یوحنا 1 - مُقادِّس کیتابسُز 1 اُوال-باشدا سُز باردی، سُز خودای بیلِندی و سُز خودایینگ اُزودی. 2 اُوال-باشدا سُز خودای بیلِندی. 3 هِمّه زاد سُز اوستو بیلِن یارادیلدی و یارادیلان زاتلارینگ هیچ بیری اُنسوز یارادیلمادی. 4 سُزده یاشاییش باردیر، بو یاشاییش اینسانلارینگ نوری بُلدی. 5 نور قارانگقیلیقدا پارلایاندیر، قارانگقیلیق بُلسا اُنی یِنگیپ بیلیَن دَلدیر. 6 خودای طارافیندان یحیی آدلی بیر آدام ایبِریلدی. 7 یحیی نور بارادا شاهاتلیق اِتمَگه و اُز شاهاتلیغی اوستو بیلِن هِمّه‌لِری ایناندیرماغا گِلدی. 8 یحیانینگ اُزی نور دَلدی، اُل دینگه نور بارادا شاهاتلیق اِتمَگه گِلدی. 9 هِر بیر اینسانی نورلاندیریان حاقیقی نور دونیَه گِلیَردی. 10 اُل دونیَه‌دِدی، دونیَه سُز اوستو بیلِن یارادیلیپدی، اِمّا دونیَه اُنی تانیمادی. 11 اُل اُزونینگکیلِره گِلدی، اِمّا اُلار اُنی قابول اِتمِدیلِر. 12 اُل اُزونی قابول اِدیپ، آدینا ایمان گِتیرِنلِرینگ هِمّه‌سینه خودایینگ فِرزِنتلِری بُلماق حاقینی بِردی. 13 اُلار نه تِن، نه اینسان ایسلِگیندِن، نه-ده اِرکِک هُوِسیندِن دُغوپدیلار، اُندان باشغا، خودای طارافیندان دُغلان فِرزِنتلِردیر. 14 سُز اینسان بُلوپ، آرامیزدا گِلیپ یاشادی. اُل مِرحِمِتدِن و حاقیقاتدان دُلودی. بیز اُنونگ بِییکلیگینی، یَعنی آتادان گِلِن یِکِجه اُغلونینگ بِییکلیگینی گُردوک. 15 یحیی عیسی بارادا شاهاتلیق اِدیپ، قاتی سِس بیلِن: «اینه، مِندِن سُنگرا گِلجِک مِندِن یُقاریدیر، سِبَبی اُل مِندِن هِم اُوال باردی دییِنیم شودور» دییّپ قیغیریاردی. 16 بیزینگ هِمَّه‌میز اُنونگ دُلیلیغیندان مِرحِمِت اوستونه مِرحِمِت آلدیق. 17 چونکی شِریغات موسانینگ اوستو بیلِن بِریلدی، اِمّا مِرحِمِت و حاقیقات بُلسا عیسی مسیحینگ اوستو بیلِن گُروندی. 18 هیچ کیم هیچ هاچان خودایی گُرِن دَلدیر، اُنی بیزه آتاسینینگ قوجاغینداقی، اُزی-ده خودای بُلان یِکِجه اُغلی تانیتدی. یحیی تَعمید بِریَنچینینگ شاهاتلیغی مَتّیٰ ۳:۱-۱۲ ؛ مَرقُس ۱:۱-۸ ؛ لوقا ۳:۱-۱۸ 19 اینه، یَهودی باشلیقلاری اورشلیمدِن کاهینلاری و لاویلاری یحیانینگ یانینا ایبِردیلِر. اُلار یحیادان: «سِن کیم؟» دییّپ سُرادیلار. 20 یحیی سُزونی اینکَر اِتمِدی، اُل شاهاتلیق اِدیپ: «مِن مسیح دَل» دییّپ، آچیق ایقرار اِتدی. 21 اُلار اُندان: «اُندا سِن کیم؟ بِلکی، اِلیاس‌سینگ؟» دییّپ سُرادیلار. یحیی: «یُق» دییّپ جُغاپ بِردی. اُلار یِنه-ده: «اُندا شُل قاراشیلیان پیغامبارمینگ؟» دییّپ سُرادیلار. اُل: «یُق، مِن اُل دَل» دییّپ جُغاپ بِردی. 22 آخیری اُلار: «اُندا سِن کیم؟ بیز اُزومیزی یُلّانلارا نَمه جُغاپ بِرِیلی؟ سِن اُزونگ حاقدا نَمه آیدیپ بیلجِک؟» دییّپ سُرادیلار. 23 یحیی اِشعیا پیغامبارینگ سُزلِری بیلِن جُغاپ بِریپ: «اینه، شُل، ”خودایینگ یُلونی دُغرولانگ“ دییّپ، بیاباندا قیغیریانینگ سِسی مِندیرین» دییدی. 24 اُنسُنگ اُنونگ یانینا ایبِریلِن کَبیر فَریسی‌لِر: 25 «سِن مسیحِم، اِلیاس‌ام، قاراشیلیان پیغامبارام دَل بُلسانگ، اُندا نَمه اوچین آداملاری تَعمید بِریَرسینگ؟» دییّپ سُرادیلار. 26 یحیی اُلارا: «هاووا، مِن آداملاری سووا تَعمید بِریَرین، اِمّا آرانگیزدا بیری بار، سیز اُنی تانیمییارسینگیز. 27 اُل مِندِن سُنگرا گِلجِکدیر. مِن اُنونگ کُووشینینگ باغینی چُزمَگه-ده میناسیپ دَلدیرین» دییّپ جُغاپ بِردی. 28 بو واقالارینگ هِمّه‌سی اُردُن آرناسینینگ یُقارسینداقی بِیت‌عَنیادا، یحیانینگ تَعمید بِریَن یِرینده بُلوپ گِچدی. 29 اِرتِسی گونی یحیی اُز یانینا گِلیَن عیسانی گُروپ، شِیله دییدی: «اینه، دونیَه‌نی گونَه‌دِن گُتِریَن خودایینگ قوزوسی! 30 سیزه: ”مِندِن سُنگرا بیری گِلِر، اُل مِندِن اوستوندیر، سِبَبی اُل مِندِن هِم اُوال باردی“ دییّپ آیدان کیشیم شودور. 31 باشدا مِن هِم اُنونگ کیمدیگینی تانیمییاردیم، اِمّا مِنینگ آداملاری سووا تَعمید بِرمَگه گِلمِگیمینگ ماقصادی اُنی اسرائیل خالقینا تانیتماقدیر.» 32 یحیی یِنه شاهاتلیق اِدیپ، شِیله دییدی: «مِن مُقادِّس روحونگ آسماندان کِپدِری کیمین اینیپ، اُنونگ اوستونه قُنانینی گُردوم. 33 شُل واقت مِن اُنونگ کیمدیگینی تانیمییاردیم، اِمّا آداملاری سووا تَعمید بِرجِک اوچین مِنی ایبِرِن: ”مُقادِّس روحونگ کیمینگ اوستونه اینِنینی گُرسِنگ، آداملاری مُقادِّس روحا تَعمید بِرجِک شُلدور“ دییدی. 34 مِن مونی گُردوم و اُنونگ خودایینگ اُغلودیغینا شاهاتلیق اِدیَرین.» عیسانینگ اَوَّلکی شَگیرتلِری 35 اِرتِسی گون یحیی یِنه شُل یِردِدی، یانیندا-دا ایکی سانی شَگیردی باردی. 36 اُل گِچیپ باریان عیسانی گُروپ: «اینه، خودایینگ قوزوسی!» دییدی. 37 یحیانینگ سُزلِرینی اِشیدیپ، بو ایکی شَگیرت عیسانینگ ایزینا دوشوپ گیتدی. 38 عیسی قانگریلیپ، ایزینا دوشوپ گِلیَنلِری گُردی-ده، اُلاردان: «سیزه نَمه گِرِک؟» دییّپ سُرادی. اُلار: «رابّی! (یَعنی اِی اُستاد!). سِن نیرِده یاشایارسینگ؟» دییّپ سُرادیلار. 39 عیسی اُلارا: «مِنینگ ایزیما دوشونگ، گُرِرسینگیز» دییدی. شِیدیپ، اُلار عیسی بیلِن گیدیپ، اُنونگ نیرِده یاشایاندیغینی گُردولِر، شُل واقت اُیلَن ساغات دُرت تُوِرِگیدی. اُلار شُل گون اُنونگ یانیندا قالدیلار. 40 یحیادان عیسی حاقدا اِشیدیپ، اُنونگ ایزینا دوشوپ گیدِنلِرینگ بیری شمعون پِطرُسینگ دُغانی آندرِیاسدی. 41 آندرِیاس اَوَّل دُغانی شمعونی تاپیپ، اُنگا: «بیز مسیحی تاپدیق» دییدی. مسیح – خودایینگ سایلاپ-سِچِنی دییمِکدیر. 42 اُل دُغانینی عیسانینگ یانینا گِتیردی. عیسی شمعونا سِراِدیپ: «سِن یونانینگ اُغلی شمعونسینگ، یُنه سِن کِیفا دییلیپ آدلاندیریلارسینگ» دییدی. (کِیفا یَعنی قایا). 43 اِرتِسی گون عیسی جلیلَه گیتمِگی یورِگینه دوودی. اُل فیلیپُسی تاپیپ: «مِنینگ ایزیما دوش!» دییدی. 44 فیلیپُس هِم آندرِیاس بیلِن پِطرُس یالی بِیت‌صِیدا شَهریندِندی. 45 فیلیپُس ناتاناییلی تاپیپ، اُنگا: «بیز موسانینگ تُورات‌یندا و پیغامبارلارینگ یازغیلاریندا یازیلان آدامی تاپدیق. اُل ناصِره‌لی یوسفینگ اُغلی عیسی میشدیق!» دییدی. 46 ناتاناییل اُنگا: «ناصِره‌لی؟ اُل یِردِن، هی، بیر قاوی زات چیقارمیقا؟» دییدی. فیلیپُس هِم اُنگا: «گِل، گُرِرسینگ!» دییدی. 47 عیسی اُزونه طاراف گِلیَن ناتاناییلی گُروپ، اُل حاقدا: «اینه، یورِگی حیله‌سیز و حاقیقی اسرائیل‌لی» دییدی. 48 ناتاناییل اُندان: «سِن مِنی نیرِدِن تانییارسینگ؟» دییّپ سُرادی. عیسی اُنگا: «فیلیپُس سِنی هِنیز چاغیرمانقا، مِن سِنی اینجیر باغینینگ آشاغیندا گُردوم» دییّپ جُغاپ بِردی. 49 ناتاناییل اُنگا: «اُستاد، سِن خودایینگ اُغلوسینگ! سِن اسرائیل‌ینگ پادیشاهسیسینگ!» دییدی. 50 عیسی اُنگا: «سِنی اینجیر باغینینگ آشاغیندا گُردوم دییِنیم اوچین ایمان گِتیریَرسینگمی؟ سِن موندان-دا بِییک ایشلِری گُرِرسینگ» دییدی. 51 عیسی سُزونی دُوام اِدیپ: «سیزه دُغروسینی آیدیارین، ایندی سیز آسمانینگ آچیلیپ، خودایینگ پِریشده‌لِرینینگ اینسان اُغلونینگ اوستونه اینیپ-یُقاری گیدیشینی گُرِرسینگیز» دییدی. |
© Turkmen Truth