آیانلیق 21 - مُقادِّس کیتابتَزه اورشلیم 1 اُنسُنگ مِن بیر تَزه آسمان بیلِن بیر تَزه یِر گُردوم. چونکی اُوالقی آسمان و یِر آیریلیپدی. ایندی هیچ بیر دِریا هِم یُقدی. 2 مِن مُقادِّس شَهری یَعنی تَزه اورشلیمی گُردوم. اُل آسماندان، خودایینگ حوضوریندان اینیپ گِلیَردی. تَزه اورشلیم اُیلِنیَن ییگیت اوچین آوادانلانیپ گِینیپ گِلیَن گِلنه مِنگزِیَردی. 3 مِن تاختدان قاتی بیر سِسینگ شِیله دییِنینی اِشیتدیم: «خودایینگ مِسکِنی ایندی اینسانلارینگ آراسیندادیر! اُل ایندی اینسانلارینگ آراسیندا مِسکِن توتار. اُلار اُنونگ خالقی بُلارلار و اُل هِم اُلار بیلِن بُلوپ، اُلارینگ خودایی بُلار. 4 اُل اُز خالقینینگ گُزلِرینینگ هِر بیر گُزیاشینی سوپورِر. ایندی نه اُلوم، نه-ده یاس، نه ناله، نه-ده دِرد بُلار. چونکی اُوالقی زاتلار گِچیپ گیتدی.» 5 تاختدا اُتوران: «اینه، هِمّه زادی تَزه‌لِیَرین» دییدی. سُنگرا مانگا: «بولاری یاز، سِبَبی بو سُزلِر دُغری و چیندیر» دییدی. 6 اُل مانگا یِنه-ده شِیله دییدی: «تاماملاندی. ”اَلِف“ و ”یا“، اَوَّلکی و آخیرقی مِندیرین. مِن سوسییانا یاشاییش چِشمه‌سیندِن مُفت ایچیرِرین. 7 یِنگِن آدام، اینه، بولارینگ بارینی میراث آلار. مِن اُنونگ خودایی بُلارین و اُل هِم مِنینگ فِرزِندیم بُلار. 8 اِمّا قُرقیانلارینگ، ایمانسیزلارینگ، فاسیقلارینگ، قاتل‍لارینگ، زیناکَرلِرینگ، جادوگَرلِرینگ، بُت‌پَرَستلِرینگ و هِمّه یالانچیلارینگ جایلاری یانیپ دوران کوکورت و اُدلی دِریاچا بُلار. ایکینجی اُلوم، اینه، بودور.» 9 سُنگرا آخیرقی یِدی بِلا بیلِن دُلدوریلان یِدی کَسه‌لی یِدی پِریشدَه‌نینگ بیری مِنینگ یانیما گِلیپ: «گِل، مِن سانگا گِلنی، یَعنی قوزینینگ آیالینی گُرکِزِرین» دییدی. 10 پِریشده مِنی مُقادِّس روحونگ اوستو بیلِن بیر اولی و بِییک داغا چیقاردی. اُل یِردِن مانگا آسماندان، خودایینگ حوضوریندان اینیپ گِلیَن مُقادِّس شَهری، یَعنی اورشلیمی گُرکِزدی. 11 اُل خودایینگ بِییکلیگِندِن دُلوپ، بیر خاص جواهیر یالی، و ییلدیراپ دوران یَشم یالی پارلایاردی. 12 شَهرینگ اولی و بِییک دیوارلاری و اُن ایکی دِروِزه‌سی باردی. هِر دِروِزَنینگ آغزیندا بیر پِریشده باردی. دِروِزه‌لِره اسرائیل خالقینینگ اُن ایکی طایفاسینینگ آدی یازیلاندیر. 13 گوندُغاردا اوچ دِروِزه، قایرادا اوچ دِروِزه، ایلِریده اوچ دِروِزه، گونباتاردا اوچ دِروِزه باردی. 14 شَهرینگ دیواری اُن ایکی بُنیادینگ اوستونده بینا اِدیلیپدی، اُلارا قوزینینگ اُن ایکی رِسولینینگ آدی یازیلاندیر. 15 مِنینگ بیلِن کِپلِشِن پِریشدَه‌نینگ اِلینده شَهری و اُنونگ دِروِزه‌لِرینی و دیوارینی اُلچَر یالی قیزیلدان اُلچِگی باردی. 16 شَهر دُرتبورچلوق شِکیلینده بُلوپ، اُنونگ بُیی بیلِن اینی دِنگدی. پِریشده شَهری اُلچِدی. شَهرینگ بُیی ایکی مونگ ایکی یوز کیلومِتر بُلوپ چیقدی. اُنونگ اینی و بِییکلیگی هِم بُیی یالیدی. 17 پِریشده شَهرینگ دیوارینی-دا اُلچِدی. دیوارینگ بِییکلیگی آلتمیش بَش مِتر چیقدی. پِریشده بولاری اُلچَنده، اینسانلارینگ قولّانیان اُلچِگینی قولّاندی. 18 دیوار یَشم داشیندان سالنیپدی، و شَهرینگ اُزی بُلسا ییلدیراپ دوران شویشه یالی آراسّا قیزیلدان بینا اِدیلیپدی. 19 شَهر دیوارینینگ بُنیادلاری هِر هیلی جواهیرلار بیلِن آوادانلاندی. بیرینجی بُنیادی یَشم داشی بیلِن آوادانلاندی، ایکینجیسی لاجِوَرد داشی، اوچونجیسی آق عقیق، دُردونجیسی زُمُرّد، 20 بَشینجیسی دیم قیزیل عقیق، آلتینجیسی اُدلی عقیق، یِدینجیسی زِبِرجِد داش، سِکیزینجیسی گُک یاقوت، دُقوزینجیسی ساری یاقوت، اُنونجیسی یاشیل عقیق، اُنبیرینجیسی فیروزه داش، اُن ایکینجیسی بَنَفش یاقوتلی داشلاری بیلِن آوادانلاندی. 21 اُن ایکی دِروِزه اُن ایکی مُرواریددان، یَعنی هِر دِروِزه بیتِو بیر مُرواریددان بِجِریلدی. شَهرینگ آصلی خییابانی آراسّا قیزیلدان بُلوپ، شویشه یالی ییلدیرایاردی. 22 مِن بو شَهرده عیباداتخانا گُرمِدیم. چونکی قودراتلی-گویچلی خودای و قوزی شَهرینگ عیباداتخاناسیدیر. 23 شَهری یاغتیلاندیرماق اوچین گون یا-دا آی گِرِک دَل. چونکی شَهری خودایینگ بِییکلیگی یاغتیلاندیریار و قوزی هِم اُنونگ چیراغیدیر. 24 خالقلار بو شَهرینگ نوریندا گِزِرلِر. دونیَه‌نینگ پادیشاهلاری اُنگا اُز هِمّه بِییکلیگینی گِتیرِرلِر. 25 شَهرینگ دِروِزه‌لِری گونوزینده آچیق بُلار، اُلار قولپلانماز، سِبَبی اُل یِرده گیجه بُلماز. 26 میلِّتلِر بو شَهره اُز بِییکلیگینی و حُرماتینی گِتیرِرلِر. 27 بو شَهرَه هیچ بیر نِجیس زات و تِلِکه ایش اِدیَنلِرینگ و آلدایانلارینگ هیچ بیری گیرمِز. اُنگا دینگه قوزینینگ یاشاییش دِفتِرینده آدلاری یازیلانلار گیرِرلِر. |
© Turkmen Truth