آیانلیق 18 - مُقادِّس کیتاببابِل وِیران اِدیلیَر 1 موندان سُنگ مِن آسماندان اینیپ گِلیَن باشغا بیر پِریشدَه‌نی گُردوم. اُنونگ اولی ایختییاری بُلوپ، بِییکلیگی هِمّه دونیَه نور سِچدی. 2 پِریشده قاتی قیغیریپ، شِیله دییدی: «ییقیلدی! بِییک بابِل ییقیلدی! اُل جینلارینگ مِسکِنینه و هِمّه آرخو-جینلارینگ جایینا اُورولدی و هِرهیلی حارام و نِجیس قوشلارینگ پِناه‌سینا اُورولدی. 3 چونکی هِمّه میلِّتلِر اُنونگ زینا هُوِسلِرینینگ شِرابینی ایچدیلِر. دونیَه‌نینگ پادیشاهلاری اُنونگ بیلِن زینا اِتدیلِر و تاجِرلِری اُنونگ هایباتلی عایش-عِشرِتیندِن باییدیلار.» 4 اُنسُنگ مِن آسماندان باشغا بیر سِس اِشیتدیم. اُل شِیله دییَّردی: «اِی خالقیم! اُنونگ گونَه‌لِرینه شِریک بُلماز یالی، اُنونگ بِلالارینا دوشمِز یالی، اُل یِردِن چیق. 5 چونکی اُنونگ گونَه‌لِری بِیگِلیپ آسمانا یِتدی، خودای اُنونگ جِنایاتلارینی یادلادی. 6 اُل سیزه نَمه اِدِن بُلسا، سیز هِم اُنگا شُنی اِدینگ. اُنونگ اِدِنلِرینی ایکی بارابار اِدیپ قایتارینگ! اُنگا ایکی بارابار گویچلی قاریلان شِرابدان ایچیرینگ! 7 اُل اُزونی نَچه بِییکلیدیپ و عایش-عِشرِت چِکِن بُلسا، شُنچا-دا اُنگا عاذاپ و غام-غوصّا بِرینگ! چونکی اُل اُز یورِگینده شِیله دییَّر: ”مِن مِلِکه کیمین اُتیرین، دول دَلدیرین و آصلا یاس توتمارین“. 8 شُنگا گُرَه، بیر گونونگ ایچینده اُلوم، یاس، آچلیق بِلاسی باشینا اینِر، اُنی اُد یاقیپ کُیدورِر. چونکی اُنی مَحکوم اِدِن تانگری خودای گویچلیدیر! 9 اُنونگ بیلِن زینا اِدِن، عایش-عِشرِتینه شِریک بُلان دونیَه‌نینگ پادیشاهلاری اُنونگ یانیاندیغینینگ توسِّسینی گُرِنلِرینده، یاس توتوپ، آغلارلار. 10 اُلار اُنونگ چِکیَن عاذاپلاریندان قُرقیپ، اوزاقدا دوران یِرلِریندِن شِیله دییِرلِر: ”وای وای حالینگا! اِی اولی شَهر، اِی گویچلی شَهر، اِی بابِل! سِن بیر ساغادینگ ایچینده وِیران بُلدینگ!“ 11 «دونیَه تاجِرلِری اُنونگ اوچین یاس توتوپ، آغلارلار، سِبَبی ایندی اُلارینگ ساتجاقلارینی ساتین آلجاق یُق. 12 قیزیل، کومشی، جواهیرلاری، مُرواریدلاری، نِفیس کِتِن و ارغوانلی پارچالاری، یوپِگی و قُیی-قیزیل پارچالاری، خوشبو ایسلی آغاجی، عاجدان، باهالی آغاچلاردان، میسدِن، دِمیردِن و مِرمِردِن بِجِرلِن هِرهیلی ساتجاقلاری، 13 دارچین و اَدویه‌لِری، خوشبو بُخوری، عاطیر و مُری، شِرابی، زِیتون یاغینی، کِپِکسیز اونی و بوغدایی، سیغیر و قُیونلاری، آتلار و آرابالاری، و حتّیٰ آداملاری ساتین آلجاق ایندی یُق. 14 تاجِرلِر شِیله دییِرلِر: ”گُونونگ ایسلِیَن میوه‌لِری ییتیپ گیتدی. بایلیغینگ و گُز گُرنوشینی بولاشدیریجی عجاییپلیغینگ غاییپ بُلدی، اُلار ایندی آصلا دُلانماز“. 15 بابِلده اُز ساتجاقلارینی ساتیپ پولّانان تاجِرلِر شَهرینگ عاذاپلاریندان قُرقارلار، اوزاقدا دوران یِرلِریندِن یاس توتوپ، آغلارلار. 16 اُلار آغلاشیپ، شِیله دییِرلِر: ”وای وای حالینگا! اِی اولی شَهر. اُل نِفیس کِتِن، ارغوان و قُیی-قیزیل پارچالار گِینِردی، قیزیل، جواهیرلار و مُرواریدلار بیلِن آوادانلاناردی. 17 شِیله خاص اولی بایلیق بیر ساغادینگ ایچینده وِیران بُلدی!“ «هِمّه کِشتیچیلِر، کِشتی بیلِن گیدیَنلِر، هِمّه دِریاچیلار و دِریادان اُز گونونی گِچیریَنلِرینگ باری اوزاقدا دوروپ، 18 شَهرینگ یانیاندیغینینگ توسِّسینی گُرِنلِرینده: ”بو اولی شَهره تای گِلجِک شَهر بارمیدی نَمه؟“ دییِرلِر. 19 اُلار باشلاریندان قوم دُکوپ، آغلارلار، یاس توتوپ، سِس اِدیپ آغلاشارلار: ”وای وای حالینگا، اِی اولی شَهر! دِریادا کِشتیلِری بُلانلارینگ باری بو شَهرینگ بایلیغینینگ اوستو بیلِن باییپدی. ایندی بُلسا اُل بیر ساغاتدا وِیران اِدیلدی!“ 20 «اِی آسمانلار، اُنگا شاتلانینگ! اِی خودایینگ خالقی، رِسول‍لار و نِبیلِر، شاتلانینگ! بابِلینگ سیزه اِدِنلِری اوچین خودای اُنی جِزالاندیردی.» 21 سُنگرا بیر گویچلی پِریشده اولی دِگیرمِن داشی یالی داشی قالدیریپ، اُنی دِریا زینگیپ، شِیله دییدی: «اولی بابِل شَهری، اینه، شِیله گویچ بیلِن زینگلار! اُل ایندی آصلا تاپیلماز! 22 چالیان سازچیلارینگ و آیدیمچیلارینگ، تویتوکچیلِرینگ و سورنایچیلارینگ سِسی ایندی سِنده چیقماز. ایندی سِندِن صِنعِتچیلِر-ده و هیچ صِنعِت-ده تاپیلماز. و ایندی سِندِن دِگیرمِنینگ سِسی آصلا اِشیدیلمِز. 23 چیراغلارینگ نوری ایندی یاغتیلیق بِرمِز، اُیلِنیَن ییگیت و گِلنینگ سِسی ایندی سِندِن اِشیدیلمِز. سِنینگ تاجِرلِرینگ دونیَه‌نینگ بِییک آداملاریدی و سِنینگ جادوگَرلیگینگ هِمّه میلِّتلِری یُلدان چیقاردی. 24 نِبیلِرینگ و خودایینگ خالقینینگ و دونیَه‌ده اُلدوریلِنلِرینگ هِمّه‌سینینگ قانی سِنده تاپیلدی.» |
© Turkmen Truth