فیلیپیلِر 4 - مُقادِّس کیتابناصیحاتلار 1 شونلوقدا، اِی سُیگولی دُستلاریم، مسیحده قاییم دورونگ! مِن قارا گُزونگیزه زاردیرین. عزیزلِریم، سیز مِنینگ شاتلیغیم و باشیمینگ تاجیسینگیز. 2 مِن اِفودیِدِن و سینتیخیدِن یالباریارین: مسیحده ایلالاشیقلی بُلونگ. 3 اِی مِنینگ وِفالی یُلداشیم، سانگا-دا یالباریارین: بو آیال‍لارا کُمِک اِت. اُلار مِن، اِکلِمِنتُس و یاشاییش دِفتِرینه آدلاری یازیلان بِیلِکی هِمکَرلِریم بیلِن بیرلیکده خوش خاباری یایراتماقدا تاقالّا بیلِن ایشلِدیلِر. 4 مسیحده هِمیشه شاتلانینگ. یِنه-ده قایتالایارین: شاتلانینگ! 5 قُی، سیزینگ میلاییملیغینگیز هِمّه‌لِره بِلّی بُلسون. مسیح یاقیندیر. 6 هیچ زادی قایغی اِتمَنگ. هِر زاتدا، خودایا شوکور اِدیپ، هِر بیر یاغدایداقی مَحتَجلیکلِرینگیزی اُنگا دُغالاردا آیدینگ. 7 شُندا خودایینگ پاراحاتلیغی یورِکلِرینگیزی و فیکرلِرینگیزی عیسی مسیحینگ اوستو بیلِن قُرار. بو پاراحاتلیق اینسان دوشونجِسیندِن خاص بِییکدیر. 8 نِتیجه‌ده، اِی عزیزلِر، حاقیقی، حُرماتا میناسیپ، دُغری، پَک، قاوی گُرونیَن و تعریفلانیان نَمه بار بُلسا، شُل بارادا فیکرلِنینگ. هاووا، یاخشی و اُومِگه میناسیپ زاتلار بارادا فیکرلِنینگ. 9 مِندِن اُورِنِن، قابول اِدِن، اِشیدِن و گُرِن زاتلارینگیزی عِمِل اِدینگ. شُندا پاراحاتلیق بِریَن خودای سیزینگ بیلِن بُلار. سُوغاتلار اوچین مینِّتدارلیق 10 آخیرسُنگی مِن بارادا یِنه-ده فیکر اِدیپ باشلانینگیزا مسیحده خاص شاتلاندیم. سیز اُزال هِم فیکر اِدیَردینگیز، یُنه مونی گُرکِزمَگه مومکینچیلیگینگیز یُقدی. 11 مِن مونی نَمِدیر بیر زادا مَحتَج بُلانیم اوچین آیتمایارین. سِبَبی هِر یاغدایدا باریما راضی بُلماغی اُورِنِندیرین. 12 مِن مَحتَجلیگینگ-ده، بُلچیلیغینگ-دا نَمِدیگینی بیلیَرین. مِن دُقلوقدا یا آچلیقدا، بایلیقدا یا قاریبلیقدا یاشاسام-دا، قاراز، هِر یاغدایدا و هِر حالدا قاناغاتلی بُلماغینگ یُلونی اُورِندیم. 13 مانگا قووات بِریَن عیسی مسیحده هِر زادی اِتمِگی باشاریارین. 14 هِر هیلی بُلسا-دا، مِنینگ قینچیلیقلاریما شِریک بُلوپ، یاقشیلیق اِتدینگیز. 15 اِی فیلیپیلِر! مِن مَقدونیه‌دِن چیقیپ قایدیپ، خوش خاباری اَوَّل واغیظ اِدیپ باشلان زامانیمدا سیزینگ کِلیسانگیزدان باشغا کِلیسا مانگا مادّی کُمِگینی بِرِن دَلدیر. مونی سیزینگ اُزونگیز-ده بیلیَنسینگیز. 16 سیز حتّیٰ تِسالونیکی شَهرینده مَحتَجلیک چِکِن زامانیمدا-دا مانگا نَچه گِزِک کُمِگینگیزی یِتیریپدینگیز. 17 مِن مونی سُوغاتلارینگیزا حانتاما بُلانیم اوچین آیتمایارین. مِن سیزینگ پِیدانگیزینگ آرتماغینی ایسلِیَرین. 18 مِنینگ هِمّه زادیم بار، آرتیغی بیلِن هِم بار. اِپافرودیتوس سیزینگ ایبِرِن سُوغاتلارینگیزی گِتیرِن بَری، کِم زادیم قالمادی. بولار ایسلی عاطیر قربانلیق کیمین خودایینگ حالایان قربانیسیدیر. 19 بِییک خوداییم اُز بایلیغی بیلِن سیزینگ، یَعنی عیسی مسیحه باغلی بُلانلارینگ اوچین هِمّه مَحتَجلیکلِرینینگ عُوِضینی دُلدولار. 20 آتامیز خودایا اِبِدی و باقی بِییکلیک بُلسون! اَمین. سالاملار 21 عیسی مسیحینگ اوستو بیلِن مُقادِّسلِره باغلی بُلانلارینگ بارینا سالام آیدینگ. مِنینگ یانیمداقی دُغانلار سیزه سالام آیدیارلار. 22 مُقادِّسلِرینگ هِمّه‌سی، خاص-دا، ایمپِراطُرا خیدمات اِدیَنلِر سیزه سالام آیدیارلار. 23 تانگریمیز عیسی مسیحینگ مِرحِمِتی، قُی، سیزینگ بیلِن بُلسون! اَمین. |
© Turkmen Truth