فیلیپیلِر 2 - مُقادِّس کیتابعیسی مسیحینگ فُروتَنلیگیندِن نِمونه آلینگ 1 شونلوقدا، اِگِر مسیح بیلِن بُلماق سیزی گُوونلیک بِریَن بُلسا، اُنونگ سُیگوسیندِن تِسِلّی تاپیان بُلسانگیز، مُقادِّس روحا شِریک بُلسانگیز، رِحم و شِپاقاتینگیز بار بُلسا، 2 اُندا مِنینگ بِگِنجیمینگ اوستونی یِتیرینگ: فیکردِش بُلونگ، بیری-بیرینگیزی دِنگ دِرِجه‌ده سُیونگ، روحونگیز و ماقصادینگیز بیر بُلسون. 3 هِر بیر ایشی اُز ایسلِگینگیزدِن یا-دا شُهرَت پَرَستلیکدِن اِتمَنگ. تِرسینه، باشغالاری اُزونگیزدِن قاوی بیلیپ، فُروتَن بُلونگ. 4 هِر کِس یِکه اُز پِیداسینی دَل، قایتام باشغالارینگ پِیداسینی سایلاسین. 5 عیسی مسیحینگ فیکری سیزده هِم بُلسون: 6 عیسی مسیح خودایینگ طِبیغاتینا اِیه بُلسا-دا، اُنی اُزونه دِرِجه سایمادی، اُندان قاییم یاپیشمادی. 7 قایتام، بیر قول طِبیغاتینی آلیپ، اینسان صوراتیندا بو دونیَه ایندی، اُل اُزونی آصلا هیچ اِتدی. اُل اینسان شِکلینده بُلدی، 8 اُزونی کیچِلتدی و اُلومه، حتّیٰ صلیبدَکی اُلومه-ده موطیع بُلدی. 9 شُنگا گُرَه خودای اُنی خاص بِیگِلتدی: اُنگا هِمّه آددان اوستون بیر آدی بِردی، 10 تا آسمانداقی، یِردَکی و یِر آشاغینداقی هِر کِس عیسانینگ آدینینگ اُوونده دیزا چُکسین، 11 و آتا خودایینگ بِییکلیگی اوچین، هِر دیل عیسی مسیحینگ تانگریدیغینی ایقرار اِتسین. ییلدیزلار کیمین پارلاماق 12 شُندا، اِی عزیزلِریم، مِن یانینگیزداقام، سیز خودایینگ سُزونه موطیع‌دینگیز. اِمّا مِنینگ یُقلوغیمدا هِم موطیع بُلماغینگیز خاص-دا مُهِمدیر. خودایینگ حوضوریندا قُرقی و تیترِمه بیلِن، اُز نِجات تاپانینگیز اوچین یاخشی ایشلِری عِمِل اِدینگ. 13 چونکی خودای اُز ایسلِگینه گُرَه ایشلِری اِتمِک اوچین سیزه قووات بِریپ، سیزدَکی ایشینی عِمِل اِدیَر. 14 هِر بیر زادی کَیینمَن و زِیرِنمَن بِرجای اِدینگ. 15 شُندا سیز اِگری و آزان نِسلینگ آراسیندا اِدیل جاهانداقی ییلدیزلار یالی پارلایان، خودایینگ تاقصیرسیز، پَک و عایپسیز فِرزِنتلِری بُلارسینگیز. 16 یاشاییش بِریَن سُزی قاییم توتونگ. شُندا مِن بیدِرِک یِره زَحمِت چِکمَندیگیم، عاذابیمینگ پوچا چیقماندیغی باباتدا مسیحینگ گِلجِک گونونده قابارلانیپ بیلِرین. 17 سیزینگ خودایا اِدیَن ایمانینگیز و خیدماتینگیز اُنگا هُدورلِنِن قربانلیق کیمیندیر. اِگِر مِنینگ شیندی چِکیَن زَحمِتلِریم بو قربانلیغا قُشولسا، مِن شاتدیرین. مِن هِمَّه‌نگیزینگ شاتلیغینگیزا شِریکدیرین. 18 شُنگا گُرَه، سیز هِم شاتلانیپ، مِنینگ شاتلیغیما شِریک بُلونگ. تیموتاوس و اِپافرودیتوس 19 تانگریمیز عیسی یُل بِرسه، یاغدایلارینگیزی بیلیپ راحاتلاماق اوچین، تیز واقتدا یانینگیزا تیموتاوسی ایبِرِرین دییّپ اومید اِدیَرین. 20 تیموتاوس هِم اِدیل مِن یالی سیز باباتدا شِیله ایخلاصلی و شِیله وِفادار. اُندان باشغا ایبِرمَگه شِیله آدامیم-دا یُق. 21 سِبَبی کَن آداملار عیسی مسیحینگ دَل-ده، اُز پِیداسینی آغتاریارلار آخیرین. 22 اِمّا تیموتاوس‌ینگ صادیقلیغی سیزه معلیمدیر. اُل مانگا خوش خابارینگ یایراماقینا اِدیل اُغلونگ اُز آتاسینا خیدمات اِدیشی یالی خیدمات اِتدی. 23 شُنونگ اوچین-ده، مِن یاغداییمینگ نَهیلی بُلجاغینی بیلِن واقتیما، اُنی سیزینگ یانینگیزا ایبِرِرین دییّپ اومید اِدیَرین. 24 مِنینگ تیز واقتدا یانینگیزا بارجاقدیغیم باباتدا مسیح مِنی هِم ایناندیریار. 25 سیز مَحتَجلیگیمده مِن بارادا قایغی اِتمِک اوچین رِسولینگیز اِپافرودیتوسی یانیما ایبِریپدینگیز. اِمّا مِن اُنی، یَعنی اُز هِمکَریمی، سِوِشدِشیمی و دُغانیمی ایزینا، سیزینگ یانینگیزا ایبِرمِگی ضِرورلی بیلدیم. 26 اُل سیزینگ هِمَّه‌نگیزی خاص گُرِسی گِلدی. اُنونگ مِریضلیگی بارادا اِشیدِندیگینگیزی بیلِنده، قاتی قایغیلاندی. 27 دُغرودان-دا، اُل اُلوم حالیندا بُلوپ، تاس اُلوپدی. اِمّا خودای اُنگا، یِکه اُنگا دَل، شِیله هِم غام اوستونه غام چِکمِزیم یالی، مانگا هِم رِحم اِتدی. 28 شُنگا گُرَه-ده، سیز اِپافرودیتوسی گُروپ، قایتادان بِگِنِرسینگیز، مِنینگ-ده قایغی-حاسراتیم یِنگلَر دییّپ، اُنی یانینگیزا خاص ایبِرِسیم گِلدی. 29 اُنی مسیحدَکی دُغانینگیز حُکمونده اولی شاتلیق بیلِن قارشیلانگ. اُنونگ یالی آداملاری حُرماتلانگ. 30 چونکی اُل سیزینگ مانگا اِدیپ بیلمِدیک خیدماتینگیزینگ عُوِضینی دُلدورماق اوچین، جانینی خاطارا سالیپ، مسیحینگ ایشینینگ اوغروندا تاس اُلوپدی. |
© Turkmen Truth