یعقوب 2 - مُقادِّس کیتابطارافدارلیق اِتمَنگ 1 اِی عزیزلِر، بِییک تانگریمیز عیسی مسیحه بُلان ایمانینگیزی طارافدارلیق اِتمِکدِن ساقلانینگ. 2 سِبَبی، سیزینگ ییغناغینگیزا قیزیل یوزوک داقینیپ، باهالی لِباسلار گِینِن بای آدام بیلِن کُهنه-ییرتیق گِینِن قاریپ آدام گِلیپدیر. 3 اِگِر سیز بای آداما حُرمات قُیوپ: «گِلینگ، یُقاری گِچینگ» دییسِنگیز، اِمّا قاریبا: «سِن اُل یِرده دور» یا-دا «بو یِرده، آیاق آشاغیندا اُتور» دییسِنگیز، 4 بو سیزینگ طارافدارلیق اِتدیگینگیز بُلمازمی؟ یامان فیکرلی قاضیلارا مِنگزِمِیَرسینگیزمی؟ 5 قولاق آسینگ، اِی عزیزلِریم! خودای بو دونیَه‌ده قاریپلاری ایماندا بای بُلماقلاری اوچین سایلامادیمی؟ خودای اُزونی سُییَنلِره واعدا بِرشی یالی، قاریپلاری پادیشاهلیغینی میراث آلماقلاری اوچین سایلامادیمی نَمه؟ 6 اِمّا سیز قاریپلارا حُرمات قُیمایارسینگیز. یُغسام سیزه سِتِم اِدیَن بایلار دَلمی؟ سیزی مَحکِمَه چِکیَن هِم شُلار دَلمی؟ 7 سیزینگ دِگیشلی بُلان خودایینگیزینگ بِییک آدینا دیل یِتیریَنلِر هِم بایلار دَلمی نَمه؟ 8 اِگِر سیز مُقادِّس یازغیلارداقی: «هِمسایانی اُزونگی سُیشونگ یالی سُی» دییِن اینگ مُهِم حُکومی یِرینه یِتیریَن بُلسانگیز، دُغری ایش اِدیَنسینگیز. 9 اِمّا اِگِر آداملارا طارافدارلیق اِدیَن بُلسانگیز، گونَه اِدیَنسینگیز و شِریغاتینگ اُوونده شِریغاتی پُزان، مَحکوم بُلانیانسینگیز. 10 هِر کیم شِریغاتینگ هِمّه حُکوملِرینی بِرجای اِدیپ-ده، دینگه بیر زاتدا گونَه اِتسه، تامام شِریغاتی پُزان حاساپلانیاندیر. 11 سِبَبی «زینا اِتمه» دییِن خودای «آدام اُلدورمه» هِم دییِندیر. اِگِر سیز زینا اِتمِسِنگیز، اِمّا آدام اُلدورسِنگیز، شِریغاتی پُزان بُلیانسینگیز. 12 شُنونگ اوچین هِم، هِر بیر کِپینگیز و عِمِلینگیز آزادلیق بِریَن شِریغاتا گُرَه حُکوم اِدیلجِک آداملارینگقی یالی بُلسون. 13 سِبَبی رِحمسیز آداما رِحمسیزلیک بیلِن حُکوم اِدیلِر. اِمّا رِحملی آداما بُلسا رِحملیک بیلِن حُکوم اِدیلِر. ایمان و یاخشی عِمِل‍لِر 14 اِی عزیزلِر! آرانگیزدان بیری «ایمانیم بار» دییّپ هِم، اُنی یاخشی عِمِلی بیلِن گُرکِزمِسه، مونونگ نَمه پِیداسی بار؟ بِیله ایمان اُنی نِجات بِریپ بیلِرمی؟ 15 فیکر اِدیپ گُرونگ، ایمانلی اِرکِک یا-دا آیال دُغانینگیزینگ بیری آچ-یالانگاچ بُلسا، 16 سیز اُنگا اییمیت و گِییم بِرمَن، دینگه: «ساغامان بار، قیزماغینگی و دُیماغینگی دیلِیَرین» دییسِنگیز، بو سُزونگیز اُنگا نَمه پِیداسی بار؟ 17 ایمان باباتدا هِم شِیلِدیر، اِگِر عِمِل یوزونده گُرکِزیلمِسه، اُل اُز-اُزوندِن اُلودیر. 18 بیری بُلسا: «سِنینگ ایمانینگ بار، مِنینگ بُلسا یاخشی عِمِل‍لِریم» دییمِگی مومکین. اِمّا مِن آیدیارین، هانی، یاخشی عِمِل‍لِری اِتمِزدِن مانگا ایمانینگی گُرکِز، مِن هِم سانگا ایمانیمی یاخشی عِمِل‍لِریمینگ اوستو بیلِن گُرکِزِیین! 19 سِن خودایینگ یِکِدیگینه اینانیارسینگ. قاوی اِدیَرسینگ! مونگا حتّیٰ آرخو-جینلار هِم اینانیارلار و تیترِیَرلِر. 20 اِی سامسیق، عِمِلسیز ایمانینگ پِیداسیزدیغینی بیلِنگُقمی؟ 21 جِدّیمیز ابراهیم قربانلیق جاییندا اُز اُغلی اسحاقی هُدورلَپ و عِمِل‍لِری بیلِن تاقوالی حاساپلانمادیمی؟ 22 سِراِت، اُنونگ ایمانی بیلِن عِمِل‍لِری بیرلیکده حِرِکِت اِتدی و ایمانی شو عِمِلده کَمیل بُلدی. 23 شِیلِلیک بیلِن، مُقادِّس یازغیلاردا آیدیلان: «ابراهیم خودایا ایمان گِتیردی و خودای اُنی تاقوالی حاساپلادی» دییِن سُز یِرینه یِتدی. ابراهیم خودایینگ دُستی دییّپ آدلاندیریلدی. 24 گُردونگمی، اینسان دینگه بیر ایمان بیلِن دَل، شِیله بُلسا، عِمِل‍لِرینگ اوستو بیلِن تاقوالی حاساپلانیاندیر. 25 اِدیل شونونگ یالی، راحاب آدلی فاحیشه هِم اِدِن عِمِل‍لِرینینگ اوستو بیلِن تاقوالی حاساپلانمادیمی؟ اُل اسرائیل جاسوسلارینی اُیونده گوزگَپ، اُلارا باشغا یُلدان قاچیپ گیتمَگه کُمِک اِتدی. 26 اِدیل روحسیز بِدِنینگ اُلی بُلشی یالی، عِمِلسیز ایمان هِم اُلودیر. |
© Turkmen Truth