عِبرانیلار 8 - مُقادِّس کیتاب

عیسی، باش کاهینمیز

¹ آیدیانلاریمیزینگ ماقصادی شوندادیر:‏ آسماندا بِییک خودایینگ تاختینینگ ساغیندا اُتوران باش کاهینمیز باردیر.‏

² اُل مُقادِّس چادیردا، اینسانینگ دَل-ده، اِدیل خودایینگ قوران حاقیقی چادیریندا خیدمات اِدیَر.‏

³ هِر بیر باش کاهین صاداقالار هِم قربانلیقلار هُدورلِمِک اوچین بِلِّنیلیَر.‏ شو سِبَپدِن بیزینگ باش کاهینیمیزینگ هِم قربانلیق هُدورلِمِگی گِرِکدی.‏

⁴ اِگِر اُل آسماندا دَل-ده، یِرده بُلسادی، آصلیندا کاهین هِم بُلمازدی.‏ سِبَبی شِریغاتا گُرَه صاداقالاری هُدورلِیَن کاهینلار زامانی باردی.‏

⁵ اُلار یِردَکی مُقادِّس چادیردا خیدمات اِدیَرلِر.‏ بو چادیر باری-یُغی آسمانداقی حاقیقی چادیرینگ گُرنوشی و کُلِگه‌سیدیر.‏ شُنونگ اوچین هِم خودای مُقادِّس چادیری نَهیلی بِجِرمِلیدیگی بارادا موسی شِیله تابشیریپدی:‏ ‏«‏هِمّه زادی داغدا اُزونگه گُرکِزیلِن نِمونه‌نینگ اِساسیندا بِجِرِرسینگ»‏.‏

⁶ اِمّا عیسی بِرلِن کاهینلیق خیدماتی بِیلِکی کاهینلارینقیدان بِییکدیر.‏ شِیله هِم اُل تَزه عَهدینگ بُنیاتچیسیدیر، تَزه عَهد اُوالقی عَهددِن اوستوندیر و قاویراق واعدالارا اِساسلاناندیر.‏

⁷ چونکی اِگِر اُوالقی عَهد کِمچیلیگی بُلماسادی، اُندا بو تَزه عَهد گِرِک بُلمازدی.‏

⁸ اِمّا خودای اُز خالقیندا کِمچیلیک تاپیپ اُلارا شِیله دییدی:‏ ‏«‏اسرائیل و یهودا خالقی بیلِن مِنینگ تَزه عَهد باغلاشجاق گونلِریم حُکمان گِلِر.‏ مونی خودای آیدیاندیر.‏

⁹ بو عَهد مِنینگ اُلارینگ آتا-بابالارینینگ اِل‍لِریندِن توتوپ، مصردِن چیقاران گونوم باغلاشان عَهدیم یالی دَلدیر.‏ اُلار مِنینگ شُل عَهدیمه وِفادار بُلمادیلار، شُنونگ اوچین مِن اُلاردان یوز اُووردیم.‏ مونی خودای آیدیاندیر.‏

¹⁰ اینه، اُل گونلِردِن سُنگ مِنینگ اسرائیل خالقی بیلِن باغلاشجاق عَهدیم شودور:‏ مِن حُکوملِریمی اُلارینگ فیکرینَه سالیپ، یورِکلِرینه یازارین.‏ مِن اُلارینگ خودایی بُلارین، اُلار-دا مِنینگ خالقیم بُلار.‏ مونی خودای آیدیاندیر.‏

¹¹ موندان بِیلَک هیچ کیم اُز هِمسایاسینا تَعلیم بِرمِز و یا-دا بیری-بیرینه ‏”‏خودایی تانینگ!‏“‏ دییّپ آیتماز، سِبَبی اُلارینگ اولودان-کیچَه هِمّه‌سی مِنی تانار.‏

¹² مِن اُلارینگ یامانلیقلارینی باغیشلارین، گونَه‌لِرینی قایتادان هیچ هاچان یادا سالمارین.‏»‏

¹³ خودای بو عَهده ‏«‏تَزه»‏ دییمِک بیلِن، اُوالقی عَهدینگ کُهنه‌لِندیگینی گُرکِزدی.‏ کُهنه‌لیپ، ضایالانان زات بُلسا، باسیم یُق بُلوپ گیدیَندیر.‏