یوحنا 10 - مُقادِّس کیتابقاوی چُپان 1 عیسی یِنه-ده سُزه باشلادی: «مِن سیزه دُغروسینی آیدیارین، قُیون آخُرینگ قاپیسیندان گیرمَن، باشغا یِریندِن آشیپ گیریَن آدام اُغری هِم یُل کِسِنچیدیر. 2 اِمّا قاپیدان گیریَن آدام بُلسا قُیونلارینگ چُپانیدیر. 3 ساقچی اُنگا قاپینی آچیپ بِریَندیر. قُیونلار چُپانینگ سِسینی اِشیدیَندیرلِر. چُپان هِم قُیونلارینی آد-آدینا چاغیریپ، اُلاری داشاریق چیقاریاندیر. 4 چُپان قُیونلارینی آخُردان آلیپ چیقاراندان سُنگ، اُلارینگ اُووندِن یُرییَندیر، اُنونگ سِسینی تانییان قُیونلار بُلسا، اُنونگ ایزینا دوشیَندیرلِر. 5 اُلار بیگانه‌نینگ ایزینا دوشیَن دَلدیرلِر، اُندان قاچیاندیرلار، سِبَبی بیگانه‌نینگ سِسینی تانییان دَلدیرلِر.» 6 شِیدیپ، عیسی اُلارا بو میثالی گورّونگ بِردی، اِمّا اُلار مونونگ مَعنیسینه دوشونمِدیلِر. 7 عیسی یِنه-ده اُلارا شِیله دییدی: «مِن سیزه دُغروسینی آیدیارین، قُیون آخُرینگ قاپیسی مِندیرین. 8 مِندِن اُنگ گِلِنلِرینگ هِمّه‌سی اُغری هِم یُل کِسِنچیدیلِر، یُنه قُیونلار اُلارا قولاق آسمادیلار. 9 قاپی مِندیرین. کیم مِندِن گیرسه، نِجات تاپار. اُل گیریپ-چیقیپ، اُزونه اُتلیق تاپار. 10 اُغری دینگه اُغورلاماق، اُلدورمِک و یُق اِتمِک اوچین گِلیَندیر. اِمّا مِن اُلارا یاشاییش، بُل یاشاییش بِرمِک اوچین گِلدیم. 11 «مِن قاوی چُپاندیرین. قاوی چُپان قُیونلار اوچین جانینی فِدا اِدیَندیر. 12 حاقینا توتولان آدام قُیونلارینگ حاقیقی چُپانی یا-دا اِیه‌سی دَلدیر. شُنونگ اوچین اُل قوردینگ گِلیَنینی گُرسه، قُیونلاری قُیوپ قاچیاندیر. قورت سورینینگ اوستونه چُزوپ، اُلاری دارغادیاندیر. 13 اُل آدام قاچیپ گیدِر، سِبَبی اُل حاقینا توتولاندیر. اُل قُیونلار حاقدا هیچ هیلی قایغی اِتمِز. 14-15 مِن قاوی چُپاندیرین. اِدیل آتامینگ مِنی، مِن هِم آتامی تانیشیم یالی، مِن قُیونلاریمی تانییاندیرین. اُلار-دا مِنی تانییاندیرلار. مِن قُیونلاریم اوچین جانیمی فِدا اِدیَرین. 16 مِنینگ بو آخُردان باشغا-دا قُیونلاریم بار. مِن اُلاری هِم ییغنامالیدیرین. اُلار هِم مِنینگ سِسیمی اِشیدِرلِر، شُندا بیر سوری، بیر چُپان بُلار. 17 «مِن جانیمی قایتادان آلماق اوچین فِدا اِدیَرین. شُل سِبَپدِن آتام مِنی سُییَر. 18 جانیمی مِندِن هیچ کیم آلمایار، اُزوم فِدا اِدیَرین. مِن جانیمی فِدا اِتمَگه-ده، اُنی قایتادان آلماغا-دا ایختییاریم بار. مِن بو تابشیریغی آتامدان آلدیم.» 19 بو سُزلِر سِبَپلی، یَهودیلِرینگ آراسینا یِنه-ده اُنگوشماسیزلیق بُلدی. 20 اُلارینگ کَنسی: «اُنی جین اوروپدیر، اُل دیوانا بُلوپدیر. نَمه اوچین سیز اُنی دینگلِیَرسینگیز؟» دییدیلِر. 21 باشغالار بُلسا: «بولار دیوانا آدامینگ آیتجاق سُزلِری دَل. جین کُرلِرینگ گُزونی آچیپ بیلِرمی؟» دییدیلِر. یَهودی باشلیغلارینگ ایمانسیزلیغی 22 شُل واقت قیشدی و اورشلیمده واقف بایرامچیلیغی اِدیلیَردی. 23 عیسی عیباداتخانادا سلیمانینگ اِیوانی دییِن یِرده گِزمِلَپ یُردی. 24 یَهودی باشلیغلاری اُنونگ داشینا اویشوپ: «سِن هاچانا چِنلی بیزی شِکده ساقلاپ قُیجاق؟ اِگِر مسیح بُلسانگ، آچیغینی آیت» دییدیلِر. 25 عیسی اُلارا: «مِن سیزه آیتدیم، یُنه سیز ایمان گِتیرمِیَرسینگیز. آتامینگ آدی بیلِن گُرکِزِن ایشلِریم مِنینگ کیمدیگیمه شاهاتلیق اِدیَر. 26 یُنه سیز ایمان گِتیرمِیَرسینگیز، سِبَبی سیزه آیدیشیم یالی، سیز مِنینگ قُیونلاریمدان دَل. 27 مِنینگ قُیونلاریم سِسیمه قولاق آسیار، مِن هِم اُلاری تانییارین، اُلار مِنینگ ایزیما دوشیَرلِر. 28 مِن اُلارا اِبِدی یاشاییش بِریَرین. اُلار آصلا هِلَک بُلماز، هیچ کیم اُلاری مِنینگ اِلیمدِن قاقیپ آلماز. 29 اُلاری مانگا بِرِن آتام هِمّه‌دِن بِییکدیر. آتامینگ اِلیندِن اُلاری هیچ کیم آلیپ بیلمِز. 30 مِن و آتام بیردیریس» دییّپ جُغاپ بِردی. 31 یَهودی باشلیغلاری اُنی داشلاجاق بُلوپ، یِنه یِردِن داش آلدیلار. 32 عیسی اُلارا: «مِن آتام طارافیندان سیزه کَن یاخشیلیقلار اِتدیم. بولارینگ هایسیسی اوچین مِنی داشلاجاق بُلیارسینگیز؟» دییدی. 33 یَهودی باشلیقلاری اُنگا: «بیز سِنی یاخشی ایش اِدیَنلیگینگ اوچین دَل-ده، خودایا دیل یِتیریَنلیگینگ اوچین، یَعنی اینسان حالینگا اُزونگی خودای حاساپلایانلیغینگ اوچین داشلاجاق بُلیاریس» دییدیلِر. 34 عیسی اُلارا شِیله دییدی: «شِریغاتینگیزدا: ”مِن دییَّرین: سیز خودایلارسینگیز“ دییّپ یازیلان دَلمی؟ 35 مُقادِّس یازغیلاری اویتگِدیپ بُلمایاندیغینی بیلِنگزُقمی نَمه؟ خودایینگ سُزی گِلِن آداملارا ”خودایلار“ دییلیپ آدلاندیریلان بُلسا، 36 اُندا نَمه مِنی خودایینگ اُغلی دییِنیم اوچین کُفر آیدیان حاساپلایارسینگیز؟ مِنی بُلسا آتام اُزی اوچین سایلاپ-سِچیپ، دونیَه ایبِردی. 37 مِن آتامینگ ایشلِرینی اِتمِیَن بُلسام، اُندا مانگا ایمان گِتیرمَنگ. 38 اِگِر-ده اُنونگ ایشلِرینی اِدیَن بُلسام، اُندا مانگا اینانماسانگیز-دا، اِدیَن ایشلِریمه اینانینگ. شُندا آتانینگ مِندِدیگینی، مِن هِم آتادادیغیما آچیق گُز یِتیرِرسینگیز.» 39 شُندا اُنی یِنه توتجاق بُلدولار، اِمّا عیسی اُلارینگ اِل‍لِریندِن سیپیپ قاچدی. 40 عیسی یِنه-ده اُردُن آرناسینینگ آنگری طارافینا، اُوال یحیانینگ آداملاری تَعمید بِرِن یِرینه گیتدی و شُل یِرده قالدی. 41 کَن آداملار اُنونگ یانینا گِلیپ: «یحیی هیچ هیلی عالامات گُرکِزمِسه-ده، اُنونگ بو آدام حاقدَکی آیدانلارینینگ باری دُغری میشدیق» دییّشدیلِر. 42 شِیلِلیکده، اُل یِرده کَن آداملار عیسی ایمان گِتیردیلِر. |
© Turkmen Truth