عِبرانیلار 6 - مُقادِّس کیتاب

¹ شُنونگ اوچین، گِلینگ، عیسی مسیح باراداقی باشلانان تَعلیمدا قالمان اُوه حِرِکِت اِدیپ، ایماندا گویچلِنِیلینگ و ایزا قایتمایلینگ.‏ اُلومه اِلتیَن ایشلِره توبا اِتمِک، خودایا ایمان گِتیرمِک،

² تَعمید بِرمِکلِر، اِل قُیوپ دُغا اِتمِکلِر بارادا، شِیله-ده اُلولِرینگ دیرِلیشی و اِبِدی حُکوم بارادا نَچه گِزِک اِساسی تَعلیم آلماغیمیزینگ گِرِگی یُق.‏

³ خودای یُل بِرسه، بیز مونی اِدِریس.‏

^4-6 کیم اُنگ بیر گِزِک خودایدان نورلانیپ، آسمانینگ ناغماتینی آلاندان سُنگرا، شِیله هِم مُقادِّس روحا شِریک بُلوپ، خودایینگ خوش خابارینینگ یاخشیلیغینی دادیپ، گِلجِکّی زامانینگ قودراتینی گُرِندِن سُنگرا، خودایدان یوز اُوروپ، یُلدان چیقسا، اُنی تَزه‌دِن توبا گِتیرمِک مومکین دَل.‏ سِبَبی اُل آدام خودایینگ اُغلونی قایتادان صلیبه چویلَپ، ایله رُسوا اِدیَندیر.‏

⁷ ایزلی-ایزینا یاغان یاغیندان ایچیپ، تایخانا بُل حاصیل گِتیریَن تُپراغا خودای بِرِکِت بِریَندیر.‏

⁸ اِمّا تیکِن و یانداق بیتیَن یِر دِرِکسیزدیر، اُل لَعنِت بُلماغا قُلایدیر و آخیرسُنگی اُنی اُدا یاقارلار.‏

⁹ عزیز دُستلار، بیز شِیله دییسِک هِم، سیزینگ بِیله دَلدیگینگیزی بیلیَریس.‏ سیزینگ دُغری یُلدان یُریپ، نِجات تاپجاقدیغینگیزا اینانیاریس.‏

¹⁰ خودای عادالاتلیدیر، چونکی اُل سیزینگ بیتیرِن ایشینگیزی، اُنونگ خالقینا اِدِن و اِدیَن خیدماتینگیز بیلِن اُزونه بُلان سُیگینگیزی یاددان چیقارماز.‏

¹¹ بیز سیزینگ هِر بیرینگیزینگ اومیدینگیزینگ یِرینه یِتیرمِگینینگ اینگ آخیرقی واقتینا چِنلی خیدماتدا قایراتلیق گُرکِزمِگینگیزی ایسلِیَریس.‏

¹² یالتالیغا یوز اورمانگ، قایتام، ایمان هِم صابیر-طاقاتینگ اوستو بیلِن خودایینگ واعدالارینی میراث آلانلاردان نِمونه آلینگ.‏

خودایینگ واعداسی ایناملیدیر

¹³ خودای ابراهیما واعدا بِرِنده، اُزوندِن بِییک هیچ کیمینگ یُقدوغی اوچین، اُز آدیندان قاسام ایچدی.‏

¹⁴ اُل:‏ ‏«‏مِن، حاقیقاتدانام، سِنی بِرِکِتلَپ، سِنینگ نِسلینگی سانسیز کَنِلدِرین»‏ دییّپ قاسام ایچدی.‏

¹⁵ شِیلِلیکده، ابراهیم صابیر-طاقات بیلِن قاراشیپ، بِرلِن واعدا یِتدی.‏

¹⁶ آداملار اُزوندِن بِییک بیرینینگ آدیندان قاسام ایچیَرلِر.‏ قاسام ایچیلِن زادی تاصدیقلاپ، هِمّه جِدِل‍لِری تاماملایار.‏

¹⁷ خودای هِم واعداسینی قابول اِدیَنلِره اُز ماقصادینینگ اویتگِمِیَندیگینی بِلّی اِتمِک ایسلِدی.‏ شُنونگ اوچین اُل مونی قاسام بیلِن تاصدیقلادی.‏

¹⁸ شِیلِلیکده، خودای بیزه ایکی زات:‏ هِم واعدا بِردی، هِم قاسام ایچدی.‏ مونونگ ایکیسی هِم اویتگِمِیَندیر، سِبَبی خودای هیچ واقت یالان آیتمایار.‏ شُنونگ اوچین هِم، بیز خودایدا پِناه گِتیریپ، اُزومیزه بِرلِن اومیدا قاییم یاپیشیپ گُوونلیک تاپیاریس.‏

¹⁹ بو اومید لِنگِر یالی جانیمیزی قاییم هِم خاطارسیز ساقلایاندیر، اُل آسمانداقی چادیرینگ توتولان پِرده‌نینگ آنگیرسینا گِچیَندیر.‏

²⁰ عیسی بیزه یُل آچماق اوچین، اُل یِره اَوَّلکی بُلوپ گیریپ، مِلکیصِدِق دِرِجه‌سیندَکی اِبِدیلیک باش کاهینمیز بُلدی.‏