یعقوب 1 - مُقادِّس کیتاب1 خودایینگ و تانگریمیز عیسی مسیحینگ قولی مِن یعقوبدان باشغا میلِّتلِرینگ آراسینا پیتران اسرائیل‌ینگ اُن ایکی طایفاسینا دُغایی سالام! ایمان و ایمتِحانلار 2 اِی عزیزلِر، هِر هیلی ایمتِحانلارا دوچار بُلانینگیزدا، مونی اولی شاتلیق حاساپ اِدینگ. 3 سِبَبی ایمانینگیزینگ ایمتِحانلانماغی بیلِن جیدام آرتیاندیغینی بیلیَنسینگیز. 4 هِر بیر ایشده آخیرینا چِنلی جیدانگ، شُندا کِمسیز، یِتیشِن و کَمیل بُلارسینگیز. 5 اِگِر هِر کیم حِکمِت ایسلِیَن بُلسا، قُی، اُل خودایدان دیلِسین. هِمّه‌لِره مینِّتسیز و ساخیلیق بیلِن بِریَن خودای اُنگا هِم بِرِر. 6 اِمّا اُل آدام شِک اِتمَن ایمان بیلِن دیلِسین، سِبَبی شِک اِدیَن آدام اِدیل یِلینگ اِیلَک-بِیلَک چایقایان دِریانگ مُوجی یالیدیر. 7 شِیله آدام خودایدان بیر زات آلارین دییّپ گومَن اِتمِسین. 8 اُل هِر بیر اِدیَن ایشینده اویتگَپ هِم ایکیگُوونلیدیر. 9 یُقسیز ایماندار خودایینگ ناظاریندا اولیدیغی بیلِن قابارسین. 10 بای بُلسا خودایینگ ناظاریندا اُزونینگ یُقسیزدیغی بیلِن قابارسین. چونکی بایلیق اُتونگ گولی یالی سُلوپ گیدِر. 11 گون چیقیپ، حُوورلی قیزقینی بیلِن اُتی قورادیار، اُنونگ گولی دُکولیپ، آوادانلیغی یُق بُلیار. اِدیل شونونگ یالی بای هِم اُز ایش اوغروندا سُلوپ، بایلیغی بیلِن بیله یُق بُلوپ گیدِر. 12 ایمتِحانا جیدایان آدام خوشواقتدیر، سِبَبی اُل ایمتِحاندان گِچِندِن سُنگ، یاشاییش تاجینی آلار. خودای بو یاشاییش تاجینی اُنی سُیِنلِره واعدا بِردی. 13 وِسوِسه بُلان آدام: «مِنی خودای وِسوِسه اِدیَندیر» دییمِسین، سِبَبی خودایدا هیچ هیلی وِسوِسه‌لیک یُقدور، اُل هیچ کیمی تِلِکه‌لیک اِتمَگه وِسوِسه اِدیَن دَلدیر. 14 تِرسینه، هِر کیم اُز تِلِکه هُوِسلِرینه چُلاشیاندیر و آلدانیپ وِسوِسَه دوشیَندیر. 15 اُنسُنگ هُوِس گُورِلی بُلوپ، گونَه‌نی دُغوریار، گونَه هِم یِتیشیپ، اُلومی دُغوریاندیر. 16 اِی عزیزلِریم، آلدانمانگ! 17 هِر بیر قاوی و کَمیل ناغمات یُقاردان، آسمانداقی نورلارینگ آتاسیندان گِلیَندیر. اُل هیچ هاچان اویتگِیَن دَلدیر، اُندا اویتگِمِکلیگینگ کُلِگه‌سی هِم یُقدور. 18 یارادانلارینینگ آراسیندا اُنونگ بیرینجی میوه‌سی بُلماغیمیز اوچین، خودای حاقیقات سُزونینگ اوستو بیلِن بیزه تَزه یاشاییش بِرمِگی قارار اِتدی. خوش خاباری دینگلِمِک و عِمِل اِتمِک 19 اِی عزیزلِریم، مونگا دیقّات اِدینگ: هِر بیر آدام اِشیتمِکده باسیم، کِپلِمِکده یوواش، قاهارلانماقدا آسّا بُلسون. 20 سِبَبی اینسان قاهاری خودایینگ ایسلِیَن تاقوالیغینی یِرینه یِتیریپ بیلمِز. 21 شُنونگ اوچین هِم تِلِکه‌لیگی و هِر هیلی یامانلیغی کَنِلتیَن زادی زینگیپ اُقلانگ-دا، خودایینگ قالبینگیزا اِکِن سُزونی فُروتَنلیک بیلِن قابول اِدینگ. بو سُز جانینگیزی نِجات بِرمِگی باشاریاندیر. 22 خودایینگ سُزونی یُنه بیر اِشیتیپ قُیمان، شِیله، بُلسا آیدیلانلاری عِمِل اِدینگ، یُغسام سیز اُزونگیزی آلدایانسینگیز. 23 کیم سُزی اِشیتیپ، اُنی عِمِل اِتمِیَن بُلسا، اُل آینادا یوزونی گُریَن آدام یالیدیر. 24 اُل اُزونی گُروپ گیدِندِن سُنگ، شو واقتدا نَهیلیدیگینی یاددان چیقاریار. 25 اِمّا کیم آزادلیق بِریَن کَمیل شِریغاتا دیقّات بِریپ، اِشیدِنلِرینی یاددان چیقارمان، قایتام، اُنی قاوی عِمِل اِدیَن بُلسا، خودای اُنی هِر بیر اِدیَن ایشینده بِرِکِتلِر. 26 اِگِر هِر کیم اُزونی دیندار حاساپلایان بُلسا، اِمّا دیلینی ساقلامایان بُلسا، اُل اُزونی آلدایاندیر، اُنونگ دیندارلیغی باطیلدیر. 27 آتامیز خودایینگ ناظاریندا پَک هِم عاییبسیز دیندارلیق یِتیملِرینگ و دول آیال‍لارینگ قین گونونده خابارینی آلماقدان عیباراتدیر و شِیله هِم بو دونیَه‌نینگ یامانلیغیندان اُزونگی داش ساقلاماقدیر. |
© Turkmen Truth