یهودا 1 - مُقادِّس کیتابسالاملار 1 عیسی مسیحینگ خیدماتکَری و یعقوبینگ دُغانی بُلان مِن یهودادان خودایینگ خالقی بُلماغا چاغیریلانلارا دُغایی سالام! بو نامه‌نی آتامیز خودای طارافیندان سُیلوپ، عیسی مسیحینگ اوستو بیلِن قُریلیان سیزه یازیپ یُلّایارین. 2 قُی، خودایینگ بُلدان-بُل مِرحِمِتی و پاراحاتلیغی و سُیگوسی سیزه بُلسون! گونَه و حُکوم 3 اِی عزیزلِر، مِن سیزه خودایینگ مِنی و سیزی نَهیلی نِجات بِرِندیگی بارادا یازماغی خاص دُغری بیلیَردیم. اِمّا مونگا دِرِک خودایینگ اُز مُقادِّس خالقینا بیر گِزِک و هِمیشه‌لیک تابشیران ایمانی اوغروندا سیزی چالیشماغا قووات بِریپ یازماغیمینگ خاص-دا واجیپدیغینا گُز یِتیردیم. 4 سِبَبی کَبیر خودایسیزلار اُغرینچا آرانگیزا سوملوپ گیردیلِر. اُلار آخلاقسیزلیق اِتمِک اوچین خوداییمیزینگ مِرحِمِتینی اُز پِیداسینا اویتگِدیَرلِر و یِکه آقامیز و تانگریمیز عیسی مسیحی رِد اِدیَرلِر. اُلارینگ جِزاسی قادیمدان بَری یازیلیپ قُیلاندیر. 5 بو زاتلارینگ هِمّه‌سینی اُزال بیلیَن هِم بُلسانگیز، مونی سیزه یادلاتماقچی بُلیارین: خودای اسرائیل خالقینی مصر قولچولیغیندان آزاد اِتدی، اِمّا سُنگرا ایمان گِتیرمِدیک آداملاری هِلَک اِدیپ زینگدی. 6 اولی مِرتِبه‌لِرینی ساقلامان، مِسکِن توتان یِرلِرینی تِرک اِدِن پِریشده‌لِری هِم اُل توم قارانگقیلیقدا زینجیرلار بیلِن اِبِدیلیک باغلادی. اُلاری قیامات گونونگ مَحکِمه‌سینه چِنلی شُل یِرده ساقلایار. 7 شِیله-ده سُدوم بیلِن غَموره‌نینگ و اُلارینگ اِطرافینداقی شَهرلِری هِم اِدیل شُل پِریشده‌لِر یالی اِتدیلِر، آداملاری زیناکَرلیگه گُوون بِریپ، فاسیقچیلیغا یوز اوردولار. شُنونگ اوچین اُلار اِبِدی اُددا یانماق جِزاسینی چِکیپ، هِمّه‌لِره بیلدیرمِک اوچین دِرس بُلدولار. 8 شُنونگ یالی، آرانگیزا سوملوپ گیرِن بو خودایسیز آداملار گُرِن دیشلِرینه دایانیپ، اُز بِدِنلِرینی نِجیس اِدیَرلِر. خودایینگ حُکومدارلیغینی رِد اِدیَرلِر، آسمانداقی گویچلِره تُهمِت اوریارلار. 9 اِمّا حتّیٰ باش پِریشده میکاییل موسانینگ جِسِدی بارادا شِیطان بیلِن چِکِلِشِنده، شِیطانا قارشی تُهمِت و مَحکوم اِتمَگه یورِک اِتمِدی. قایتام، دینگه: «سِنی خودایینگ اُزی کَییسین!» دییدی. 10 اِمّا بو دیش گُریَن آداملار بیلمِیَن زاتلارینا تُهمِتلِیَرلِر. اُلار اِدیل دوشونجِسیز حایوانلار یالی، اُز اوغرونا حِرِکِت اِدیپ، ایسلَن زاتلارینی اِدیَرلِر، بو زاتلار هِم اُلاری هِلَک اِدیَر. 11 اُلارینگ حالینا وای! اُلار قابیلینگ یُلونی توتویارلار. بَلعام یالی، پول اوچین آداملاری آلدایارلار. قورِح یالی باش قالدیراندیقلاری اوچین هِلَک بُلیارلار. 12 بو آداملار سیزینگ اوچین قُرقونچدیر، اُلار اُز قارینلارینی دُیورماق اوچین سیزینگ بیلِن ضیافات اویشمِلِکلِرده اییّپ-ایچیَرلِر. یِل بیلِن کُولان یاغمییانسیز بولوتلار کیمین، گویزده میوه بِرمِیَن باغلار کیمیندیرلِر. اُلار ایکی گِزِک اُلِن و کُکوندِن قُفاریلیپ زینگالاندیرلار. 13 اُلارینگ شِر ایشلِری بولانچاق سو مُوجلِری یالی اَشکَر بُلیار و اُزلِری-ده سِرگِردان ییلدیزلار کیمیندیر. توم قارانگقیلیق اُلار اوچین اِبِدیلیک ساقلانیار. 14 آدام آتادان سُنگرا یِدینجی نِسل بُلان خَنوخ هِم بو آداملار حاقدا اُنگدِن شِیله خابار بِریپدیر: «اینه، تانگری مونگلِرچه مونگلِر اُز مُقادِّسلِری بیلِن گِلیَر. 15 اُل هِمّه آدامزادا قاضیلیق اِدِر، گونَه اِدِن خودایسیزلاری حُکوم اِدِر. خودایسیزلارینگ یامان اِتمیشلِرینی و اُنگا کُفر آیداندیقلاری اوچین اُلاری جِزالاندیرار.» 16 اُلار هِمّه زاتدان نارضا بُلوپ، زِیرِنیپ یُرِندیرلِر. دینگه اُز یامان هُوِسلِرینینگ ایزینا دوشیَندیرلِر. غُرورلی گورلَپ، اُز پِیداسینی گُزلَپ، ایکی‌یوزلیلیک اِدیَندیرلِر. بیلدیریشلِر و ناصیحاتلار 17 سیز بُلسا، اِی عزیزلِر، تانگریمیز عیسی مسیحینگ رِسول‍لارینینگ اُنگدِن آیدانلارینی یادینگیزدا ساقلانگ. 18 اُلار سیزه: «دونیَه‌نینگ آخیرقی گونلِرینده اُز تِن هُوِسلِرینی راضیلاندیریان ماسغاراچیلار گُرونِر» دییّپدیلِر. 19 بولار سیزینگ آرانگیزا آیرالیق سالیپ، اُز اینسان دوشونجِلِرینه گُرَه یاشایان آداملاردیر و مُقادِّس روحدان ماحرومدیرلار. 20 اِمّا، اِی عزیزلِر، سیز اُزونگیزی اولی مُقادِّس ایمانینگیزینگ اوستونه قُروپ و مُقادِّس روحدان دُغا اِدینگ. 21 تانگریمیز عیسی مسیح اُز رِحمدارلیغینگ اوستو بیلِن سیزی اِبِدی یاشایشا قاوشوریانچا، خودایینگ سُیگوسی بیلِن یاشاماغی دُوام اِتدیرینگ. 22 شِک اِدیَن آداملارا رِحم-شِپاقاتلی بُلونگ. 23 باشغالاری گِلِجِکّی جِزا اُدوندان چِکیپ نِجات بِرینگ. کَبیرلِرینه بُلسا، خودایدان قُرقماق بیلِن رِحم اِدینگ. شُنونگ بیلِن، حتّیٰ اُلارینگ تِن هُوِسلِری بیلِن کیرلِنِن لِباسلاریندان-دا ییگرِنینگ. خودایا اُوگی 24 ایماندا بودریمِز یالی، خودای سیزی قُریماغی و شاتلیقدان دُلدوریپ، اُز اولی و بِییک حوضورینا سیزی عایپسیز گِتیرمِگی باشاریاندیر. 25 شُنونگ اوچین تانگریمیز عیسی مسیحینگ اوستو بیلِن یِکِجه نِجات بِریَنچیمیز خودایا بِییکلیک، اولیلیق، گویچ-قودرات و ایختییارلیق اِزِلدِن، حَضیر و تا اِبِد بُلسون! اَمین. |
© Turkmen Truth