آیانلیق 9 - مُقادِّس کیتاب1 بَشینجی پِریشده سورنایینی چالدی. مِن آسماندان یِره قاچان بیر ییلدیز گُردوم. ییلدیزا دویپسوز قوییسینینگ آچاری بِریلدی. 2 اُل دویپسوز قوییسینی آچاندا، اُندان اولی کورَه‌نینگ توسِّسی یالی توسّه تاولانیپ چیقدی. بو توسِّدِن یانگا گون و آی قارانگقی بُلدی. 3 توسِّدِن یِر یوزونه چِکیرتگِلِر یاغدی. اُلارا یِر یوزوندَکی عقرَبلارینگقی یالی گویچ بِرلیپدی. 4 اُلارا یِر یوزونینگ اُتونا و اُسوملیگینه یا-دا باغینا دَل-ده، دینگه مانگلاییندا خودایینگ مُهوری بُلمادیق آداملارا زییان یِتیرمِگی آیتدی. 5 اُلارا بو آداملاری اُلدورمَن، دینگه بَش آیلاپ عاذاپلاماغا ایختییار بِریلدی. چِکیرتگِلِرینگ بِریَن اِذیِتی عقرَبلارینگ آدامی چاقاندا بِریَن عاذابینا مِنگزِیَردی. 6 آداملار شُل گونلِرده اُلومی آغتارارلار، یُنه اُنی تاپمازلار. اُلومی ایسلَرلِر، یُنه اُلوم اُلاردان قاچار. 7 چِکیرتگِلِرینگ گُرنوشی جِنگه گیتجِک آتلارینگقا مِنگزِیَردی. اُلارینگ باشیندا قیزیلدان تاجا مِنگزِش زات باردی و یوزلِری آدامینگقا مِنگزِیَردی. 8 ساچلاری آیالینگ ساچی و دیشلِری-ده آرسلانینگقی یالیدی. 9 اُلارینگ قورساغی دِمیر زِره یالیدی و قاناتلارینینگ سِسی کَنسانلی جِنگه باریان آرابالارینینگ شاقیردیشینا مِنگزِیَردی. 10 عقرَبلارینگقی یالی قوروقلاری و نیشلِری باردی. آداملارا بَش آیلاپ عاذاپ چِکدیرمِک اوچین بِرلِن گویچلِری قوروقلاریندادی. 11 اُلارا دویپسوز قوییسینینگ پِریشده‌سی پادیشاهلیق اِدیَردی. بو پِریشدَه‌نینگ آدی عِبرانیچا اَبَدون و یونانیچا بُلسا آپولیوندیر. 12 بیرینجی «وای» گِچدی، اُنونگ ایزیندان یِنه-ده ایکی «وای» گِلیَر. 13 آلتینجی پِریشده سورنایینی چالدی. مِن خودایینگ اُووندَکی قیزیلدان بِجِرلِن قربانلیق جایینینگ دُرت شاخیندان چیقیان سِسی اِشیتدیم. 14 بو سِس اِلی سورنایلی آلتینجی پِریشدَه: «بِییک فُرات آرناسینینگ کِناریندا دانگیلیپ دوران دُرت پِریشدَه‌نی بُشات» دییدی. 15 دُرت پِریشده بُشادیلدی. اُلار شُل ساغات، شُل گون، شُل آی و شُل ییل اوچین آداملارینگ اوچدِن بیرینی اُلدورمَگه تاییارلانیپدی. 16 آتلی قُشونلارینینگ سانی مونگلِرچه مونگدی، اُلارینگ سانینی مِنینگ اُزوم اِشیتدیم. 17 رویامدا گُرِن آتلاریمینگ و اُلارینگ اوستوندَکیلِرینگ گُرنوشی شِیلِدی: آتلیلارینگ زِره‌لِری اُد یالی قُیی-قیزیل، قُیی-گُک و کوکورت یالی ساریدی. آتلارینگ کِلّه‌سی آرسلانینگقا مِنگزِیَردی و آغیزلاریندان اُد، توسّه و کوکورت چیقیاردی. 18 آداملارینگ اوچدِن بیری اُلارینگ آغزیندان چیقیان اُددان، توسِّدِن و کوکورتدِن، شو اوچ بِلادان اُلدی. 19 آتلارینگ گویجی هِم آغیزلاریندا، هِم قوروقلاریندادی. اُلارینگ قوروقلاری ییلانا مِنگزِیَردی، سِبَبی اُلارینگ اوجی ییلانینگ کِلّه‌سی یالیدی و اُلار شُنونگ بیلِن آداملارا زییان یِتیریَردیلِر. 20 بو بِلالاردان آمان قالان آداملار شُندا-دا اِل‍لِرینینگ یامان ایشلِریندِن دَنیپ، توبا گِلمِدیلِر. اُلار جینلارا، قیزیلدان، کوموشدِن، میسدِن، داشدان و آغاچدان بِجِرلیپ، اِشیتمِیَن، گُرمِیَن و یُریمِیَن بُتلارا سِجده اِتمِکلِرینی بِس اِتمِدیلِر. 21 اُلار آدام اُلدورمِکلِریندِن، جادوگَرلیکلِریندِن، زینادان و اُغورلیقلاریندان دَنمِدیلِر و توبا گِلمِدیلِر. |
© Turkmen Truth