آیانلیق 15 - مُقادِّس کیتابیِدی پِریشده و یِدی بِلا 1 شُندان سُنگ مِن آسماندا یِنه بیر اولی و عجاییپ عالامات گُردوم: آسماندا یِدی پِریشده، هِر بیرینینگ اِلینده بُلسا بیر بِلا باردی. بو بِلالار آخیرقی بِلالار بُلوپ، اُلار خودایینگ غاضابینی تاماملایاردیلار. 2 مِن اُد بیلِن قاریشیق، سویشه‌دِن بِجِرلِن دِریا یالی بیر زات گُردوم. اُنونگ اوستونده جاناواری، اُنونگ مُجِسِّمه‌سینی و آدینی بیلدیردیَن سانی یِنگِلِر دوردی. اُلارینگ اِل‍لِرینده خودایینگ بِرِن چالینیان سازلاری باردی. 3 اُلار خودایینگ خیدماتکَری موسانینگ و قوزینینگ آیدیمینی آیدیاردیلار: «اِی تانگری، قودراتلی-گویچلی خودای! سِنینگ ایشلِرینگ اولی و عجاییپدیر. اِی میلِّتلِرینگ پادیشاهسی! سِنینگ یُل‍لارینگ دُغری و حاقدیر. 4 اِی خودای، سِندِن قُرقماجاق و آدینی بِییکلِندیرمِجِک بارمی نَمه؟ چونکی مُقادِّس یِکِجه سِنسینگ! هِمّه میلِّتلِر حوضورینگا گِلِرلِر و سانگا عیبادات اِدِرلِر. چونکی عادالاتلی ایشلِرینگ آیان بُلدی.» 5 موندان سُنگ آسمانداقی عیباداتخانانینگ، یَعنی شاهاتلیق چادیرینینگ آچیلانینی گُردوم. 6 عیباداتخانادان یِدی بِلانی گِتیریَن یِدی پِریشده چیقدی. اُلارینگ اِگنینده تَمیز، دیم-آق کِتِن لِباسلار، قورساغلاریندا بُلسا قیزیلدان قورساغباغی باردی. 7 دُرت جانلی جاندارلارینگ بیری یِدی پِریشدَه اِبِدی یاشایان خودایینگ غاضابیندان دُلی یِدی قیزیلدان کَسه بِردی. 8 عیباداتخانا خودایینگ بِییکلیگینینگ و قودراتینینگ توسِّسیندِن دُلدی. یِدی پِریشدَه‌نینگ یِدی بِلاسی تاماملانیانچا، هیچ کیم عیباداتخانا گیریپ بیلمِدی. |
© Turkmen Truth