عِبرانیلار 5 - مُقادِّس کیتاب

¹ هِر بیر باش کاهین اینسانلار آراسیندان سایلانیار.‏ اُل خودایینگ حوضوریندا خالقا وِکیلچیلیک اِتمِک اوچین بِلِّنیلیپ، گونَه‌لِر اوچین خودایا صاداقالار و قربانلیقلار هُدورلِیَر.‏

² باش کاهین نادانلارا و یُلدان آزاشانلارا یومشاق بُلماغی باشاریار، سِبَبی اُزونده هِم اینسان کِمچیلیکلِری بار.‏

³ شو سِبَپدِن اُل خالقینگ-دا، اُزونینگ-ده گونَه‌لِری اوچین قربانلیق بِرمَگه بُرچلودیر.‏

⁴ هیچ کیم باش کاهین بُلماق حُرماتینی اُزی قازانیپ بیلمِز، اُل هارون یالی، خودای طارافیندان چاغیریلیار.‏

⁵ شُنونگ اوچین مسیح هِم باش کاهین بُلماق اوچین اُزونی اُزی بِییکلِندیرمِدی.‏ تِرسینه، اُنی:‏ ‏«‏سِن مِنینگ اُغلومسینگ، بو گون مِن سانگا آتا بُلدوم»‏ دییّپ آیدان خودای بِییکلِندیردی.‏

⁶ باشغا بیر یِرده بُلسا:‏ ‏«‏سِن مِلکیصِدِق دِرِجه‌سیندَکی کاهین یالی، هِمیشه‌لیک کاهینسینگ»‏ دییّپ آیدیار.‏

⁷ مسیح بو دونیَه‌ده یاشان واقتیندا گُزیاش دُکوپ، اُزونی اُلومدِن نِجات بِرمِگی باشاریان خودایا دُغالار هِم یالباریشلار بیلِن فِریاد اِتدی.‏ اُل اُزونی خودایا تابشیراندیغی اوچین خاییشی یِرینه یِتدی.‏

⁸ اُل اُغول هِم بُلسا، عاذاپ گُروپ، موطیع بُلماقلیغی اُورِندی.‏

⁹ شِیلِلیکده، عیسی مسیح کَمیل بُلوپ، اُل اُزونه موطیع بُلیانلارینگ هِمّه‌سینی اِبِدیلیک نِجات بِرمِگی باشاریار.‏

¹⁰ شِیله هِم، خودای اُنی مِلکیصِدِق دِرِجه‌سیندَکی باش کاهین دییّپ اِعلان اِتدی.‏

ایماندا گویچلِنِیلینگ

¹¹ بو بارادا آیتجاق گورّونگیمیز کَن، اِمّا اِشیتمَگه ایسلِمِیَندینگیز سِبَپلی، مونی سیزه دوشوندیرمِک قین.‏

¹² حاقیقاتدان-دا، سیز شو واقتا چِنلی اُزونگیز باشغالارا اُورِتمِلیدینگیز آخیری!‏ قایتام، سیز باشغالارا دَل-ده، باشغالار سیزه خودایینگ تَعلیماتینینگ اَوَّلکی اِساسلارینی اُورِتمِکلِرینه مَحتَج.‏ سیزه آغیر اییمیت دَل-ده، هِنیز هِم سویت گِرِک!‏

¹³ کیم سویت بیلِن اییمیتلِنیَن بُلسا، هِنیز چاغادیر.‏ اُل نَهیلی تاقوالی یاشامالیدیغینینگ یُلونی بیلیَن دَلدیر.‏

¹⁴ اِمّا آغیر اییمیت بُلسا، یِتیشِنلِر اوچیندیر.‏ اُلار اُز گونلیک ایشلِریندِن اُورِنیپ، یاخشی بیلِن یامانی تانیپ بیلیَندیرلِر.‏