مَتّیٰ 28 - مُقادِّس کیتابعیسانینگ دیرِلیشی مَرقُس ۱۶:۱-۱۰ ؛ لوقا ۲۴:۱-۱۲ ؛ یوحنا ۲۰:۱-۱۰ 1 سَبَّت گونی گِچِندِن سُنگ، یِکشَنبه گونی، ایر سَحِر بیلِن مَجدَلَلی مریم و بِیلِکی مریم قابری گُرمَگه گیتدیلِر. 2 بیردِن گویچلی یِر تیترِدی. خودایینگ بیر پِریشده‌سی آسماندان اینیپ، داشی بیر چِته تُغالادی-دا، اُنونگ اوستونده اُتوردی. 3 اُنونگ گُرنوشی ییلدیریم یالی نور بِریَردی، لِباسی قار یالی آقدی. 4 ساقچیلار قُرقولاریندان یانگا تیتِرِشیپ، اُلی کیمین یِره ییقیلدیلار. 5 پِریشده آیال‍لارا: «قُرقمانگ! مِن سیزینگ صلیبه چویلِنِن عیسانی گُزلِیَندیگینگیزی بیلیَرین. 6 اُل بو یِرده یُق. اُل اُز آیدیشی یالی دیرِلدی. بَری گِلینگ-ده، اُنونگ یاتان یِرینی گُرونگ. 7 ایندی باسیم گیدیپ، اُنونگ شَگیرتلِرینه: ”عیسی دیرِلیپدیر، اُل سیزدِن اُنگ جلیلَه باریار. سیز اُنی شُل یِرده گُرِرسینگیز“ دییّنگ. قولاق آسینگ، مِن سیزه مونی آیداندیرین» دییدی. 8 آیال‍لار قُرقی هِم شاتلیق بیلِن هاولوغیشیپ، قابردان اوزاقلاشدیلار. اُلار یُرتیشیپ، عیسانینگ شَگیرتلِرینه خابار بِرمَگه گیتدیلِر. 9 بیردِن اُلارا عیسی ساتاشیپ: «سالام!» دییدی. اُلار هِم اُنونگ یانینا گِلیپ، آیاغینا ییقیلیپ، اُنگا سِجده اِتدیلِر. 10 سُنگرا عیسی اُلارا: «قُرقمانگ! بارینگ، دُغانلاریما آیدینگ، جلیلَه گیتسینلِر. مِنی شُل یِرده گُرِرلِر» دییدی. ساقچیلارینگ گِتیرِن خاباری 11 آیال‍لار هِنیز یُلداقالار، ساقچیلارینگ بیرنَچه‌سی شَهره باریپ، بُلان هِمّه زاتلاری یُلباشچی کاهینلارا خابار بِردیلِر. 12 اُلار یاشولیلار بیلِن ییغنانیشیپ، ماصلاحات گِچیرِنلِریندِن سُنگ، ساقچیلارا کَن پول بِریپ: 13 «سیز خالقا: ”گیجه بیز یاتیرقاق، شَگیرتلِری گِلیپ، اُنونگ جِسِدینی اُغورلاپ گیدیپدیرلِر“ دییّنگ. 14 بو خابار حاکیمینگ قولاغینا باریپ یِتسه، اُنی ایناندیریپ، بیز سیزی قینچیلیقدان دینداراریس» دییدیلِر. 15 ساقچیلار پولی آلیپ، اُزلِرینه آیدیشی یالی اِتدیلِر. بو گورّونگ یَهودیلِرینگ آراسیندا شو گونه چِنلی هِم دُوام اِدیپ گِلیَر. اولی وِظیفه مَرقُس ۱۶:۱۴-۱۸ ؛ لوقا ۲۴:۳۶-۴۹ ؛ یوحنا ۲۰:۱۹-۲۳ ؛ رِسول‍لار ۱:۶-۸ 16 شونلوق بیلِن، اُنبیر شَگیرت جلیلَه، عیسانینگ آیدان داغینا گیتدیلِر. 17 عیسانی گُروپ، اُنگا سِجده اِتدیلِر، اِمّا اُلارینگ کَبیری شِک اِتدیلِر. 18 عیسی هِم اُلارینگ یانینا گِلیپ: «آسماندا و یِرده هِمّه ایختییارلیق مانگا بِریلدی. 19 شُنونگ اوچین هِم گیدینگ-ده، هِمّه میلِّتلِری مِنینگ شَگیردیم اِدینگ، اُلاری آتا، اُغول و مُقادِّس روحونگ آدیندان تَعمید بِرینگ. 20 سیزه حُکوم اِدِن هِمّه زاتلاریمی بِرجای اِتمِگی اُلارا اُورِدینگ. مِن دونیَه‌نینگ آخیرینا چِنلی هِمیشه سیزینگ بیلِن بُلارین.» |
© Turkmen Truth