عِبرانیلار 9 - مُقادِّس کیتاب

عیبادات اِتمِگینگ کُهنه تِرتیبلِری

¹ بیرینجی عَهد زاماندا عیبادات اِتمِگینگ قانونلاری و دونیِوی مُقادِّس چادیری باردی.‏

² ایکی اُتاقدان عیبارات بُلان بیر چادیر قورلوپدی، اُنونگ بیرینجی اُتاقینا مُقادِّس اُتاق دییّلیَردی.‏ اُل یِرده چیراغدان و میز باردی و میزینگ اوستونده هُدورلِنیپ قُیلان چُرِکلِر بُلاردی.‏

³ چادیرینگ ایکینجی پِرده‌سینینگ آنگیرسیندا ‏«‏اینگ مُقادِّس جای»‏ دییلیپ آدلاندیریلیان یِنه بیر اُتاق باردی.‏

⁴ بو اُتاقدا بُخور یاقیلیان جایی و عَهد صاندیقی باردی.‏ اُلارینگ ایکیسینینگ یوزی هِم بوتین قیزیلدان بِجِرلِندی.‏ صاندیقینگ ایچینده قیزیلدان بِجِرلِن مانّا قوتیسی، هارونینگ غُنچه‌لِیَن ‌عصاسی و ایکی بُلِگ داشینگ یوزونَه یازیلان اُن حُکوم باردی.‏

⁵ صاندیقینگ قاپاغینینگ اوستونده بِییکلیگَه شایلانان کِروبیلِر باردی.‏ بو کِروبیلِر قاناتلاری بیلِن قاپاغا کُلِگه سالیاردیلار.‏ اِمّا حَضیر بولار بارادا جیکمه-جیک گورّونگ اِتمِگینگ واقتی دَل.‏

⁶ هِمّه زات شونونگ یالی دیکِلِندِن سُنگ، کاهینلار هِر گون چادیرینگ بیرینجی اُتاقینا گیریپ، اُز خیدماتلارینی یِرینه یِتیریَردیلِر.‏

⁷ اِمّا چادیرینگ ایکینجی اُتاقینا ییلدا بیر گِزِک دینگه باش کاهین گیریَردی.‏ اُل اُزی اوچین و خالقینگ بیلمِزلیکدِن اِدِن گونَه‌لِری اوچین هُدورلِمَگه اُزی بیلِن هِمیشه قربانلیق قانینی آلمالیدی.‏

⁸ بو تِرتیبلِرینگ اوستو بیلِن مُقادِّس روح شونی گُرکِزیَر:‏ چادیرینگ بیرینجی اُتاقی بارقا، اینگ مُقادِّس اُتاقا آصلا گیریپ بُلماز.‏

⁹ مُقادِّس چادیر و اُنونگ واجیپلاری حَضیرکی زامان اوچین بیر نیشانیدیر.‏ بو هُدورلِنیَن صاداقالار و قربانلیقلار عیبادات اِدیَن آدامینگ وِجدانینی پَکلَپ بیلمِیَندیگینی گُرکِزیَر.‏

¹⁰ مونگا دینگه بِدِن بیلِن باغلی بُلان اییّپ-ایچمِک و هِر هیلی پَکلِنیش واجیپلاری گیریَر.‏ بولارینگ هِمّه‌سی تَزه تِرتیب یِرلِشدیریلیَنچه یِرینه یِتیریلیَردی.‏

عیبادات اِتمِگینگ تَزه تِرتیبلِری

¹¹ مسیح ایندی یِرینه یِتیرِن هِمّه یاخشی زاتلارینگ باش کاهینی بُلوپ گِلدی.‏ اُل اینسان اِلی بیلِن بِجِرِلمِدیک، بو دونیَه‌نینگ یارادیلیشیندان بُلمادیق خاص اولی و کَمیل چادیرا گیردی.‏

¹² اُل اینگ مُقادِّس اُتاقا گِچیلِرینگ و تانالارینگ قانی بیلِن دَل-ده، اُز قانی بیلِن گیریپ، بیر گِزِک و هِمیشه‌لیک بیزینگ اِبِدی آزادلیغیمیزی قازاندی.‏

¹³ اُوال گِچیلِرینگ و سیغیرلارینگ قانینی هِم-ده یاقیلان تانانینگ کولونی پَکسیز آداملارینگ اوستونه سِپیپ، اُلاری پَک اِدِردیلِر.‏

¹⁴ اِگِر شِیله اِدِن بُلسالار، اُندا مسیحینگ قانی بیلِن خاص-دا اولی ایشلِر اِدیپ بُلار!‏ شِیدیپ، مسیح اِبِدی روحونگ اوستو بیلِن اُزونی عایپسیز قربانلیق حُکمونده خودایا هُدورلِدی.‏ اُنونگ دُکِن قانی بیزینگ وِجدانیمیزی اُلومه اِلتیَن ایشلِردِن پَکلِیَر، شُندا بیز دیری خودایا خیدمات اِدیَریس.‏

¹⁵ شو سِبَپلی هِم چاغیریلانلاری خودایینگ واعدا اِدِن اِبِدی میراثینا قاوشورماق اوچین، عیسی مسیح تَزه عَهدینگ بُنیادچیسی بُلدی.‏ اُلاری اَوَّلکی عَهد زاماندا اِدِن گونَه‌لِرینینگ جِزاسیندان آزاد اِتمِک اوچین اُل قربانی بُلدی.‏

¹⁶ واعداسینا گُرَه هایسیدیر بیر وِصیِت نامه بار بُلسا، اُندا وِصیِتچینینگ اُلِندیگینی بِلّی اِتمِک گِرِک.‏

¹⁷ سِبَبی وِصیِت نامه دینگه وِصیِتچینینگ اُلومیندِن سُنگرا گویجه گیریَندیر.‏ وِصیِتچی دیریکَه، وِصیِت نامه‌نینگ آصلا گویجی یُقدور.‏

¹⁸ شُنگا گُرَه-ده اَوَّلکی عَهد هِم قان دُکولیَنچَه گویجه گیرمِدی.‏

¹⁹ موسی شِریغاتینگ هِر بیر حُکوملِرینی هِمّه خالقا اِعلان اِتدی.‏ سُنگرا قیزیل یونگ هِم بیر زوفا اُتی بیلِن گِچیلِرینگ و تانالارینگ قانینی و سووی آلیپ شِریغات کیتابینینگ و هِمّه خالقینگ اوستونه سِپدی،

²⁰ و سُنگرا:‏ ‏«‏بو ساقلامالی حُکوم خودای سیزینگ بیلِن اِدِن عَهد قانیدیر»‏ دییدی.‏

²¹ شُنونگ یالی هِم، موسی چادیرینگ و عیباداتدا قولّانیان هِمّه زاتلارینگ هِم اوستونه قان سِپدی.‏

²² حاقیقاتدانام، هِمّه زات شِریغاتا گُرَه قان بیلِن پَکلِنیَر.‏ قان دُکولمِزدِن هیچ بیر گونَه باغیشلانمایار.‏

²³ شِیلِلیکده، آسمانداقی زاتلارینگ یِردَکی نِمونه‌لِرینینگ بو قربانلیقلار بیلِن پَکلِنمِگی گِرِکدی.‏ اِمّا آسمانداقی زاتلارینگ اُزلِری بولاردان خاص قاوی قربانلیقلاری طالاب اِدیَردی.‏

²⁴ چونکی مسیح اینسان اِلی بیلِن بِجِرلِن و یُنه بیر گُرنوشی بُلان اینگ مُقادِّس اُتاقا گیرمِدی.‏ اُل بیزینگ اوچین شو واقت خودایینگ حوضوریندا حَضیر بُلوپ، آسمانداقی مُقادِّس اُتاقا گیردی.‏

²⁵ باش کاهین اینگ مُقادِّس اُتاقا هِر ییل گیریپ، اُز قانینی دَل-ده قربانلیق جانلیسینینگ قانینی هُدورلِیَردی، اِمّا مسیح آسمانا گیرمِک اوچین اُزونی نَچه گِزِک قربانی اِتمِدی.‏

²⁶ بِیله بُلسا، مسیح دونیَه یارادیلان بَری بیرنَچه گِزِک عاذاپ چِکمِلی بُلاردی.‏ مونگا دِرِک اُل آداملارینگ گونَه‌لِرینی یووماق اوچین اُزونی قربانی اِتمِک بیلِن آخیرقی دُوورده بیر گِزِک گِلدی.‏

²⁷ اینسانینگ تاقدیریندا بیر گِزِک اُلوم باردیر، اُندان سُنگ خودایینگ اُوونده حاساپ بِرمِلیدیر.‏

²⁸ اِدیل شُنونگ یالی، مسیح هِم کَن آداملارینگ گونَه‌لِرینی یووماق اوچین، بیر گِزِک قربانی بُلدی.‏ اِمّا اُل ایکینجی گِزِک گِلِنده، گونَه‌لِری یووماق اوچین دَل-ده، شِیله بُلسا اُزونه اینتیظارلیق بیلِن قاراشیانلاری نِجات بِرمِک اوچین گِلِر.‏