فیلیپیلِر 3 - مُقادِّس کیتاب

سونِّتلِنمَه دَل-ده، ایمانا دایانیان دُغرولیق

¹ شونلوقدا، اِی عزیزلِریم، قُی، شاتلیغینگیزینگ باشلایان یِری مسیح بُلسون!‏ سیزه شیندی یازیانیمی نَچه گِزِک یازماق مانگا قین دَل.‏ بو سیزی قُریماق اوچیندیر:‏

² شُل ‏«‏ایتلِردِن»‏، شُل شِرلِردِن، شُل چاپیانجیلاردان داش دورونگ.‏

³ بیز مُقادِّس روح بیلِن خودایا عیبادات اِدیپ، عیسی مسیحه قووانیاریس و اُز اینسانلیغیمیزا دایانمایاریس.‏ شُنگا گُرَه-ده حاقیقی سونِّتلیلِر بیزدیریس!‏

⁴ اِگِر اُز اینسانلیغیمیزا دایانمالی بُلسا، اُندا بو باباتدا مِنینگ قاوی دِلیل‍لِریم باردیر.‏ اِگِر یِنه کیمدیر بیری اُز اینسانلیغینا دایانماغا دِلیل‍لِری باردیر دییّپ فیکرلِنسه، مِنینگکی اُندان-دا قاییمدیر.‏

⁵ مِن دونیَه گِلِنیمدِن سِکیزلِنجی گونده سونِّت اِدیلِندیرین.‏ مِن اسرائیل خالقینینگ بِنیامین طایفاسیندان بُلوپ، عِبرانیلارینگ عِبرانیسیدیرین.‏ یَهودیلِرینگ شِریغاتینی بِرجای اِتمِک باباتدا هِم فَریسی‌دیرین.‏

⁶ دین اوغرونداقی قایرات دییسِنگیز، کِلیسا آزار بِردیم.‏ شِریغاتا دایانیان تاقوالیق دییسِنگیز، عایپسیزدیم.‏

⁷ اِمّا اُوال پِیدالی حاساپلان زاتلاریمی ایندی مسیحینگ خاطیراسینا بیدِرِک حاساپلایارین.‏

⁸ هاووا، مِن تانگریم عیسی مسیحینگ اولی مِرتِبه‌سینی تانیماغینگ خاطیراسینا هِمّه زادی زییان حاساپلایارین.‏ مِن اُنونگ خاطیراسینا هِمّه زاتدان گِچیپ، مسیحی قازانیپ و اُنونگ بیلِن قاییم بیریگمِک اوچین بولارینگ بارینی چُپ-چُر حاساپلایارین.‏

⁹ مِن شِریغاتا دایانیان اُز تاقوالیغیما دَل، شِیله بُلسا مسیحه بُلان ایمانا دایانیان، ایمانینگ اوستو بیلِن خودایدان بُلان تاقوالیغا اِیه بُلاسیم گِلیَر.‏

^10-11 مِن مسیحینگ اُزونی، اُنونگ دیرِلیشینینگ گویجونی بیلِسیم گِلیَر.‏ مسیحینگ چِکِن ظولوم-سوتِملِرینه شِریک بُلوپ، اُنونگ اُلومینه مِنگزَپ، اُلومدِن دیریلیشه یِتِسیم گِلیَر.‏

ماقصادا گُز تیکمِک

¹² شونلوقدا، مِن بولارینگ بارینا یِتِندیرین یا-دا کَمیلِّشِندیرین دییّپ فیکر اِدِمُق.‏ اِمّا مِن بولاری قازانماق اوچین چالیشیارین.‏ سِبَبی عیسی مسیح مِنی شو ماقصات بیلِن قازاندی.‏

¹³ اِی عزیزلِر!‏ مِن بولاری قازاناندیرین دییّپ فیکر اِدِمُق.‏ اِمّا یِکه شونی بیلیپ اِدیَندیرین:‏ ایزدا قالان زاتلاری اونودیپ، اُودَکیلِره یِتمَگه گُزتیکیَرین.‏

¹⁴ مِن خودایینگ عیسی مسیحده آسمانداقی یاشایشا چاغیریان بایراغینی آلماق اوچین، ماقصادیما طاراف تاقالّا اِدیپ یُرتیارین.‏

¹⁵ شُنگا گُرَه-ده، ایماندا یِتیشِن بُلانلاریمیزینگ باری، قُی، شو دوشونجِدِن فیکر اِتسین.‏ اِگِر هایسیدیر بیر زات باباتدا باشغا فیکرده بُلسانگیز، اُندا خودای سیزه مونی هِم اَشکَر اِدیشدیرِر.‏

¹⁶ یُنه نَمه یِتِن بُلساق شُل یُلا لاییق بُلوپ گِزِیلینگ.‏

¹⁷ اِی عزیزلِر!‏ بیلِلیکده مِندِن نِمونه آلینگ.‏ بیزینگ نِمونه‌میزه گُرَه یاشایانلارا دیقّات اِدیپ، اُلاردان اُورِنینگ.‏

¹⁸ مِن اُزال مونی سیزه نَچه گِزِک آیدیپدیم.‏ ایندی بُلسا گُزیاش اِدیپ، یِنه آیدیارین:‏ مسیحینگ صلیبینه دوشمان بُلوپ یاشایانلار کَندیر.‏

¹⁹ اُلارینگ آخیری هِلَکچیلیکدیر، اُلارینگ قارا قارینلاری خودایلاریدیر، اُلار اُز اوتانمالی زاتلارینا قابارلانیاندیرلار.‏ اُلار یِکه بو دونیَه‌نینگ زاتلاری بارادا فیکرلِنیَندیرلِر.‏

²⁰ اِمّا بیز واطانیمیز آسماندا بُلوپ، نِجات بِریَنچی تانگریمیز عیسی مسیحینگ شُل یِردِن گِلِرینه صابیرسیزلیق بیلِن قاراشیاندیریس.‏

²¹ سِبَبی عیسی مسیح بیزینگ اِجیز و اَهمییِتسیز بِدِنلِریمیزی اویدگِدیپ، اُز بِییک بِدِنینه مِنگزِدِر.‏ اُل مونی هِر زادی اُزونه موطیع اِتمِگی باشاریان گویجی بیلِن یِرینه یِتیرِر.‏