یوحنا 20 - مُقادِّس کیتابعیسی دیرِلیَر مَتّیٰ ۲۸:۱-۸ ؛ مَرقُس ۱۶:۱-۸ ؛ لوقا ۲۴:۱-۱۲ 1 یِکشَنبه گونی، هِنیز قارانگقیقا، مَجدَلَلی مریم ایردِن قابرا باردی. گُرسه، قابرینگ آغزیندان داش آیریلیپدیر. 2 شُندا اُل شمعون پِطرُس بیلِن عیسانینگ سُیگولی شَگیردینینگ یانینا یُرتوپ باریپ، اُلارا: «آقامیزی قابردان چیقاریپ اَکیدیپدیرلِر. اُنی نیرِده قُیاندیقلارینی بیلمِیَریس» دییدی. 3 پِطرُس بیلِن بِیلِکی شَگیرت دِرِّو قابرا طاراف یُلا دوشدولِر. 4 اُلارینگ ایکیسی-ده یُرتیاردیلار، یُنه بِیلِکی شَگیرت پِطرُسدان باسیم یُرتوپ، قابرا اُندان اُوونچَک باردی. 5 اُل اِنگیلیپ سِراِدِنده، قابرینگ ایچینده کِفِنینگ یاتاندیغینی گُردی، یُنه ایچِریک گیرمِدی. 6-7 شُل واقت اُنونگ ایزیندان شمعون پِطرُس هِم گِلدی. اُل قابرا گیریپ، یِرده یاتان کِفِنی و عیسانینگ باشینا اُرالان یالیقی گُردی. اِمّا یالیق کِفِن بیلِن بیر یِرده بُلمان، آیری بیر یِرده چُزولیپ یاتیردی. 8 سُنگرا اُل یِره بیرینجی بُلوپ باران شَگیرت هِم قابرینگ ایچینه گیردی. مونی گُروپ، اُل عیسانینگ دیرِلِندیگینه ایناندی. 9 شُل واقتا اُلار مُقادِّس یازغیلاردا عیسانینگ دیرِلجِکدیگی بارادا آیدیلان سُزلِره هِنیزِم دوشونمَندیلِر. عیسی مَجدَلَلی مریمه گُرونیَر مَتّیٰ ۲۸:۹-۱۰ ؛ مَرقُس ۱۶:۹-۱۱ 10 بو واقالاردان سُنگ شَگیرتلِر یِنه اُیلِرنَه قایتدیلار. 11 مریم بُلسا قابرینگ آغزیندا دوروپ آغلایاردی. اُل گُزیاش اِدیپ دورقا، قابرینگ ایچینه اِنگیلیپ سِراِدِنده، 12 آق لِباسلی ایکی سانی پِریشدَه گُزی دوشدی. اُلارینگ بیری عیسانینگ جِسِدینینگ یاتان یِرینینگ باشوجوندا، بِیلِکیسی-ده آیاغوجوندا اُتیردی. 13 اُلار اُندان: «اِی آیال، نَمه اوچین آغلایارسینگ؟» دییّپ سُرادیلار. مریم اُلارا: «مِنینگ آقامی قابردان چیقاریپ آلیپ گیدیپدیرلِر. اُنی نیرِده قُیاندیقلارینی بیلمِیَرین» دییدی. 14 شِیله دییّپ، آرقاسینا اُورولِنده، اُل یِرده عیسانینگ دوراندیغینی گُردی، یُنه اُنی تانیمادی. 15 عیسی اُنگا: «اِی آیال، نَمه اوچین آغلایارسینگ؟ کیمی گُزلِیَرسینگ؟» دییدی. مریم اُنگا باغباندیر گومَن اِدیپ: «اِی آقا، اُنی قابردان سِن اَکیدِن بُلسانگ، نیرِده قُیانینگی مانگا آیت، مِن اُنی آلیپ گیدِیین» دییدی. 16 عیسی اُنگا: «مریم!» دییدی. اُل هِم اُنگا طاراف قانگریلیپ سِراِدیپ: «رابّونی!» دییدی. (بو عِبرانیچا یَعنی «اِی اُستادیم»). 17 عیسی اُنگا: «مانگا قُلایلاشما، سِبَبی مِن هِنیز آتامینگ یانینا چیقامُق. سِن دُغانلاریمینگ یانینا گیدیپ، اُلارا مِن آسمانا، آتامینگ و خوداییمینگ یانینا باریانیمی آیت. اُل سیزینگ-ده آتانگیزدیر و خودایینگیزدیر» دییدی. 18 مَجدَلَلی مریم شَگیرتلِرینگ یانینا گیتدی. اُلارا: «عیسانی گُردوم!» دییّپ، عیسانینگ اُزونه آیدانلارینی شَگیرتلِره خابار بِردی. عیسی شَگیرتلِرینه گُرونیَر مَتّیٰ ۲۸:۱۶-۲۰ ؛ مَرقُس ۱۶:۱۴-۱۸ ؛ لوقا ۲۴:۳۶-۴۹ 19 شُل یِکشَنبه گونی آغشامارا عیسانینگ شَگیرتلِری اویشوپ، یَهودیلِردِن قُرقولارینا قاپیلاری قولپلاپ اُتیردیلار. بیردِن عیسی اُلارینگ آراسیندا گُرونوپ: «سیزه سالاماتلیق بُلسون!» دییدی. 20 مونی آیدیپ، اُلارا اُز اِل‍لِرینی، بُورونی گُرکِزدی. شَگیرتلِری عیسانی گُروپ شاتلاندیلار. 21 عیسی اُلارا یِنه-ده: «سیزه سالاماتلیق بُلسون! آتامینگ مِنی ایبِریشی یالی، مِن هِم سیزی ایبِریَرین» دییدی. 22 شِیله دییّپ، اُلارینگ اوستونه اوفلَپ گُیبِردی-ده: «مُقادِّس روحی قابول اِدینگ. 23 سیز کیمینگ گونَه‌سینی باغیشلاسانگیز، شُل باغیشلانار، کیمینگ گونَه‌سینی باغیشلاماسانگیز، شُل باغیشلانماز» دییدی. عیسی توما گُرونیَر 24 عیسی گِلِن واقتی اُن ایکی شَگیرتلِرینگ بیری، اِکیز لاقابلی توما دییِن شَگیرت اُلارینگ یانیندا دَلدی. 25 بِیلِکی شَگیرتلِر اُنگا: «عیسانی گُردوک!» دییدیلِر. اِمّا توما اُلارا: «مِن اُنونگ اِل‍لِرینده چویلِرینگ یِرینی گُروپ، شُل یِرلِره بارماقلاریمی دِگیرمِسِم، بُورونی اِلَّپ گُرمِسِم، آصلا اینانمارین» دییدی. 26 سِکیز گوندِن سُنگ، شَگیرتلِر یِنه اُیده اویشوپ اُتیردیلار. بو گِزِک توما هِم اُلارینگ آراسیندادی. قاپیلار قولپلی بُلسا-دا، عیسی اُیه گیریپ، اُلارینگ آراسیندا دوردی. اُل: «سیزه سالاماتلیق بُلسون!» دییدی. 27 اُنسُنگ عیسی تومانینگ یانینا باریپ، اُنگا: «بارماغینگی بو یِره دِگیر، اِل‍لِریمه سِراِت! اِلینگی اوزات-دا، بُورومه دِگیر. شِکلِنمَنی بِس اِت، ایمانلی بُل» دییدی. 28 توما اُنگا: «سِن مِنینگ تانگریم و مِنینگ خوداییمسینگ!» دییدی. 29 عیسی اُنگا: «سِن مِنی گُرِنینگ اوچین ایمان گِتیردینگ. گُرمَن ایمان گِتیرِنلِر نَهیلی خوشواقت!» دییدی. 30 عیسی شَگیرتلِرینینگ یانیندا بو کیتاپدا یازیلمادیق باشغا-دا کَن عالاماتلار گُرکِزدی. 31 یُنه بولار سیزینگ عیسانینگ خودایینگ اُغلی مسیحدیگینه ایمان گِتیرمِگینگیز اوچین و ایمان گِتیریپ، اُنونگ آدی بیلِن یاشایشا قاووشماغینگیز اوچین یازیلدی. |
© Turkmen Truth