آیانلیق 5 - مُقادِّس کیتاب

طومار و قوزی

¹ مِن تاختدا اُتورانینگ ساغ اِلینده بیر طومار گُردوم.‏ اُنونگ ایکی طارافیندا-دا یازغیلار بُلوپ، یِدی مُهور بیلِن مُهورلِنِندی.‏

² سُنگرا گویچلی بیر پِریشدَه‌نی گُردوم.‏ اُل قاتی سِسی بیلِن:‏ ‏«‏طومارینگ مُهورلِرینی دُومَگه و اُنی آچماغا کیم میناسیپ؟»‏ دییّپ سُرایاردی.‏

³ اِمّا طوماری آچیپ، اُنگا سِراِدیپ بیلجِک آدام نه آسماندا، نه یِرده، نه-ده یِرینگ آشاغیندا باردی.‏

⁴ مِن آجی گُزیاش دُکوپ آغلادیم، سِبَبی طوماری آچیپ، اُنونگ ایچینه گُزلِمَگه میناسیپ هیچ کیم تاپیلمادی.‏

⁵ شُندا یاشولیلارینگ بیری مانگا شِیله دییدی:‏ ‏«‏آغلاما!‏ اینه، یهودا طایفاسیندان، داوودینگ کُکوندِن بُلان آرسلان اوستون چیقدی.‏ اُل یِدی مُهور بیلِن مُهورلِنِن طوماری آچماغی باشارار.‏»‏

⁶ اُنسُنگ مِن داماغی چالنان قوزا مِنگزِیَن بیر قوزینی گُردوم.‏ قوزی تاختینگ اُرتاسیندا، دُرت جانلی جاندار بیلِن یاشولیلارینگ آراسیندا دوردی.‏ قوزینینگ یِدی شاخی بیلِن یِدی گُزی باردی.‏ بو گُزلِر خودایینگ هِمّه دونیَه ایبِریلِن یِدی روحودیر.‏

⁷ قوزی گِلدی-ده، تاختدا اُتورانینگ ساغ اِلیندِن طوماری آلدی.‏

⁸ اُل طوماری اِلینه آلاندا، دُرت جانلی جاندار و ییگریمی دُرت یاشولی قوزینینگ اُوونده یوزین ییقیلیپ، اُنگا سِجده اِتدیلِر.‏ اُلارینگ هِر بیرینینگ اِلینده قاقیلیپ چالینیان سازی و بُخوردان دُلی بُلان قیزیلدان کَسه باردی.‏ بو بُخورلار خودایینگ خالقینینگ دُغالاریدیر.‏

⁹ اُلار تَزه بیر آیدیم آیدیاردیلار:‏ ‏«‏سِن میناسیپسینگ بو طوماری آلماغا، هِم-ده اُنونگ مُهورلِرینی دُومَگه.‏ چونکی داماغینگ چالنیپ و اُز قانینگ بیلِن، هِر طایفادان، هِر دیلدِن، هِر خالقدان و هِر میلِّتدِن خودای اوچین آداملاری ساتین آلانسینگ.‏

¹⁰ سِن اُلاردان پادیشاهلیق یاراتدینگ، خوداییمیزا خیدمات اِتمِک اوچین اُلاری کاهین بِلِّدینگ، اُلار یِر یوزونده پادیشاهلیق اِدِرلِر!‏»‏

¹¹ اُنسُنگ مِن تاختینگ، جانلی جاندارلارینگ هِم-ده یاشولیلارینگ تُوِرِگیندَکی پِریشده‌لِری گُردوم و اُلارینگ سِسلِرینی اِشیتدیم.‏ اُلار سانامادان کَندی، مونگلِرچه مونگدی و اُن مونگلِرچه اُن مونگدی.‏

¹² اُلار قاتی سِس بیلِن:‏ ‏«‏داماغی چالنان قوزی گویجی هِم-ده بایلیغی، حِکمِتی هِم قودراتی، حُرماتی هِم بِییکلیگی و اُوگولِری آلماغا میناسیپدیر!‏»‏ دییَّردیلِر.‏

¹³ اُنسُنگ آسمانداقی و یِر یوزوندَکی، یِر آشاغینداقی و دِریاداقی هِر بیر مَخلوقینگ و دونیَه‌دَکی بار زادینگ:‏ ‏«‏تاختدا اُتورانا و قوزا اِبِدی اُوگولِر بُلسون!‏ حُرمات، بِییکلیک و قودرات اُلارا اِبِدی بُلسون!‏»‏ دییَّنلِرینی اِشیتدیم.‏

¹⁴ دُرت جانلی جاندار ‏«‏اَمین!‏»‏ دییدیلِر و یاشولیلار یوزین ییقیلیپ، سِجده اِتدیلِر.‏