یعقوب 4 - مُقادِّس کیتابخودایا موطیع بُلونگ! 1 آرانگیزداقی اوروشلار و داعوا-جِنجِل‍لِر نیرِدِن دُرِیَر؟ یورِگینگیزده جِنگ اِدیَن یامان هُوِسلِرینگیزدِن دَلمی؟ 2 سیز بیر زادینگ حاسراتینی چِکیَرسینگیز، اِمّا قازانمایارسینگیز، طَمَع یوزوندِن آدام اُلدوریَرسینگیز، اِمّا هیچ بیر ماقصادینگیزا یِتیپ بیلمِیَرسینگیز، داعوا-جِنجِل‍لِر توروزیارسینگیز، اِمّا هیچ زات قازانمایارسینگیز، سِبَبی خودایدان دیلِمِیَرسینگیز. 3 دیلَنینگیزده-ده، هیچ زات آلمایارسینگیز، سِبَبی یامان نییِت بیلِن، اُز هُوِسلِرینگیزه خارجلاماق اوچین دیلِیَرسینگیز. 4 اِی بیوِفالار، دونیَه بیلِن دُستلوق خودایا دوشمان بُلیاندیغینی بیلمِیَرسینگیزمی؟ کیم دونیَه بیلِن دُست بُلسا، خودایا دوشمان بُلیاندیر. 5 سیز مُقادِّس یازغیلارداقی «خودایینگ بیزده مِسکِن توتدوران روحی خاص-دا قیسغانیپ کویسِیَندیر» دییلِن سُزلِر بُش یِره آیدیلاندیر دییّپ گومَن اِدیَرسینگیزمی؟ 6 اِمّا خودای بیزه خاص بِییک مِرحِمِت بِریَر. شُنگا گُرَه مُقادِّس یازغیلار شِیله دییَّر: «خودای مَغرورلارا قارشیدیر، اِمّا فُروتَنلِره مِرحِمِت اِدیَندیر». 7 شُنونگ اوچین خودایا موطیع بُلونگ! شِیطانینگ اُوونده دورونگ، شُندا اُل سیزدِن قاچار. 8 خودایا یاقینلاشینگ، اُل هِم سیزه یاقینلاشار. اِی گونَه‌کَرلِر، اِلینگیزی گونَه‌دِن پَکلَنگ. اِی ایکیگُوونلیلِر، یورِگینگیزی پَکلَنگ. 9 غاما باتینگ، یاس توتوپ آغلانگ! گولکونگیز یاسا، شاتلیغینگیز غام-غوصّا اُورولسین. 10 خودایینگ حوضوریندا فُروتَن بُلونگ، اُل سیزی یُقاری قالدیرار. 11 اِی عزیزلِر، بیری-بیرینگیزی یامانلامانگ. کیم ایمانلی اِرکِک یا-دا آیال دُغانینی یامانلایان یا-دا اُنی مَحکوم اِدیَن بُلسا، اُل خودایینگ شِریغاتینی یامانلاپ، شِریغاتی مَحکوم اِدیَندیر. شِریغاتی مَحکوم اِدیَن آدام اُنی بِرجای اِدیَنجی دَل-ده، اُنگا حُکوم اِدیَنجیدیر. 12 اِمّا شِریغاتینگ اِیه‌سی و قاضیسی بیردیر، اُل نِجات بِرمِگی-ده و هِلَک اِتمِگی-ده باشاریاندیر. باشغا آداملاری مَحکوم اِدِر یالی، سِن کیم بُلوپسینگ؟ اِرتیرکی گون بارادا پانگقارماق 13 ایندی: «بو گون یا اِرتیر فالان شَهره گیتجِک، بیر ییلی شُل یِرده گِچیرجِک، سُودا-ساتیش اِتجِک، پول قازانجاق» دییَّنلِر، مانگا قولاق آسینگ! 14 اِرتیر نَمه بُلجاغینی نیرِدِن بیلیَرسینگیز؟ سیزینگ عُمرونگیز نَمه؟ اُل آز سالیم گُرنوپ، سُنگرا یُق بُلیان سَحِر چیغی یالیدیر. 15 مونگا دِرِک: «خودای ایسلِسه، یاشاریس، اُنی یا-دا مونی اِدِریس» دییمِلیسینگیز. 16 سیز بُلسا اُز غُرورینگیز بیلِن پانگقاریارسینگیز. بِیله پانگقارمالارینگ باری یامانلیقدیر. 17 کیم یاخشیلیق اِتمِگی بیلیبده، اُنی اِتمِیَن بُلسا، اُل گونَه اِدیَندیر. |
© Turkmen Truth