوش خابارینی واغیظ اِتمَگه سایلانان مِن پولسدِن دُغایی سالام!‏

² خودای مُقادِّس یازغیلاردا اُز پیغامبارلارینینگ اوستو بیلِن بو خوش خاباری واعدا بِردی.‏

³ بو خوش خابار خودایینگ اُغلی عیسی مسیح بارادادیر.‏ اُل اینسان طِبیغاتینا گُرَه داوودینگ نِسلیندِندی.‏

⁴ خودای تانگریمیز عیسی مسیحی اُلومدِن دیرِلدیپ، اُنی مُقادِّس روحدان دُلدوردی و شِیدیپ، اُنونگ خودایینگ قودراتلی اُغلودیغی تاصدیقلاندی.‏

⁵ خودای بیزه عیسی مسیحینگ اوستو بیلِن مِرحِمِت اِدیپ، رِسولّیغا سایلادی.‏ اُل مونی هِمّه میلِّتلِرینگ خودایا ایمان گِتیریپ، اُنگا موطیع بُلماغی، عیسی مسیحینگ آدینینگ بِییکلِنمِگی اوچین اِتدی.‏

⁶ سیز هِم عیسی مسیحه باغلی بُلماغا چاغیریلان شُل میلِّتلِرینگ آراسینداسینگیز.‏

⁷ مِن شو نامه‌می سیزه رومداقی ایماندارلارا یازیارین.‏ خودای سیزینگ هِمَّه‌نگیزی سُیوپ، سیزی اُزونینگ خالقی بُلماغا چاغیردی.‏ قُی، آتامیز خودایینگ و تانگریمیز عیسی مسیحینگ مِرحِمِتی و پاراحاتلیغی سیزه بُلسون!‏

پولس رومداقی ایماندارلاری گُرمِگی کویسِیَر

⁸ اَوَّل، عیسی مسیحینگ اوستو بیلِن هِمَّه‌نگیز اوچین خوداییما شوکور اِدیَرین، سِبَبی ایمانینگیز باراداقی خابار تامام دونیَه یایرادی.‏

⁹ مِن خودایینگ اُغلی باراداقی خوش خاباری یایرادیپ، خودایا جان-تِندِن خیدمات اِدیَرین، سیزینگ اوچین گیجه-گوندیز دُغا اِدیَرین.‏ مونگا خودایینگ اِدیل اُزی شاهاتدیر.‏

¹⁰ خودایینگ ایسلِگینه گُرَه سیزینگ یانینگیزا باسیم باریپ بیلِر یالی، اُندان بیر یُل آچماغینی دُغالاریمدا هِمیشه سُرایارین.‏

¹¹ سیزی خاص گُرِسیم گِلیَر، ایمانینگیزی قاییملاجاق روحانی ناغماتلاری سیزینگ بیلِن پایلاشاسیم گِلیَر.‏

¹² مِن ایمانیمیزینگ اوستو بیلِن بیری-بیریمیزدِن تِسِلّی آلماغمیزی ایسلِیَرین.‏

¹³ اِی عزیزلِر، شونی بیلمِگینگیزی ایسلِیَرین:‏ مِن بِیلِکی میلِّتلِرینگ آراسیندا بُلشی یالی، سیزینگ هِم آرانگیزداقی خیدماتیمینگ حاصیلینی گُرِسیم گِلدی.‏ شُنگا گُرَه-ده، یانینگیزا بارجاق بُلوپ، بیرنَچه گِزِک نییِتلِشدیم، اِمّا هِر گِزِک بیر پَسگِلچیلیک بُلدی.‏

¹⁴ مِن مِدِنییِتلی یا-دا مِدِنییِتسیز، سُوادلی یا-دا سُوادسیز آداملارا قاراز، هِمّه‌لِره خوش خاباری واغیظ اِتمَگه بِرگیلیدیرین.‏

¹⁵ شُنونگ اوچین-ده، سیزه، رومداقیلارا هِم خوش خاباری واغیظ اِتمِگی کویسِیَرین.‏

¹⁶ مِن خوش خاباردان اوتانمایارین، سِبَبی اُل خودایینگ گویجودیر.‏ خودای بو خوش خابارینگ اوستو بیلِن هِر بیر ایمان گِتیرِنی:‏ اَوَّل یَهودیلِری، سُنگرا یَهودی دَل‍لِری نِجات بِریَر.‏

¹⁷ خوش خابار خودایینگ آداملاری نَدیپ تاقوالی حاساپلایاندیغینی آیان اِدیَر.‏ اُل ایمان گِتیریَنلِری، هاووا، دینگه ایمان گِتیریَنلِری آقلایار.‏ چونکی مُقادِّس یازغیلاردا:‏ ‏«‏تاقوالی آدام ایمان بیلِن یاشار»‏ دییّپ یازیلاندیر.‏

خودایینگ قاهار-غاضابی

¹⁸ یامانلیقلاری بیلِن حاقیقاتی پَسگِل بِریَن آداملارینگ خودایسیزلیغینا و یامانلیغینا قارشی خودای اُز قاهار-غاضابینی آسماندان آیان اِدیَر.‏

¹⁹ بو آداملارا خودای بارادا بیلیپ بُلیان زاتلار معلیمدیر، سِبَبی خودایینگ اُزی بولاری اُلارا مِسه-معلیم اِتدی.‏

²⁰ خودایینگ گُزه گُرونمِیَن صیفاتلاری، یَعنی اِبِدی قودراتی و حاق خودایدیغی دونیَه بِجِرلِندِن بَری اُنونگ یارادان زاتلاریندان مِسه-معلیم گُرونیَندیر.‏ شُنگا گُرَه-ده، آداملارینگ:‏ ‏«‏خودای بارادا بیلمِیَریس»‏ دییمَگه هیچ باهاناسی یُقدور.‏

²¹ اُلار خودای بارادا بیلسِلِر-ده، اُنی خودای حُکمونده بِییکلِندیرمِدیلِر، اُنگا شوکور اِتمِدیلِر.‏ تِرسینه، بُش فیکرلِره قُشولیپ یورِکلِرینی قارانگقیلیق دُلدوردی.‏

²² اُلار اُزلِرینی عاقیلّی حاساپلاپ، آحماق بُلدولار،

²³ باقی خودایا عیبادات اِتمَن، فانی آداملارینگ، قوشلارینگ، حایوانلارینگ و خازاندالارینگ صوراتینداقی بُتلارا عیبادات اِتدیلِر.‏

²⁴ شُنونگ اوچین خودای اُلاری یورِکلِرینینگ گونَه‌لی هُوِسلِرینینگ اِدِن-اِتمیشلِرینه تابشیردی.‏ شو سِبَپدِن اُلار بیری-بیرینینگ بِدِنلِرینی آبرایسیز ایشلِری بیلِن بیحُرمات اِتدیلِر.‏

²⁵ اُلار خودای باراداقی حاقیقاتی یالان زاتلار بیلِن چالیشدیلار.‏ یارادانا دَل-ده، یارادیلان زاتلارا عیبادات و خیدمات اِتدیلِر.‏ اِمّا اِبِدی بِییکلیک دینگه یارادانا میناسیپدیر.‏ اَمین!‏

²⁶ هاووا، اُلار حاقیقاتی رِد اِدِنسُنگلار، خودای اُلاری اُزلِرینینگ اوتانچلی هُوِسلِرینه تابشیردی.‏ حتّیٰ آیال‍لاری هِم طِبیغی قاتناشیغینی رِد اِتدیلِر.‏ اُلار طِبیغی بُلمادیق قاتناشیقلارا یوز اوروپ، بیری-بیرلِری بیلِن یاتیپ توردیلار.‏

²⁷ شُنونگ یالی، اِرکِکلِر هِم آیال بیلِن طِبیغی قاتناشیغینی تِرک اِدیپ، بیری-بیرینه بُلان هُوِس اُدینا یاندیلار.‏ اِرکِکلِر اِرکِکلِر بیلِن رُسوالیق ایشلِری اِدیپ، اُز تاقصیرلارینا لاییق جِزا آلدیلار.‏

²⁸ بو آداملار خودایی تانیمالیدیر دییّپ اَهمییِت بِرمِدیلِر.‏ شُنگا گُرَه-ده، خودای اُلاری آخلاقسیز فیکرلِرینه تابشیریپ، اِدیلمِسیز زاتلاری اِتمِکلِرینه یُل بِردی.‏

²⁹ اُلارینگ قالبی هِر هیلی یامانلیقدان، تِلِکه‌لیکدِن، آچگُزلیکدِن و آخلاقسیزلیقدان دُلیدیر.‏ اُلار باخیل، قاتل، داعواچی، آلدییانچی و بِدنییِتدیر.‏ اُلار کِپچی،

³⁰ تُهمِتچی، خودایی ییگرِنیَرلِر، مَغرور، قابارجانگ بُلوپ و اُزونی اُویَنلِر، یامانلیق اِتمِگینگ هِر هیلی یُل‍لارینی تاپیارلار، اِنه-آتالارینا قولاق آسمایارلار.‏

³¹ اُلار دوشومسیز، بیوِفا، شِپاقاتسیز و رِحمسیزدیر.‏

³² اُلار خودایینگ عادالاتلی حُکمونه گُرَه شِیله ایشلِری اِدیَنلِرینگ اُلومه سِزاواردیغینی بیلسِلِر-ده، اُز اِدیَن ایشلِرینده اُوه گیدیَرلِر.‏ مونونگ بیلِن قاناغات اِتمَن، باشغالارینگ هِم شِیله اِتمِگینی دُغری بیلیَرلِر.‏