آیانلیق 17 - مُقادِّس کیتاب

آیال و جاناوار

¹ اِلی کَسه‌لی یِدی پِریشدَه‌نینگ بیری گِلیپ، مانگا شِیله دییدی:‏ ‏«‏گِل، مِن سانگا کَن سولارینگ یوزونده اُتوران اولی فاحیشه‌نینگ جِزاسینی گُرکِزِیین.‏

² دونیَه‌نینگ پادیشاهلاری اُنونگ بیلِن زینا اِتدیلِر و یِرینگ یاشایانی اُنونگ زینالیق شِرابیندان ایچیپ-ایچیپ سِرخُش بُلدی.‏»‏

³ اُنسُنگ پِریشده مِنی مُقادِّس روحونگ اوستو بیلِن بیابانا اَکیتدی.‏ مِن اُل یِرده قُیی-قیزیل جاناوارینگ اوستونده اُتوران بیر آیالی گُردوم.‏ بو جاناوارینگ هِمّه بِدِنی خودایا دیل یِتیریَن آدلاردان دُلودی، اُنونگ یِدی کِلّه‌سی و اُن شاخی باردی.‏

⁴ آیال بُلسا قُیی-قیزیل و ارغوانی لِباسلارا گِینیپ، قیزیل، جواهیر و مُرواریدلار بیلِن آوادانلانیپدی.‏ اُنونگ اِلینده تِلِکه زاتلاردان و زیناکَرلیگینینگ نِجیسلیگیندِن دُلی قیزیلدان کَسه باردی.‏

⁵ بو آیالینگ مانگلاییندا ‏«‏بِییک بابِل، دونیَه فاحیشه‌لِرینینگ و تِلِکه‌لیکلِرینینگ اِنه‌سی»‏ دییِن سیرلی آد یازیلیپدی.‏

⁶ اُنسُنگ آیال خودایینگ خالقینینگ و عیسانینگ شاهاتلارینینگ قانینی ایچیپ، سِرخُش بُلانینی گُردوم.‏ مونی گُروپ، قاتی حایران قالدیم.‏

⁷ پِریشده مانگا شِیله دییدی:‏ ‏«‏نَمه حایران قالیارسینگ؟ آیالینگ و اُنونگ گُتِرلیپ باریان یِدی کِلّه‌سی و اُن شاخلی جاناوارینگ سیرینی مِن سانگا آیدایین.‏

⁸ سِنینگ گُرِن جاناوارینگ بیرواقتلار باردی، یُنه ایندی یُق، و هِلَک بُلمازیندان اُنگ دویپسوز قوییدان چیقار.‏ یِر یوزونینگ یاشایانی، یَعنی دونیَه یارادیلانی بَری آدلاری یاشاییش دِفتِرینه یازیلمادیقلار بو جاناواری گُرِنلِرینده حایران قالارلار، سِبَبی اُل بیرواقتلار باردی، ایندی یُق، یُنه یِنه گِلِر.‏

⁹ بولارا دوشونمِک اوچین عاقیل و حِکمِت گِرِک.‏ یِدی کِلّه – بو آیالینگ اُتوران یِدی داغینی و یِدی پادیشاهی بیلدیردیَر.‏

¹⁰ اُلارینگ بَشیسی هِلَک بُلدی، بیری پادیشاهلیق اِدیَر، یِنه-ده بیری هِنیز گِلِنُق.‏ یُنه اُل گِلِنده، اوزاق پادیشاهلیق اِتمِز.‏

¹¹ بیرواقتلار بار بُلوپ، ایندی یُق جاناوار بُلسا سِکیزینجی پادیشاهدیر.‏ شُل بیر واقتینگ اُزونده-ده اُل یِدی پادیشاهلارینگ بیری بُلوپ، هِلَک بُلماغا باریاندیر.‏

¹² سِنینگ گُرِن اُن شاخینگ بُلسا هِنیز پادیشاهلیغا یِتمِدیک اُن پادیشاهدیر.‏ یُنه اُلار جاناوار بیلِن بیله بیر ساغات پادیشاهلیق اِتمَگه ایختییار آلارلار.‏

¹³ بو اُن پادیشاهینگ ماقصادی بیر بُلوپ، اُلار اُز گویچلِرینی و ایختییارلارینی جاناوارا بِرِرلِر.‏

¹⁴ اُلار قوزی بیلِن اوروشارلار، یُنه قوزی اُلاری یِنگِر.‏ چونکی قوزی تانگریلارینگ تانگریسی و پادیشاهلارینگ پادیشاهسیدیر.‏ اُنونگ چاغیرانلاری، سایلانلاری و وِفادارلاری اُنونگ بیلِن بُلارلار.‏»‏

¹⁵ پِریشده مانگا یِنه شِیله دییدی:‏ ‏«‏شو گُرِن سولارینگ، یَعنی فاحیشه‌نینگ اُتوران سولاری، میلِّتلِر و جِماغاتلار و خالقلار و دیل‍لِری بیلدیردیَندیر.‏

¹⁶ سِنینگ گُرِن اُن شاخینگ و جاناوار بو آیالی دوشمان گُرِرلِر.‏ اُلار اُنی دارغادیپ، یالانگاچلارلار و اُنونگ اِتینی اییّپ، اُنی اُدلارلار.‏

¹⁷ چونکی خودای اُز ماقصادینی یِرینه یِتیرمِک ایسلِگینی اُلارینگ یورِگینه قویدی.‏ شونلوقدا، اُلار خودایینگ سُزلِری بِرجای بُلیانچا، اُزلِرینینگ حُکومرانلیق ایختییارینی جاناوارا بِرمَگه بیلِلیکده راضی بُلارلار.‏

¹⁸ گُرِن آیالینگ بُلسا یِر یوزونینگ پادیشاهلارینا حُکومرانلیق اِدیَن اولی شَهردیر!‏»‏