مَتّیٰ 17 - مُقادِّس کیتاب

عیسانینگ گُرنوشی اویتگِیَر

¹ آلتی گوندِن سُنگ عیسی یانینا یِکه پِطرُسی، یعقوبی و یوحنانی آلیپ، بیر بِییک داغینگ اوستونه چیقدی.‏

² شُل یِرده اُلارینگ گُزلِرینینگ اُوونده اُنونگ یوزی اویتگِدی.‏ اُنونگ یوزی گون کیمین پارلادی، لِباسی نور کیمین دیم-آق بُلدی.‏

³ بیردِن اُلارا موسی بیلِن اِلیاس گُروندی.‏ اُلار عیسی بیلِن کِپلِشیپ دوردیلار.‏

⁴ پِطرُس عیسی:‏ ‏«‏آقام!‏ بیزه بو یِرده بُلماق قاوی.‏ اِگِر ایسلِسِنگ، بو یِرده اوچ سایِبان دیکِیین:‏ بیری سانگا، بیری موسی، بیری اِلیاسا»‏ دییدی.‏

⁵ اُل هِنیز کِپلَپ دورقا، یاغتی بیر بولوت اُلارینگ اوستونی اُرتدی.‏ بولوتدان بیر سِس گِلیپ:‏ ‏«‏بو مِنینگ عزیز اُغلومدیر، مِن اُندان کَن راضیدیرین.‏ اُنگا قولاق آسینگ»‏ دییدی.‏

⁶ شَگیرتلِر مونی اِشیدِنلِرینده، قاتی قُرقوپ، یوزین ییقیلدیلار.‏

⁷ اِمّا عیسی گِلیپ، اُلارا اِلینی دِگریپ:‏ ‏«‏تورونگ، قُرقمانگ»‏ دییدی.‏

⁸ اُلار باشینی قالدیریپ سِراِدِنلِرینده، عیسادان باشغا هیچ کیمی گُرمِدیلِر.‏

⁹ داغدان اینیپ گِلیَرکَلِر، عیسی اُلارا:‏ ‏«‏اینسان اُغلی اُلومدِن دیرِلیَنچَه، گُرِن زاتلارینگیزی هیچ کیمه آیتمانگ»‏ دییّپ تابشیردی.‏

¹⁰ شَگیرتلِری اُندان:‏ ‏«‏اُندا نَمه اوچین دین عُلَمالار اَوَّل اِلیاس گِلمِلیدیر دییَّرلِر؟»‏ دییّپ سُرادیلار.‏

¹¹ عیسی اُلارا:‏ ‏«‏دُغرودان-دا، اِلیاس گِلیپ، هِمّه زادی بِجِرمِلی.‏

¹² اِمّا مِن سیزه شونی آیدایین:‏ اِلیاس اِییَم گِلدی، اُنی تانیمادیلار، اُنگا ایسلَن زاتلارینی اِتدیلِر.‏ اینسان اُغلی-دا اِدیل شُنونگ یالی، اُلارینگ اِلیندِن اِذیِت چِکِر»‏ دییّپ جُغاپ بِردی.‏

¹³ شُندا شَگیرتلِر اُنونگ اُزلِرینه یحیی تَعمید بِریَنچی بارادا گورّونگ بِریَندیگینه دوشوندیلِر.‏

عیسی دیوانا اُغلانی شِفا بِریَر

¹⁴ اُلار جِماغاتینگ یانینا یِتیپ باریارقالار، بیر آدام عیسانینگ یانینا گِلیپ، اُنونگ اُوونده دیزا چُکدی.‏

¹⁵ اُل:‏ ‏«‏آقام، اُغلوما رِحم اِت!‏ اُل توتغایلی، آرتیقماچ عاذاپ چِکیَر، باسیم-باسیمدان اُزونی اُدا، سووا اوریار.‏

¹⁶ مِن اُنی سِنینگ شَگیرتلِرینگه گِتیردیم، اِمّا اُلار شِفا بِریپ بیلمِدیلِر»‏ دییدی.‏

¹⁷ عیسی:‏ ‏«‏اِی ایمانسیز هِم یُلدان چیقان نِسل!‏ مِن هاچانا چِنلی سیزینگ بیلِن بیله بُلوپ، سیزه جیدایین؟ اُغلانی شو یِره، مِنینگ یانیما گِتیرینگ»‏ دییدی.‏

¹⁸ عیسی جینا چیقماغینا قاتی دِستور بِردی، جین اُغلاندان چیقیپ گیتدی.‏ اُغلان شُل واقتینگ اُزونده شِفا آلدی.‏

¹⁹ سُنگرا شَگیرتلِر عیسانینگ یانینا گِلیپ، اُز-اُزلِریکَه اُندان:‏ ‏«‏بیز نَمه اوچین آرخو-جینی چیقاریپ بیلمِدیک؟»‏ دییّپ سُرادیلار.‏

²⁰ عیسی هِم اُلارا:‏ ‏«‏گِرِکلی ایمانینگیزینگ یُقدوغی اوچین شِیله بُلدی.‏ سیزه دُغروسینی آیدیارین:‏ بیر خَردِل دَنه‌سی یالی ایمانینگیز بُلوپ، شو داغا:‏ ‏”‏بو یِردِن اُل یِره گُچ“‏ دییسِنگیز، اُل گُچِر.‏ سیزه باشارتماجاق زات بُلماز.‏ ‏[‏

²¹ بو هیلی آرخو-جینلاری خودایا آرازا توتوپ، دُغا اِتمِکدِن باشغا هیچ زات بیلِن چیقاریپ بُلیان دَلدیر]‏»‏ دییدی.‏

عیسی اُز اُلومیندِن ایکیلِنجی گِزِک آیدیار

²² بیر گون جلیل‌ده اویشِنلِرینده، عیسی اُلارا:‏ ‏«‏اینسان اُغلی آداملارینگ اِلینه تابشیریلار.‏

²³ اُنی اُلدورِرلِر، اِمّا اُل اوچولِنجی گون دیرِلِر»‏ دییدی.‏ شَگیرتلِر مونگا خاص قیناندیلار.‏

عیباداتخانانینگ مالییاتی

²⁴ عیسی بیلِن شَگیرتلِر کَفَرناحوما گِلِنلِریندِن سُنگ، عیباداتخانانینگ مالییاتینی ییغنایانلار پِطرُسینگ یانینا گِلیپ:‏ ‏«‏سیزینگ اُستادینگیز عیباداتخانا حاقینی بِرِنُقمی؟»‏ دییّپ سُرادیلار.‏

²⁵ پِطرُس:‏ ‏«‏بِریَر»‏ دییدی.‏ پِطرُس اُیه گِلِنده، عیسی اُندان:‏ ‏«‏شمعون، سِن نَمه دییَّرسینگ؟ یِر یوزوندَکی پادیشاهلار مالییاتی کیمدِن آلیارلار؟ اُز اُغول‍لاریندانمی یا بیگانه‌لِردِن؟»‏ دییّپ سُرادی.‏

²⁶ پِطرُس اُنگا:‏ ‏«‏بیگانه‌لِردِن»‏ دییِنده، عیسی اُنگا:‏ ‏«‏اُندا اُغول‍لار آزاددیر.‏

²⁷ اِمّا اُلار نارضا بُلماز یالی، دِریا گیت-ده، قانگراق اُقلا.‏ قانگراقا دوشِن اَوَّلکی بالیغی آلیپ، آغزینی آچسانگ، مالییات بِرمَگه گِرِک سِکَّنی تاپارسینگ.‏ اُنی آل-دا، مِنینگ اوچین و اُزونگ اوچین هِم مالییات بِرمِگی حُکمونده اُلارا بِر»‏ دییدی.‏