مَتّیٰ 27 - مُقادِّس کیتابیهودا اُزونی آسیار مَرقُس ۱۵:۱ ؛ لوقا ۲۳:۱-۲ ؛ یوحنا ۱۸:۲۸-۳۲ 1 ایر سَحِر بیلِن هِمّه یُلباشچی کاهینلار و خالقینگ یاشولیلاری عیسی اُلوم جِزاسینی بِرمِک بارادا ماصلاحات گِچیردیلِر. 2 اُنی دانگیپ، حاکیم پیلاتُسا اِلتیپ تابشیردیلار. 3 سُنگرا عیسی خایینلیق اِدِن یهودا اُنی مَحکوم اِدِنلِرینی گُروپ، اِدِن ایشینه اُکوندی. اُل اُتوز سِکّه کوموشی ایزینا، یُلباشچی کاهینلارا و یاشولیلارا گِتیریپ: 4 «مِن بی‌گونَه آداما خایینلیق اِدیپ، گونَه قازاندیم» دییدی. اُلار-دا: «بیزه نَمه، بو سِنینگ اُز ایشینگ» دییدیلِر. 5 یهودا کوموشلِری عیباداتخانانینگ ایچینه زینگدی-دا، چیقیپ گیتدی. سُنگرا گیدیپ، اُزونی آسدی. 6 یُلباشچی کاهینلار بُلسا کوموشلِری آلیپ: «بو پول‍لاری عیباداتخانانینگ خازیناسیندا قُیماق شِریغاتدا دُغری گِلمِیَر، سِبَبی بولار قان باهاسیدیر» دییدیلِر. 7 شِیلِلیکده، ماصلاحات گِچیریپ، بیگانه‌لِره مازارچیلیق بِجِرمِک اوچین، بو پول بیلِن کویزه‌بِجِریَنینگ یِرینی ساتین آلدیلار. 8 شُنونگ اوچین اُل یِره شو گونه چِنلی «قان یِریسی» دییّلیَر. 9-10 شُندا اِرمیا پیغامبار سِبَبی آیدیلان شو سُز بِرجای بُلدی: «اسرائیل خالقینینگ اُنونگ باهاسی حُکمونده کِسِن اُتوز سِکّه کوموشونی آلیپ، خودایینگ مانگا آیدیشی یالی، کویزه‌بِجِریَنینگ یِرینی ساتین آلدیلار.» عیسی پیلاتُسینگ حوضوریندا مَرقُس ۱۵:۲-۵ ؛ لوقا ۲۳:۳-۵ ؛ یوحنا ۱۸:۳۳-۳۸ 11 عیسانی حاکیمینگ حوضورینا گِتیردیلِر. حاکیم اُندان: «سِن یَهودیلِرینگ پادیشاهسیمی؟» دییّپ سُرادی. عیسی هِم: «اُز آیدیشینگ یالیدیر» دییّپ جُغاپ بِردی. 12 یُلباشچی کاهینلار بیلِن یاشولیلار اُنگا تُهمِت اورانلاریندا، اُل هیچ هیلی جُغاپ بِرمِدی. 13 سُنگرا پیلاتُس اُندان: «سِنینگ قارشینگا بِریلیَن مونچا شاهاتلیقلاری اِشیتمِیَرسینگمی؟» دییّپ سُرادی. 14 عیسی اُنونگ یِکِجه سُراغینا هِم جُغاپ بِرمِدی. حاکیم مونگا قاتی حایران قالدی. 15 حاکیم هِر پِسَح بایرامیندا خالقینگ خاییشی بیلِن بیر زیندانینی بُشاتماغی عادات اِدینیپدی. 16 شُل واقتلار باراباس دییِن آدی بِلّی بیری زینداندا یاتیردی. 17 شِیلِلیکده، خالق ییغنانیشاندا پیلاتُس اُلاردان: «سیزینگ اوچین کیمی بُشاتماغیمی ایسلِیَرسینگیز؟ باراباسیمی یا-دا مسیح دییّلیَن عیسانی؟» دییّپ سُرادی. 18 پیلاتُس یُلباشچی کاهینلار بیلِن یاشولیلارینگ عیسانی باخیلچیلیقدان تابشیراندیقلارینی بیلیَردی. 19 پیلاتُس حُکوم تاختیندا اُتیرقا-دا، آیالی اُنگا: «اُل دُغری آدام بیلِن ایشینگ بُلماسین، سِبَپلی مِن گِچِن گیجه دیشیمده اُل سِبَپلی کَن عاذاپلار چِکدیم» دییّپ، خابار یُلّاپدی. 20 اِمّا یُلباشچی کاهینلار بیلِن یاشولیلار عیسانینگ دِرِگینه باراباسی بُشاتماغینی ایسلَنگ دییّپ، جِماغاتی کوشگوردیلِر. 21 حاکیم اُلارا یوزلِنیپ: «سیز بو ایکیسیندِن مِنینگ هایسینی بُشاتماغیمی ایسلِیَرسینگیز؟» دییّپ سُرادی. اُلار هِم: «باراباسی» دییّپ جُغاپ بِردیلِر. 22 پیلاتُس اُلارا: «اُندا مِن مسیح دییّلیَن عیسانی نَمه اِدِیین؟» دییّپ سُرادی. اُلارینگ هِمّه‌سی بیراغیزدان: «اُل صلیبه چویلِنسین!» دییدیلِر. 23 پیلاتُس: «نَمه اوچین؟ اُل نَمه یامانلیق اِتدی؟» دییّپ سُرادی. اِمّا اُلار: «اُنی صلیبه چویله!» دییّپ، خاص بِتِر قیغیریشدیلار. 24 پیلاتُس اِلیندِن هیچ زات گِلمِجِکدیگینی بیلِنسُنگ، قالماغالینگ بُلسا باردیغچا آرتیاندیغینی گُرِنسُنگ، اِلینه سو آلدی-دا، جِماغاتینگ اُوونده اِلینی یوووپ: «بو آدامینگ قانینینگ دُکولمِگینده مِن گونَه‌سیز. مونگا سیز جُغاپکَرسینگیز!» دییدی. 25 هِمّه خالق: «اُنونگ قانینا بیزینگ بیلِن فِرزِنتلِریمیز جُغاپکَر!» دییّپ جُغاپ بِردیلِر. 26 شُندا پیلاتُس باراباسی بُشاتدی، عیسانی بُلسا قامچیلادیپ، صلیبه چویلِمِک اوچین سِربازلارینگ اِلینه بِردی. سِربازلار عیسانی ماسغارالایار مَرقُس ۱۵:۱۶-۲۰ ؛ یوحنا ۱۹:۲-۳ 27 سُنگرا پیلاتُسینگ سِربازلاری عیسانی حُکومِت کاخینینگ حایاطینا اِلتیپ، هِمّه قُشون بُلومینی اُنونگ داشینا اویشوردیلِر. 28 لِباسلارینی چیقاریپ، گِرشینه قیزیل دُن گِیدیردیلِر. 29 تیکِندِن تاج اُروپ، باشینا گِیدیردیلِر-ده، ساغ اِلینه تایاق توتدوردیلار. اُوونده دیزا چُکوپ: «یاشاسین، اِی یَهودیلِرینگ پادیشاهسی!» دییّپ، اُنی ماسغارالادیلار. 30 اُنونگ اوستونه تویکوردیلِر، تایاقلاپ، باشینا اوردولار. 31 اُنی ماسغارا اِدِنلِریندِن سُنگ، دُنی اِگنیندِن چیقاردیلار-دا، اُز لِباسینی گِیدیریپ، صلیبه چویلِمَگه آلیپ گیتدیلِر. عیسی صلیبه چویلِنیَر مَرقُس ۱۵:۲۱-۳۲ ؛ لوقا ۲۳:۲۶-۴۳ ؛ یوحنا ۱۹:۱۷-۲۷ 32 یُلدا باریارقالار، شمعون آدلی قیرِوانلی بیر آداما ساتاشدیلار. اُلار بو آدامی عیسانینگ صلیبینی گُتِرمَگه مِجبور اِتدیلِر. 33 اُلار جُلجُتا (بو «کِلّه‌چاناق دِپه‌سی» دییمِگی بیلدیردیَر) دییِن یِره گِلدیلِر. 34 شُندا اُنگا ایچیرجِک بُلوپ، شِرابا آجی زاد قاریلانی بِردیلِر، اِمّا عیسی دادانیندان سُنگ، اُنی ایچمِکدِن یوز اُووردی. 35 اُنی صلیبه چویلَنلِریندِن سُنگ، قُرعه آتیشیپ لِباسلارینی اُزآرا پایلاشدیلار. 36 سُنگرا اُل یِرده اُتوریپ، اُنگا قاراوول‍لیق اِتدیلِر. 37 دِپه‌سینده بُلسا: «بو یَهودیلِرینگ پادیشاهسی عیسادیر» دییِن اِتمیش یازغیسینی آسدیلار. 38 اُنونگ بیلِن بیله ایکی اُغرینی هِم صلیبه چویلِدیلِر. اُلارینگ بیری عیسانینگ ساغ طارافیندا، بِیلِکیسی سُل طارافیندادی. 39 گِچیپ باریانلار باشلارینی چایقاپ، عیسی سِووپ: 40 «هانی-دا، سِن عیباداتخانانی ییقیپ، اوچ گونده سالجاقدینگ-آ. اِگِر خودایینگ اُغلی بُلسانگ، صلیبدِن آشاق دوش-ده و اُزونگی نِجات بِر-دا!» دییَّردیلِر. 41 یُلباشچی کاهینلار، دین عُلَمالار و یاشولیلار هِم عیسانی اِدیل شونونگ یالی ماسغارالاپ، بیری-بیرلِرینه: 42 «باشغالاری نِجات بِردی، اِمّا اُزونی نِجات بِریپ بیلِنُق. اُزی هِم اسرائیل‌ینگ پادیشاهسیمیش، اُندا، قُی، اُل شو واقتینگ اُزونده صلیبدِن آشاق دوشسون، بیز هِم مونی گُروپ، اُنگا ایمان گِتیرِلی. 43 اُل خودایا تَوَکُّل اِدیَردی. اِگِر خودای قاوی گُریَن بُلسا، قُی، شو واقتینگ اُزونده اُنی نِجات بِرسین. هانی، اُل: ”مِن خودایینگ اُغلودیرین“ دییَّردی» دییّشیَردیلِر. 44 شِیله هِم، عیسی بیلِن بیله صلیبه چویلِنِن اُغریلار-دا اُنگا سِویَردیلِر. عیسانینگ اُلومی مَرقُس ۱۵:۳۳-۴۱ ؛ لوقا ۲۳:۴۴-۴۹ ؛ یوحنا ۱۹:۲۸-۳۰ 45 گونُرتان اُن ایکیدِن اُیلَن ساغات اوچه چِنلی هِمّه یوردی قارانگقیلیق آلدی. 46 اُیلَن ساغات اوچ تُوِرِگی عیسی قاتی سِس بیلِن قیغیریپ: «ایلی، ایلی، لما سبقتنی؟» یَعنی: «خوداییم، خوداییم! نَمه اوچین مِنی تِرک اِتدینگ؟» دییدی. 47 اُل یِرده دورانلارینگ کَبیرلِری مونی اِشیدِنلِرینده: «اُل اِلیاسی چاغیریار» دییّشدیلِر. 48 بیر آدام یُرتوپ باریپ، بیر اَبری تورشی شِرابا باتیردی. اُنی بیر تایاغینگ اوجونا داقدی-دا، ایچیرجِک بُلوپ، عیسی اوزاتدی. 49 بِیلِکیلِر-ده: «دورونگ، گُرِلینگ! اِلیاس گِلیپ، اُنی نِجات بِرِرمیکَه؟» دییّشدیلِر. 50 عیسی یِنه-ده قاتی سِس بیلِن قیغیریپ، جان بِردی. 51 شُل واقت عیباداتخانانینگ پِرده‌سی یُقاردان آشاغینا چِنلی ییرتیلیپ، ایکَه بُلوندی، یِر تیترَپ، داشلار یاریلدی. 52 قابرلار آچیلیپ، اُلِن اِنچِمه مُقادِّس آداملارینگ جِسِدی دیرِلدی. 53 اُلار قابرلاردان چیقیپ، عیسی دیرِلِندِن سُنگ، مُقادِّس شَهره باریپ، کَن آداملارا گُروندیلِر. 54 عیسی قاراوول‍لیق اِدیپ دوران اَفسَر بیلِن یانینداقی سِربازلار یِر تیترِمَنی، بُلان بِیلِکی زاتلاری گُرِنلِرینده، قُرقا دوشوپ: «دُغرودان-دا، بو خودایینگ اُغلی میشدیق!» دییدیلِر. 55 اُل یِرده بُلیان زاتلارا اوزاقدان گُزلَپ دوران بیرتُپار آیال‍لار-دا باردی. اُلار عیسی خیدمات اِدیپ، جلیل‌دِن اُنونگ ایزینا دوشوپ گِلیپدیلِر. 56 اُلارینگ آراسیندا مَجدَلَلی مریم، یعقوب بیلِن یوسفینگ اِنه‌سی مریم باردی، شِیله-ده زِبِدینینگ اُغول‍لارینینگ اِنه‌سی هِم باردی. عیسانینگ جایلانیشی مَرقُس ۱۵:۴۲-۴۷ ؛ لوقا ۲۳:۵۰-۵۶ ؛ یوحنا ۱۹:۳۸-۴۲ 57 آغشام دوشِن واقتی یوسف آدلی رامه‌لی بیر بای آدام گِلدی. اُل هِم عیسانینگ شَگیرتلِریندِندی. 58 اُل پیلاتُسینگ یانینا باریپ، عیسانینگ جِسِدینی دیلِدی. شُندا پیلاتُس جِسِدینگ اُنگا بِریلمِگینی دِستور بِردی. 59-60 یوسف جِسِدی آلیپ، اُنی تَمیز کِفِنه دُلاپ، قایادا اُزی اوچین قازدیریپ بِجِردِن تَزه قابریندا جایلادی. سُنگرا قابرینگ آغزینا بیر داش تُغالاپ گِتیریپ قُیدی-دا، اُل یِردِن گیتدی. 61 مَجدَلَلی مریم بیلِن بِیلِکی مریم هِم شُل یِرده قابرینگ قارشیسیندا اُتیردیلار. 62 اِرتِسی گونی، یَعنی تاییارلیق گونونینگ اِرتِسی یُلباشچی کاهینلار بیلِن فَریسی‌لِر پیلاتُسینگ یانینا ییغنانیشیپ: 63 «آقا، اُل یالانچینینگ هِنیز دیریکَه: ”مِن اوچ گوندِن سُنگ دیرِلِرین“ دییِنی بیزینگ یادیمیزدا. 64 شُنونگ اوچین اوچولِنجی گونه چِنلی قابرینگ قُریپ ساقلانماغینی دِستور بِر، شَگیرتلِری گیجه گِلیپ، جِسِدی اُغورلاپ، خالقا بُلسا: ”اُل دیرِلدی“ دییَیمِسینلِر. بو سُنگقی یالان اُنگکودِن-ده بِتِر بُلار» دییدیلِر. 65 پیلاتُس اُلارا: «یانینگیزا سِربازلار آلیپ، گیدینگ-ده، قابری اُز بیلشینگیز یالی قُریپ ساقلادینگ» دییدی. 66 اُلار هِم سِربازلار بیلِن گیدیپ، داشی مُهورلِدیلِر-ده، قاراوولّوق اِتدیریپ، قابری قُریپ ساقلاتدیلار. |
© Turkmen Truth