مَتّیٰ 9 - مُقادِّس کیتابعیسی بیر فِلِجی شِفا بِریَر مَرقُس ۲:۱-۱۲ ؛ لوقا ۵:۱۷-۲۶ 1 سُنگرا عیسی قاییقا میندی-ده، بِیلِکی کِنارا گِچیپ، اُز شَهرینه گِلدی. 2 بیرنَچه آدام اُنونگ یانینا دوشِکده یاتان بیر فِلِجی گِتیردیلِر. عیسی اُلارینگ ایمانینی گُرِنده، فِلِجه: «اُغلوم، خاطیرجِم بُل، سِنینگ گونَه‌لِرینگ باغیشلاندی» دییدی. 3 شُندا بیرنَچه دین عُلَمالار ایچلِریندِن: «بو آدام خودایا دیل یِتیریَر» دییدیلِر. 4 اِمّا عیسی اُلارینگ فیکرلِرینی بیلیپ: «نَمه اوچین یورِگینگیزَه تِلِکه فیکرلِر گِتیریَرسینگیز؟ 5 هایسینی آیتماق آنگسات، ”گونَه‌لِرینگ باغیشلاندی“ دییمِکمی یا-دا ”تور-دا، یُری“ دییمِک؟ 6 اِمّا سیز اینسان اُغلونینگ یِر یوزونده گونَه‌لِری باغیشلاماغا-دا ایختییارینینگ باردیغینی بیلیپ قُیونگ» دییدی. سُنگرا اُل فِلِجه: «سانگا دییَّرین، تور، دوشِگینگی آل-دا، اُیونگه گیت» دییدی. 7 اُل هِم یِریندِن توردی-دا، اُیونه گیتدی. 8 مونی گُرِن جِماغات حایران قالدیلار. اُلار اینسانا شِیله ایختییاری بِرِن خودایا شوکور اِتدیلِر. مَتّیٰ شَگیرتلِره قُشولیار مَرقُس ۲:۱۳-۱۷ ؛ لوقا ۵:۲۷-۳۲ 9 عیسی شُل یِردِن گِچیپ باریارقا، مالییات آلیپ اُتوران مَتّیٰ‌نی گُروپ، اُنگا: «مِنینگ ایزیما دوش» دییدی. اُل هِم توروپ، اُنونگ ایزینا دوشدی. 10 عیسی مَتّیٰ‌نینگ اُیونده ساچاق باشیندا اُتیرقا، نَچَه مالییات آلیانچیلار، گونَه‌کَرلِر گِلیپ، عیسی و اُنونگ شَگیرتلِری بیلِن بیله اییّپ-ایچدیلِر. 11 فَریسی‌لِر مونی گُروپ، اُنونگ شَگیرتلِریندِن: «نَمه اوچین سیزینگ اُستادینگیز مالییات آلیانچیلار و گونَه‌کَرلِر بیلِن بیله ناهار اییَّر؟» دییّپ سُرادیلار. 12 عیسی مونی اِشیدیپ: «طِبیب ساغ آداملارا دَل-ده، مِریضلِره گِرِکدیر. 13 یُنه سیز گیدینگ-ده ”مِن قربانلیق دَل-ده، رِحمدارلیق ایسلِیَرین“ دییِن سُزونگ مَعنیسینی اُورِنینگ، سِبَبی مِن دُغری آداملاری دَل-ده، گونَه‌کَرلِری توبا چاغیرماغا گِلدیم» دییدی. آرازا بارادا سُراق مَرقُس ۲:۱۸-۲۲ ؛ لوقا ۵:۳۳-۳۹ 14 سُنگرا یحیانینگ شَگیرتلِری عیسانینگ یانینا گِلیپ: «نَمه اوچین بیز و فَریسی‌لِر آرازا توتیاریس-دا، سِنینگ شَگیرتلِرینگ آرازا توتمایارلار؟» دییّپ سُرادیلار. 15 عیسی اُلارا: «داماد یانلارینداقا، اُندا-دا طُویونگ میهمانلاری، یاس توتارمی؟ اِمّا دامادی اُلاردان آلینجاق گونلِری گِلِر، شُندا اُلار آرازا توتارلار. 16 «هیچ کیم کُهنه لِباسا تَزه پارچادان یاما سالماز، سِبَبی سالنان یاما کُهنه لِباسدان قُپوپ، ییرتیق یِری خاص بیدِرِک بُلوپ گُرنِر. 17 هیچ کیم تَزه شِرابی کُهنه مِشیکلِره قویماز. بِیتسه، مِشیکلِر یاریلیپ، شِراب دُکولِر و مِشیکلِر هِم ضایالانار. تَزه شِراب تَزه مِشیکلِره قویولیاندیر، شِیدیپ، ایکیسی هِم قاوی ساقلانیاندیر» دییّپ جُغاپ بِردی. دیرِلِن قیز و شِفا تاپان آیال مَرقُس ۵:۲۱-۴۳ ؛ لوقا ۸:۴۰-۵۶ 18 عیسی اُلارا بو زاتلاری آیدیپ دورقا، بیر کِنیسه‌نینگ باشلیغی گِلیپ، اُنونگ آیاغینا ییقیلدی. اُل: «مِنینگ قیزیم یانگجا اُلدی، اِمّا سِن گِلیپ، اِلینگی اُنونگ اوستونده قُیسانگ، اُل دیرِلِر» دییدی. 19 عیسی توروپ، شَگیرتلِری بیلِن بیله اُل آدامینگ ایزینا دوشوپ گیتدی. 20 شُل واقت اُن ایکی ییلدان بَری قان آقما مِریضچیلیکدِن حُرلوق چِکیَن بیر آیال عیسانینگ آرقا طارافیندان گِلیپ، اُنونگ دُنونا اِلینی دِگیردی. 21 اُل ایچیندِن: «دینگه گِیمینه اِلیمی دِگیرسِم-ده شِفا تاپاریم» دییَّردی. 22 عیسی اُورولیپ، اُنی گُردی-ده: «اِی قیز، خاطیرجِم بُل، ایمانینگ سانگا شِفا بِردی» دییدی. آیال شُل واقتینگ اُزونده شِفا تاپدی. 23 عیسی یُلباشچینینگ اُیونه گِلِنده، یاس توتیانچیلاری، قالماغال اِدیشیپ دوران جِماغاتی گُروپ، 24 اُلارا: «آیریلینگ، قیز اُلِنُق، یِکه اوقلاپ یاتیر» دییدی. اُلار عیسانینگ اوستوندِن گولدولِر. 25 جِماغات داشاری چیقاریلاندان سُنگ، عیسی ایچِری گیریپ، قیزینگ اِلیندِن توتدی، قیز هِم آیاغا قالدی. 26 بو خابار اُل اِطرافینگ هِمّه یِرینه یایرادی. عیسی ایکی کُر بیلِن بیر لالی شِفا بِریَر 27 عیسی اُل یِردِن گِلیَرکَه، ایکی کُر آدام: «اِی داوود اُغلی! بیزه رِحم اِت!» دییّپ قیغیریشیپ، اُنونگ ایزینا دوشدولِر. 28 عیسی اُیه گیرِنده، کُرلِر اُنونگ یانینا گِلدیلِر. عیسی اُلاردان: «مِنینگ بو ایشی باشارجاغیما اینانیارسینگیزمی؟» دییّپ سُرادی. اُلار هِم اُنگا: «اینانیاریس، آقام!» دییّپ جُغاپ بِردیلِر. 29 شُندا عیسی اُلارینگ گُزلِرینه اِلینی دِگریپ: «سیزه ایمانینگیزا گُرَه بُلسون!» دییدی، 30 شو واقتدا اُلارینگ گُزلِری آچیلدی. عیسی: «خاباردار بُلونگ، مونی هیچ کیم بیلمِسین» دییّپ، اُلارا قاتی تابشیردی. 31 اِمّا اُلار چیقان واقتلارینا، عیسانینگ اِدِن بو یاخشیلیغی باراداقی خاباری اِطرافینگ هِمّه یِرینه یایراتدیلار. 32 اُلار گیدیپ باریارقالار، دیوانا بیر لال آدامی عیسانینگ یانینا گِتیردیلِر. 33 جین کُولاندان سُنگ، لال آدام کِپلِمَگه باشلادی. جِماغات گِنگ قالیپ: «اسرائیل‌دا هیچ هاچان بِیله زات گُرلِن دَلدیر» دییّشدی. 34 اِمّا فَریسی‌لِر: «اُل جینلاری، جینلارینگ رِییسینینگ کُمِگی بیلِن کُووپ چیقاریار» دییّشدیلِر. حاصیل بُل، ایشچی آز 35 عیسی شَهرلِر و اُبالارینگ بارینی آیلانیپ، اُل یِردَکی کِنیسه‌لِرده تَعلیم بِریَردی. آسمانینگ پادیشاهلیغی حاقدَکی خوش خاباری واغیظ اِدیپ، هِر هیلی دِردلِره و مِریضچیلیکلِره شِفا بِریَردی. 36 عیسی جِماغاتی گُروپ، اُلارا یورِگی آویدی، سِبَبی اُلار چُپانسیز قُیونلار یالی پیتیراپدی و پِریشانحالدیلار. 37 شُندا عیسی شَگیرتلِرینه: «حاصیل بُل، یُنه ایشچی آز. 38 شُنونگ اوچین هِم اُز حاصیلینی ییغماغا ایشچی ایبِرِر یالی، حاصیل اِیه‌سینه یالبارینگ» دییدی. |
© Turkmen Truth