یوحنا 15 - مُقادِّس کیتاباوزوم باغی و شاخالار 1 «مِن حاقیقی اوزوم باغیدیرین و آتام باغباندیر. 2 اُل مِنینگ میوه بِرمِیَن هِر بیر شاخامی کِسیپ زینگیار، میوه بِریَنینی بُلسا کَن میوه بِرِر یالی اُل اُنی پَکلِیَر. 3 مِنینگ سیزه آیدان سُزوم اوستو بیلِن سیز ایندی پَکسینگیز. 4 مِنده یاشانگ، مِن هِم سیزده یاشایین. اوزوم باغیندان آیریلان شاخا اُز-اُزوندِن میوه بِریپ بیلمِیشی یالی، مِندِن آیریلسانگیز، سیز هِم میوه بِریپ بیلمِرسینگیز. 5 «مِن اوزوم باغیدیرین، سیز شاخالاریسینگیز. کیم مِنده و مِن هِم اُندا یاشاسام، اُل بُل میوه بِرِر. سیز مِندِن آیری هیچ زات اِدیپ بیلمِرسینگیز. 6 کیم مِنده یاشاماسا، کِسیلِن شاخا کیمین زینگیلیپ، قورار. قوران شاخالاری بُلسا ییغناپ، اُدا یاقارلار. 7 مِنده مِسکِن توتوپ، سُزلِریمی یورِگینگیزده ساقلاسانگیز، نَمه دیلِسِنگیز، سیزه بِریلِر. 8 سیز کَن میوه بِریپ، مِنینگ شَگیرتلِریمدیگینگیزی گُرکِزِرسینگیز. مونونگ اوستو بیلِن آتام بِییکلِنِر. 9 آتامینگ مِنی سُیشی یالی، مِن-ده سیزی سُیدوم. مِنینگ سُیگیمده قالینگ. 10 مِن آتامینگ حُکوملِرینی بِرجای اِدیپ، اُنونگ سُیگوسینه وِفالی بُلشوم یالی، سیز هِم حُکوملِریمی بِرجای اِتسِنگیز، مِنینگ سُیگیمه وِفالی بُلارسینگیز. 11 مِن بو زاتلاری سیزه شاتلیغیما شِریک بُلوپ، شاتلیغینگیزینگ دُلوپ-آقماغی اوچین آیتدیم. 12 «مِنینگ حُکومیم شودور: مِن سیزی نَهیلی سُیِن بُلسام، سیز هِم بیری-بیرینگیزی شُنونگ یالی سُیونگ. 13 کیم جانینی دُستلاری اوچین فِدا اِتسه، موندان بِییک سُیگی یُقدور. 14 اِگِر حُکوملِریمی بِرجای اِتسِنگیز، مِنینگ دُستلاریم بُلارسینگیز. 15 موندان بِیلَک مِن سیزه قول دییمِرین، سِبَبی قول آقاسینینگ نَمه اِدیَنینی بیلیَن دَلدیر. مِن سیزه دُست دییَّرین، سِبَبی آتامدان اِشیدِن هِمّه زاتلاریمی سیزه آیتدیم. 16 سیز مِنی دَل-ده، مِن سیزی سایلادیم. مِن سیزینگ گیدیپ، هیچ سُلمایان میوه بِرمِگینگیز اوچین سایلاپ-سِچدیم. شُنگا گُرَه مِنینگ آدیم بیلِن آتادان نَمه دیلِسِنگیز، اُل سیزه بِرِر. 17 مِنینگ سیزه حُکومیم شودور: بیری-بیرینگیزی سُیونگ. دونیَه شَگیرتلِردِن ییگرِنیَر 18 «دونیَه سیزی ییگرِنیَن بُلسا، اُنونگ سیزدِن اُنگ مِنی ییگرِنِندیگینی بیلینگ. 19 دونیَه‌دِن بُلان بُلسادینگیز، دونیَه سیزی اُزونینگکیلِر کیمین سُیِردی. اِمّا سیز بو دونیَه دِگیشلی دَلسینگیز. مِن سیزی بو دونیَه‌دِن سایلاپ آلدیم. اینه، شُنونگ اوچین هِم، دونیَه سیزی ییگرِنیَر. 20 مِن سیزه: ”قول آقاسیندان بِییک دَلدیر“ دییِن سُزومی یادینگیزا سالینگ. اُلار مِنی آزارلاسالار، اُندا سیزی-ده آزارلارلار. مِنینگ سُزومی بِرجای اِتسِلِر، سیزینگکینی-ده بِرجای اِدِرلِر. 21 اُلار سیزه بو زاتلارینگ هِمّه‌سینی مِنینگ آدیم اوچین اِدِرلِر، سِبَبی اُلار مِنی ایبِرِنی تانیمییارلار. 22 مِن گِلیپ، اُلارا آیتمادیق بُلسادیم، اُلار گونَه‌کَر بُلمازدیلار. ایندی بُلسا اِدِن گونَه‌لِری اوچین باهانا تاپیپ بیلمِزلِر. 23 مِنی ییگرِنیَن مِنینگ آتامی-دا ییگرِنیَندیر. 24 اِگِر مِن اُلارینگ آراسیندا باشغا هیچ کیمینگ باشارمادیق ایشلِرینی گُرکِزمِدیک بُلسام، گونَه‌لی بُلمازدیلار. ایندی بُلسا اِدِن ایشلِریمی گُرسِلِر-ده، مِندِن هِم و آتامدان هِم ییگرِندیلِر. 25 بو بُلسا تُورات‌یندا: ”مِندِن ناحاق یِره ییگرِندیلِر“ دییّپ یازیلان سُزلِرینگ بِرجای بُلماغی اوچیندیر. 26 «مِن سیزه آتامدان ایبِرجِک حِمایاتچیم، یَعنی آتامدان چیقان حاقیقات روحی گِلِنده، مِن حاقدا شاهاتلیق اِدِر. 27 سیز هِم شاهاتلیق اِدِرسینگیز، سِبَبی اُزال-باشدان مِنینگ بیلِن بیله بُلدونگیز.» |
© Turkmen Truth