آیانلیق 22 - مُقادِّس کیتابیاشاییش آرنا سووی 1 سُنگرا پِریشده مانگا بُلور یالی ییلدارایان آرنانی گُرکِزدی. بو آرنادا یاشاییش سووی آقیاردی و خودایینگ و قوزینینگ تاختیندان چیقیپ دُکولیَردی. 2 شَهرینگ آصلی خییابانینگ اُرتاسیندا، آرنانینگ ایکی طارافیندا یاشاییش باغی اُسوپ اُتیردی. بو باغ هِر آیدا میوه بِریپ، ییلدا اُن ایکی گِزِک حاصیل گِتیریَردی و باغینگ یاپراقلاری میلِّتلِر اوچین شِفادی. 3 بو شَهرده ایندی آصلا لَعنِت بُلماز. خودایینگ و قوزینینگ تاختی بو شَهرده بُلار، و خودایینگ خیدماتکَرلِری اُنگا خیدمات اِدِرلِر. 4 اُلار خودایینگ یوزونی گُرِرلِر و مانگلایلاریندا اُنونگ آدی بُلار. 5 شَهرده گیجه آصلا بُلماز، و نه چیراغینگ ایشیغی، نه-ده گونونگ نوری گِرِک بُلار، سِبَبی تانگری خودای اُلارا یاغتیلیق سِچِر. و اُلار اِبِدیلیک پادیشاهلیق اِدِرلِر. عیسی مسیح گِلیَر 6 پِریشده مانگا شِیله دییدی: «بو سُزلِر دُغری و چیندیر! نِبیلِرینی ایلهاملاندیریان تانگری خودای تیز واقتدا بُلجاق واقالاری اُز خیدماتکَرلِرینه گُرکِزمِک اوچین پِریشده‌سینی یُلّادی.» 7 عیسی شِیله دییَّر، «اینه، مِن باسیم گِلِرین! بو کیتابینگ نبوّتلیق سُزلِرینی یورِگینده ساقلایان آدام خوشواقتدیر!» 8 مِن یوحنا بولاری گُردوم و اِشیتدیم. بولاری اِشیدِنیمدِن و گُرِنیمدِن سُنگ، بو واقالاری مانگا گُرکِزِن پِریشدَه سِجده اِتمِکچی بُلوپ، اُنونگ آیاقلارینا ییقیلدیم. 9 اِمّا پِریشده مانگا شِیله دییدی: «یُق، مانگا سِجده اِتمه! مِن هِم سِن یالی، نِبی دُغانلارینگ و بو کیتابینگ نبوّتلیق سُزلِرینی یورِگینده ساقلایانلار یالی خودایینگ بیر خیدماتکَریدیرین. دینگه خودایا سِجده اِت!» 10 اُنسُنگ اُل مانگا شِیله دییدی: «بو کیتابینگ نبوّتلیق سُزلِرینی گوزگین ساقلاما! چونکی اُلارینگ بِرجای بُلمالی واقتی قُلایدیر. 11 قُی، یامانلیق اِدیَن آدام یِنه یامانلیق اِتسین، تِلِکه‌لیک اِدیَن یِنه تِلِکه‌لیک اِتسین. دُغری ایش اِدیَن یِنه دُغرولیق اِتسین و مُقادِّس آدام اُز مُقادِّسلیگینی ساقلاسین.» 12 «اینه، مِن باسیم گِلِرین! هِر کِسه اِدِن ایشلِرینه گُرَه بِرجِک پاداشیم یانیمدادیر! 13 مِن ”اَلِف“ و ”یا“، باشلایانچی و قوتاریانچی، اَوَّلکی و آخیرقیدیرین. 14 اُز لِباسلارینی یوویانلار خوشواقتدیر! اُلارینگ یاشاییش باغینینگ میوه‌سیندِن اییمَگه و شَهرینگ دِروِزه‌سیندِن گیرمَگه حاقلاری باردیر. 15 اِمّا ”ایتلِر“، جادوگَرلِر، زیناکَرلِر، قاتل‍لار، بُت‌پَرَستلِر، یالانی سُیوپ و اُنی عِمِل اِدیَنلِر شَهرینگ داشیندا قالارلار. 16 مِن، عیسی مسیح، بو زاتلاری کِلیسالارا اِعلان اِتمِک اوچین اُز پِریشدَه‌می سیزه یُلّادیم. مِن داوودینگ کُکوندِن، یَعنی اُنونگ نِسلیندِن بُلان و دانگینگ پارلایان ییلدیزیدیرین!» 17 مُقادِّس روح و گِلین «گِل!» دییَّرلِر. اِشیدیَن هِر کِس هِم «گِل!» دییسین. سوسان گِلسین. کیم اُز تِشنه‌لیگینی دُیدورماق ایسلِسه، قُی، یاشاییش سوووندان مُفت ایچسین! 18 بو کیتابینگ نبوّتلیق سُزلِرینی اِشیدیَن هِر کِسه بیلدیریَرین: هِر کیم بو سُزلِره بیر زات قُشسا، خودای هِم اُنونگ جِزاسینا بو کیتاپدا آیدیلان بِلالاری باشینا گِتیرِر. 19 و هِر کیم بو کیتابینگ نبوّتلیق سُزلِریندِن بیر زادی آییرسا، خودای هِم بو کیتاپدا آیدیلیان یاشاییش باغینینگ میوه‌سیندِن اییمِک و مُقادِّس شَهرده یاشاماق حاقیندان اُنی ماحروم اِدِر. 20 بو واقالارینگ شاهادی: «هاووا، مِن باسیم گِلِرین!» دییَّر. اَمین. اِی تانگریمیز عیسی، گِل! 21 قُی، تانگریمیز عیسانینگ مِرحِمِتی هِمَّه‌نگیز بیلِن بُلسون! اَمین. |
© Turkmen Truth